Ekisodo
5 Patsogolo pake Mose na Aroni adayenda kwa Farao nkumuuza kuti: “Yahova Mulungu wa Izirayeli wanena kuti: ‘Bvuma kuti wanthu wangu ayende kuchipululu kuti akachite chikondwerero.’” 2 Koma Farao adati: “Yahova ni mbani kuti nibvere mawu yake nkubvumiza Aizirayeli kuti ayende? Inepano ninkumudziwalini Yahova ne pang’ono ndipo nibvumelini kuti Aizirayeli ayende.” 3 Manje iwo adati: “Mulungu wa Aheberi wayankhula nase. Manje pulizi tibvumizeni kuti tichoke, tichite ulendo wa ntsiku zitatu nchipululu, kuti tikapereke ntsembe kwa Yahova Mulungu wathu. Tikaleka kuchita teno, adzatiphe na matenda panango chibemba.” 4 Mpfumu ya Iguputo idawadawira kuti: “Ndawa chani iwepo Mose na Aroni mukufuna kuti wanthu asiye basa zawo? Bwererani ku basa yanu!”* 5 Farao adapitiriza kunena kuti: “Wanthu awa ni azinji mudziko ino, ndipo imwepo mukufuna kusokoneza basa yawo.”
6 Ntsiku mwiyoletu Farao adalamula omwe ambawaphatisa basa mwamphanvu na wonyanganira wawo kuti: 7 “Wanthu mwawa ayi kuwapasa pomwe uswa wotchaira ntcherwa. Muwasiye kuti ambanyang’ane okha uswa muyo. 8 Koma muwauze kuti chiwerengero cha ntcherwa zofunika chipitirize kukhala chakalekale chire. Ayi kuwachepesera chiwerengero mwicho, ndawa ayamba ulesi. Ndipomwapa ankulira kuti: ‘Tikufuna kuti tiyende tikapereke ntsembe kwa Mulungu wathu!’ 9 Aphatiseni basa yowawa wanthu mwawa ndipo muwapase basa izinji kuti osati abvere mabodza.”
10 Pamwapo omwe ambawaphatisa basa mwamphanvu komasoti omwe ambawanyang’anira adayenda kwa Aizirayeli mwawo nkuwauza kuti: “Tetekerani vomwe Farawo wanena: ‘Nikupasenilini pomwe uswa wotchaira ntcherwa. 11 Mumbayende mwekha kukanyang’ana uswa kulikose kwamungaugumane, koma basa yanu ichepesewelini olo pang’ono.’” 12 Pavidateno wanthu enze balala mudziko yose ya Iguputo kukafaga mapesi m’malo mwa uswa. 13 Pamwapo omwe ambawaphatisa basa mwamphanvu wale ambawachichimiza kuphata basa pakunena kuti: “Aliyese ambamalize basa yake ntsiku iriyose ninge momwe mungachitira pomwe timbakupasani uswa.” 14 Pamwapo omwe ambawaphatisa basa mwamphanvu wale wa Farao adamenya onyang’anira Aizirayeli omwe iwo adawaikha nkuwabzunza kuti: “Ndawa chani dzulo na lero mulibe kumaliza kukonza ntcherwa zomwe mudauziwa ninge mwamungachitira poyamba?”
15 Pavidateno wonyang’anira wa Aizirayeli adayenda kwa Farao kukamudadaulira kuti: “Ndawa chani atumiki wanu mukuwachitira vimwevi? 16 Ise atumiki wanu tikupasiwalini pomwe uswa, koma akutiuza kuti: ‘Konzani ntcherwa!’ ndipo akutimenya olo kuti ophonya ni wanthu wanu.” 17 Koma iye adati: “Mukuchita ulesi, mukuchita ulesi! Ndipomwapa mukunena kuti: “Tikufuna kuyenda kukapereka ntsembe kwa Yahova.’ 18 Manje ndokoni, kaphateni basa! Mupasiwelini pomwe uswa, koma chiwerengero cha ntcherwa zomwe mumbakonze chichinjelini.”
19 Pamwapo onyang’anira wa Aizirayeli adawona kuti vinthu vawaipira maninge ndawa ya vomwe adauziwa kuti: “Ayi kuchepesa olo pang’ono chiwerengero cha ntcherwa zomwe aliyese afunika kukonza ntsiku iriyose.” 20 Pavidateno onyang’anira mwawo adagumana na Mose na Aroni, omwe ambawadikhira kuti agumane nawo pomwe ambachokera kwa Farao. 21 Nthawe mwiyoletu adati: “Yahova aone vomwe mwachita ivi ndipo akuweruzeni ndawa mwachitisa kuti Farao na atumiki wake aipidwe nase,* mwakuti mwawapasa chibemba m’manja mwawo kuti atiphe.” 22 Pamwapo Mose adanyang’ana kwa Yahova nkunena kuti: “Yahova, ndawa chani mwabvuma kuti wanthu mwawa adzudzike? Ndawa chani mudanituma? 23 Kundochokera pomwe nidayenda kukayankhula na Farao mudzina yanu, iye wachitira wanthu mwawa vinthu voipa maninge, ndipo imwepo mulibe kupulumusa wanthu wanu.”