Ekisodo
7 Pamwapo Yahova adauza Mose kuti: “Ona, nakuikha kuti ukhale ninge Mulungu* kwa Farao, ndipo Aroni m’bale wako akhale mneneri wako. 2 Iwepo umbamuuze vose vomwe nimbakulamule, koma Aroni m’bale wako ndiye yemwe ambayankhule na Farao, ndipo iye adzabvumedi kuti Aizirayeli achoke mudziko yake. 3 Koma inepano nidzabvume kuti Farao aumise ntima wake, ndipo nidzachite vizindikiro na vodabwisa vizinji mudziko ya Iguputo. 4 Olo viri teno Farao adzakubverenilini, ndipomwapa nidzawonese mphamvu za djanja yangu pa Iguputo na kubulisa wanthu wangu Aizirayeli omwe ni azinji. Nidzawabulise mudziko ya Iguputo na viweruzo va mphamvu. 5 Pamwapo Aiguputo adzadziwe kuti inepano ndine Yahova nikadzapfuthula djanja yangu na kulanga Aiguputo, nkubulisa Aizirayeli mudziko mwiyo.” 6 Mose na Aroni adachitadi vomwe Yahova adawalamula. Adachitadi vimwivo. 7 Panthawe yomwe ambayankhula na Farao, Mose wenze na magole 80 ndipo Aroni wenze na magole 83.
8 Manje Yahova adauza Mose na Aroni kuti: 9 “Farao akakuuzani kuti: “Chitani chodabwisa,’ Iwepo ukauze Aroni kuti: ‘Tenga psyimbo yako mkuiponya patsogolo pa Farao.’ Akakachita vimwivo ikasanduke nyoka ikulu.” 10 Pamwapo Mose na Aroni adayenda kwa Farao ndipo adachita ndendende momwe Yahova adawalamulira. Aroni adaponya mpsyimbo yake patsogolo pa Farao na Atumiki wake, ndipo mpsyimbo mwiyo idasanduka nyoka ikulu. 11 Olo nteno, Farao adachemera amuna wanzeru na wamatsenga ndipo antsembe ochita vamatsenga ku Iguputo nawombo adachitambo vimwevo mwa matsenga yawo. 12 Aliyese wa iwo adaponya mpsyimbo yake, ndipo zidasanduka nyoka zikuluzikulu. Koma mpsyimbo ya Aroni idameza mpsyimbo zawo. 13 Olo kuti venze teno, Farao adapitiriza kuumisa ntima wake ndipo alibe kuwabvera, ninge momwe Yahova adanenera.
14 Patsogolo pake Yahova adauza Mose kuti: “Farao waumisa ntima wake. Iye walamba kuti Aizirayeli achoke. 15 Mangwana machibese uyende kwa Farao. Iye adzakhale akuyenda kukamadzi ka Nilo. Udzaime pamalo yakuti udzakwanise kuyankhula naye mphepete mwa kamadzi ka Nilo, ndipo udzatenge mpsyimbo yomwe idasanduka nyoka ire. 16 Ndipo ukamuuze kuti: ‘Yahova Mulungu wa Aheberi wanituma kwa iwepo na ntontholo wakuti: “Bvumiza wanthu wangu kuchoka kuti akanitumikire kuchipululu,” koma mpakana pano unkunibveralini. 17 Yahova wanena kuti: “Nimenye madzi ya mukamadzi ka Nilo na mpsyimbo yomwe iri m’manja mwangu, ndipo madzi mwaya yasanduke magazi. Vikakhala teno udziwe kuti inepano ndinedi Yahova. 18 Ntsomba zomwe ziri mukamadzi ka Nilo zife, ndipo kamadzi ka Nilo kanunkhe, mwakuti Aiguputo akwaniselini kumwa madzi yake.”’”
19 Patsogolo pake Yahova adauza Mose kuti: “Uza Aroni kuti: ‘Tenga mpsyimbo yako, ndipo upfuthule djanja yako nkulata madzi ya mu Iguputo. Ulate tukamadzi twawo, migero yawo,* mathawale yawo na malo yose yomwe asungiramo madzi kuti yasanduke magazi.’ Pamwapo madzi ya mudziko yose ya Iguputo, kuphatanidzapo ya muvombo vawo vokonzewa na miti na minyala yadakhala magazi.” 20 Nthawe mwiyoletu Mose na Aroni adachita mobverana na momwe Yahova adawalamulira. Aroni adatenga mpsyimbo yake nkumenya nayo madzi ya mukamadzi ka Nilo, Farao na atumiki wake ankuwona ndipo madzi yose ya mu kamadzi ka Nilo yadasanduka magazi. 21 Pavidateno ntsomba za mukamadzi ka Nilo zidafa ndipo kamadzi mwako kadayamba kununkha. Aiguputo alibe kukwanisa pomwe kumwa madzi ya mukamadzi ka Nilo. Mudziko yose ya Iguputo mwenze magazi yokhayokha.
22 Koma antsembe ochita vamatsenga ku Iguputo adachitambo vimwevi mwa matsenga yawo, mwakuti Farao adapitiriza kuumisa ntima wake, ndipo alibe kubvera Mose na Aroni, ninge momwe Yahova adanenera. 23 Patsogolo pake Farao adabwerera kumuyi kwake, ndipo ambafunalini olo pang’ono kubva pomwe va nkhani mweyi. 24 Pamwapo Aiguputo wose adayamba kukumba michera mphepete mwa kamadzi ka Nilo kuti agumane madzi yakumwa, ndawa ambakwanisalini kumwa madzi ya mukamadzi ka Nilo. 25 Ndipo penze padapita ntsiku 7 kuchokera pomwe Yahova adasandusa madzi ya mu kamadzi ka Nilo kukhala magazi.