Ekisodo
6 Yahova adauza Mose kuti: “Manje uwone vomwe nichite kwa Farao. Djanja yangu yamphanvu imuchichimize kuti awabvumize kuchoka, ndipo djanja yangu yamphanvu imuchichimize kuti awathamangise mudziko yake.”
2 Patsogolo pake Mulungu adauza Mose kuti: “Ine ndine Yahova. 3 Nimbawonekera kwa Abulahamu, Isaki na Yakobo ninge Mulungu Wamphanvu zose. Koma va dzina yangu yakuti Yahova, inepano niribe kudzidziwikisa kwa iwo. 4 Nidakhazikisa pangano yangu na iwo kuti nidzawapase dziko ya Kanani, dziko yomwe iwo ambakhalamo ninge alendo. 5 Manje inepano nabva kubuula kwa Aizirayeli, omwe Aiguputo ankuwaphatisa basa yaukapolo, ndipo ninkukumbukira pangano yangu.
6 Manje uwauze Aizirayeli kuti, ‘Ine ndine Yahova. Nidzakupulumuseni ku basa yochichimiza yomwe Aiguputo ankukuphatisani ndipo nidzakupulumuseni kuti osati mukhale pomwe akapolo wawo. Nidzakuwomboleni na djanja yangu yopfuthula* komasoti na viweruzo vamphanvu. 7 Pamwapo nidzakutengeni kuti mukhale wanthu wangu, ndipo inepano nidzakhale Mulungu wanu. Imwepo mudzadziwedi kuti inepano ndine Yahova Mulungu wanu yemwe ninkukupulumusani ku basa yochichimiza yomwe Aiguputo ankukuphatisani. 8 Inepano nidzakungeneseni mudziko yomwe nidalumbira* kuti nidzaipereke kwa Abulahamu, Isaki na Yakobo. Nidzakupaseni dziko mwiyo kuti ikhale yanu. Inepano ndine Yahova.’”
9 Patsogolo pake Mose adapereka ntontholo muyu kwa Aizirayeli, koma iwo alibe kumubvera Mose ndawa yakuti enze okwinyirira komasoti ndawa ya basa yoshupa ya ukapolo.
10 Manje Yahova adauza Mose kuti: 11 “Yenda kwa Farao, mpfumu ya Iguputo, ukamuuze kuti abvumize Aizirayeli kubula mu dziko yake.” 12 Koma Mose adadawira Yahova kuti: “Aizirayeli alibe kunibvera, manje Farao ndiye wati akanibvere? Pale niyankhula moshupikira.”* 13 Koma Yahova adauza pomwe Mose na Aroni malamulo yakuti akapereke kwa Azirayeli na kwa Farao, mpfumu ya Iguputo, kuti abulise Aizirayeli mudziko ya Iguputo.
14 Atsogoleri wa madzinza ya Aizirayeli ni awa: Wana amuna wa Rubeni, yemwe wenze mwana woyamba kubadwa wa Izirayeli, enze Hanoki, Palu, Hezironi na Karami. Yamwaya ni mabanja ya dzinza ya Rubeni.
15 Wana amuna wa Simiyoni enze Yemueli, Yamini, Ohadi, Yakini, Zohari na Shauli, mwana yemwe adamubereka na nkazi wa Chikanani. Yamwaya ni mabanja ya dzinza ya Simiyoni.
16 Madzina ya wana amuna wa Levi, mobverana na mzera wobadwira wa azibereki wawo ni aya: Gerisoni, Kohati na Merari. Ndipo magole yose yomwe Levi adakhala na moyo yadakwana 137.
17 Wana wa Gerisoni enze Libini na Simeyi, mobverana na mabanja yawo.
18 Ndipo wana wa Kohati enze Amuramu, Izara, Heburoni na Uziyeli. Magole yose yomwe Kohati adakhala na moyo yadakwana 133.
19 Ndipo wana amuna wa Merari enze Mali na Musi.
Yamwaya yenze mabanja ya Levi, mobverana na mzera wobadwira wa azibereki wawo.
20 Manje Amuramu adatenga Yokebedi, mulongosi wa ababa wake, nkukhala nkazi wake. Ndipo Yokebedi adamuberekera Amuramu, Aroni na Mose. Magole yose yomwe Amuramu adakhala na moyo yadakwana 137.
21 Wana amuna wa Izara enze Kora, Nefegi na Zikiri.
22 Wana amuna wa Uziyeli enze Misayeli, Elizafana na Sitiri.
23 Aroni adatenga Eliseba, mwana nkazi wa Aminadabu, mulongosi wake wa Naasoni, nkukhala nkazi wake. Ndipo Eliseba adamuberekera Nadabu, Abihu, Eleazara na Itamara.
24 Wana amuna wa Kora enze Asiri, Elikana na Abiasafu. Yamwaya yenze mabanja ya Kora.
25 Ndipo Eleazara mwana wa Aroni, adatenga mwana nkazi wa Putieli nkukhala nkazi wake. Ndipo iye adamuberekera Pinihasi.
Mwawa ni azitsogoleri wa mabanja ya dzinza ya Levi, mobverana na mabanja yawo.
26 Muyu ni mzera wobadwira wa Aroni na Mose, omwe Yahova adawauza kuti: “Bulisani Aizirayeli m’dziko ya Iguputo m’magulumagulu.”* 27 Mose na Aroni ndiwo adayankhula na Farao mpfumu ya Iguputo kuti abulise Aizirayeli mu Iguputo.
28 Pantsiku yomwe Yahova adayankhula na Mose m’dziko ya Iguputo, 29 Yahova adamuuza kuti: “Ine ndine Yahova. Vose vomwe ninkukuuza, ukauze Farao mpfumu ya Iguputo.” 30 Manje Mose adauza Yahova kuti: “Koma niyankhula moshupikira,* manje Farao akanibvere tani?”