Ekisodo
8 Pamwapo Yahova adauza Mose kuti: “Yenda kwa Farao, ukamuuze kuti: ‘Yahova wati: “Bvumiza wanthu wangu kuti ayende akanitumikire. 2 Ukapitiriza kulamba kuti ayende, nigwese muliri wa achule mudziko yako yose. 3 Achule mwawo adzawande maninge mu kamadzi ka Nilo ndipo adzabule mu kamadzi mwako nkungena m’nyumba mwako, muchipinda chako chogona, pa m’bedi pako, m’nyumba za atumiki wako, za wanthu wako, m’mauvuni yako na mu vombo vako vokanyiramo ufa. 4 Ndipo achule mwawo adzabwere kwa iwepo, kwa wanthu wako na kwa atumiki wako wose.”’”
5 Patsogolo pake Yahova adauza Mose kuti: “Uza Aroni kuti: ‘Pfuthula djanja yako nkulata na mpsyimbo yako ku tukamadzi, kumigero yochokera ku kamadzi ka Nilo na ku mathawale, kuti achule abule mumo nkubwera pamtunthu mudziko yose ya Iguputo.’” 6 Pamwapo Aroni adapfuthula djanja yake nkulata madzi yose ya mu Iguputo, ndipo achule adayamba kubula na kudzala dziko yose ya Iguputo. 7 Koma wantsembe ochita vamatsenga adachitambo vimwivo mwa matsenga yawo, ndipo adachitisa achule kubwera pamtunthu mudziko ya Iguputo. 8 Patsogolo pake Farao adachemera Mose na Aroni nkuwauza kuti: “Gwigwirirani Yahova kuti anichosere achule ndipo achosere pomwe wanthu wangu, ndawa ninkufuna kubvumiza wanthu wanu kuti ayende kukapereka ntsembe kwa Yahova.” 9 Manje Mose adauza Farao kuti: “Munene ndimwepo kuti nikakugwigwirireni nthawe yanyi kwa Mulungu kuti achule mwawa achoke kwa imwepo, kwa atumiki wanu, kwa wanthu wanu na m’nyumba zanu. Achule mwawa andodzakhala mukamadzi ka Nilo mokha basi.” 10 Pamwapo Farao adadawira kuti: “Mangwana.” Manje Mose adati: “Vichitike mobverana na vomwe mwanena kuti mudziwe kuti palibe pomwe munango wolingana na Yahova Mulungu wathu. 11 Achule mwawa adzachoke kwa imwepo, m’nyumba zanu, kwa atumiki wanu na kwa wanthu wanu. Andodzakhala mukamadzi ka Nilo mokha basi.”
12 Pamwapo Mose na Aroni adachoka pamaso pa Farao, ndipo Mose adagwigwirira Yahova kuti achose achule omwe Iye adagwesera Farao. 13 Pavidateno Yahova adachita mobverana na vomwe Mose adakumbira, ndipo achule omwe enze m’nyumba, panja na m’maminda adayamba kufa. 14 Aiguputo adayamba kuunjika achule mwawo m’mahopomahopo yosawerengeka ndipo dziko yose mwiyo idayamba kununkha. 15 Farao padawona kuti muliri muyo wa achule wamala, adaumisa ntima wake, ndipo alibe kubvera Mose na Aroni, mobverana na vomwe Yahova adanena.
16 Manje Yahova adauza Mose kuti: “Uza Aroni kuti: ‘Tenga mpsyimbo yako nkumenya pfumbi ya pasi kuti ikhale tulombo toyamwa magazi* mudziko yose ya Iguputo.’” 17 Iwo adachitadi vimwivo. Aroni adapfuthula djanja yake nkumenya pfumbi yapasi na mpsimbo yake, ndipo tulombo muto tudayamba kuboneresa wanthu na vinyama kubodzi. Pfumbi yose ya mudziko ya Iguputo idasanduka tulombo toyamwa magazi. 18 Antsembe ochita vamatsenga adayeserambo kuti akonze tulombo toyamwa magazi pophatisira basa matsenga yawo, koma adakangira. Ndipo tulombo muto tumbaboneresa wanthu na vinyama kubodzi. 19 Padawona vimwevi, antsembe ochita vamatsenga wale adauza Farao kuti: “Chimwichi ni chala cha Mulungu!” Koma Farao adapitiriza kuumisa ntima wake ndipo alibe kuwabvera mobverana na vomwe Yahova adanena.
20 Patsogolo pake Yahova adauza Mose kuti: “Mangwana ubesere maninge ukagumane na Farao akambadzayenda kukamadzi ndipo ukamuuze kuti: ‘Yahova wanena kuti: “Bvuma kuti wanthu wangu ayende akanitumikire. 21 Koma peno ubvumelini kuti wanthu wangu ayende, nitumize ntchentche* zoluma kwa iwepo, atumiki wako, wanthu wako na m’nyumba zanu. Ndipo nyumba za mu Iguputo zidzadzaliretu na ntchentche zimwezi komasoti zidzadzale palipose pomwe pali wanthu* mwakuti ambadzasowe poponda. 22 Pantsiku mwiyo nidzapatule dera ya Goseni komwe kuli wanthu wangu. Kumuko kudzakhale kulibe ntchentche zoluma. Nidzachite vimwevi kuti mudziwe kuti ine Yahova, niri mudziko ino. 23 Ndipo vomwe nidzachitire wanthu wangu vidzakhale vosiyana na vomwe nidzachitire wanthu wako. Mangwana chizindikiro chimwichi chichitike.”’”
24 Yahova adachitadi vimwevi, mwakuti ntchentche zoluma zenze palipose m’nyumba ya Farao, m’nyumba za atumiki wake na mudziko yose la Iguputo. Ntchentche mwizo zidabweresa mabvuto yakulu kwa wanthu wa ku Iguputo. 25 Pavidateno Farao adachemera Mose na Aroni nkuwauza kuti: “Yendani, kaperekeni ntsembe kwa Mulungu wanu koma mudziko mwaino.” 26 Koma Mose adati: “Vingakhalelini bwino kuchita teno ndawa nyama zomwe tingapereke ntsembe kwa Yahova Mulungu wathu zingakhale zonyantsa kwa Aiguputo. Ko Aiguputo adzatiphwanyelini na minyala akadzatiwona tinkupereka ntsembe nyama zomwe aziwona kuti ni zonyantsa? 27 Isepano tifambe ulendo wa ntsiku zitatu mu chipululu, ndipo kumuko tikapere ntsembe kwa Yahova Mulungu wathu, mobverana na momwe iye watiuzira.”
28 Pamwapo Farao adati: “Inepano nikubvumizeni kuti muyende, ndipo mukaperekedi ntsembe kwa Yahova Mulungu wanu mu chipululu, koma ayi kuyenda kutali maninge. Nigwigwirireni kwa Mulungu wanu.” 29 Patsogolo pake Mose adati: “Nikachoka pano, ninkuyenda kukakugwigwirirani kwa Yahova ndipo mangwana ntchentche mwizi zichoke pa imwepo Farao, atumiki wanu na wanthu wanu. Koma imwepo Afarao ayi kutinamiza pomwe nkuleka kubvumiza wanthu kuyenda kukapereka ntsembe kwa Yahova.” 30 Pavidateno Mose adachoka kwa Farao nkuyenda kukagwigwirira Yahova. 31 Yahova adachita mobverana na vomwe Mose adakumbira, ndipo ntchentche mwizo zidachoka kwa Farao, atumiki wake na wanthu wake. Palibe kusala ntchentche olo ibodzi. 32 Koma Farao adaumisa pomwe ntima wake, ndipo alibe kubvuma kuti wanthu mwawo achoke.