Ekisodo
4 Koma Mose adadawira kuti: “Manje peno akanikhulupirirelini na kubvera mawu yangu? Ndawa adzanene kuti: ‘Yahova alibe kuwonekera kwa iwepo.’” 2 Patsogolo pake Yahova adamubvunza kuti: Ni chani chomwe chiri m’manja mwako icho?” Mose adadawira kuti: “Ni mpsyimbo.”* 3 Pamwapo iye adati: “Iponye pasi.” Iye adaiponyadi pasi ndipo idasanduka nyoka. Pavidateno Mose adayamba kuthawa. 4 Manje Yahova adauza Mose kuti: “Iphate kunchira.” Pamwapo Mose adaiphata ndipo idasanduka pomwe mpsyimbo m’manja mwake. 5 Patsogolo pake Mulungu adati: “Ukachite vimwevi kuti akakhulupirire kuti Yahova Mulungu wa azibereki wawo, Mulungu wa Abulahamu, Mulungu wa Isaki na Mulungu wa Yakobo, wenze waonekera kwa iwepo.”
6 Yahova adamuuza pomwe kuti: “Ngenesa djanja yako m’malaya, pachifuwa.” Pamwapo Mose adangenesa djanja yake m’malaya. Koma padaibulisa, adawona kuti djanja yake mwiyo yachita khate ndipo inkuwoneka ichena maninge. 7 Manje Mulungu adati: “Ngenesa pomwe djanja yako m’malaya umo.” Pamwapo adangenesa pomwe djanja yake m’malaya. Padaibulisa adawona kuti yakhala pomwe bwinobwino ninge pakuyamba. 8 Mulungu adamuuza kuti: “Peno akakhulupirirelini panango kubvera chizindikiro choyamba akakhulupirire chizindikiro chachiwiri. 9 Koma peno akakhulupirirelini vizindikiro viwiri mwevi na kubvera mawu yako, ukatenge madzi ya mukamadzi ka Nilo nkuyathira pasi pouma. Ndipo madzi mwayo yomwe ukatenge mu kamadzi ka Nilo yadzasanduke magazi pasi mwapo.”
10 Mose adauza Yahova kuti: “Pepani Yahova, inepano niyankhula moshupikira kuchokera kalekale. Ndipo olo pano pamunkuyankhula nane ine ntumiki wanu ninkuyankhula moshupikira ndawa lirimi yangu ni yolemera.” 11 Pamwapo Yahova adamuuza kuti: “Ko ni mbani adapasa munthu pakamwa panango ni mbani yemwe anamphanvu zochitisa munthu kukhala wosayankhula, gonthi, wowona panango wosawona? Ko ndinepanolini Yahova? 12 Ndipomwapa yenda, ndipo ukambakayankhula inepano nidzakhale nawe pabodzi ndipo nidzakuuze vakuti ukanene.” 13 Koma Mose adati: “Pepani Yahova, pulizi, nyang’anani munthu munango aliyese yemwe mungafune kumutumiza.” 14 Pavidateno, Yahova adakalipa maninge ndawa ya Mose ndipo adati: “Ko pale Aroni Mlevi ule ni m’bale wakolini? Ninkudziwa kuti ayankhula bwino maninge. Komasoti iye ali munjira ankubwera kudzakuchunguzira. Akakuwona akondwe maninge muntima mwake. 15 Ndipomwapa ukayankhule naye na kumuuza vakuti akanene. Inepano nidzakhale nawe pabodzi ndipo nidzakhale pomwe na iye mukambakayankhula ndipo nidzakuuzeni vochita. 16 Iye ndiye wati ambakayankhule na wanthu m’malo mwa iwepo. Ndipomwapa adzakhale wokuyankhulira ndipo iwepo udzakhale ninge Mulungu kwa iye. 17 Mpsyimbo iyi imbakakhale m’manja mwako ndipo umbakayiphatise basa pakuchita vizindikiro.”
18 Pamwapo Mose adayenda kwa Yetero apongozi wake nkuwauza kuti: “Ninkufuna kuyenda kwa azibale wangu ku Iguputo kuti nikawone peno akali moyo.” Pamwapo, Yetero adadawira Mose kuti: Uyende bwino.” 19 Pomwe Mose wenze ku Midiyani Yahova adamuuza kuti: “Nyamuka bwerera ku Iguputo ndawa wose womwe ambafuna kukupha adafa.”
20 Pamwapo Mose adatenga nkazi wake na wana wake nkuwapakiza pabulu ndipo adayamba ulendo wobwerera ku Iguputo. Komasoti Mose adatenga mpsyimbo ya Mulungu chaiye m’manja mwake. 21 Yahova adauza pomwe Mose kuti: “Ukakafika ku Iguputo ukawonesese kuti wachita vodabwisa vose vomwe nakupasira mphanvu kuti ukachite pamaso pa Farao, koma inepano nidzabvume kuti aumise ntima wake, mwakuti adzabvumizelini wanthu wangu kuchoka. 22 Ukauze Farao kuti, Yahova wanena kuti: “Izirayeli ni mwana wangu mwamuna. Mwana wangu woyamba kubadwa. 23 Ninkukuuza kuti, bvumiza mwana wangu kuti ayende akanitumikire. Koma peno unkulamba kumubvumiza kuti ayende, nidzaphe mwana wako mwamuna woyamba kubadwa.”’”
24 Manje ali paulendo muyo, padafika pamalo yakuti agone, Yahova adagumana naye ndipo ambafuna kumupha. 25 Pavidateno, Zipora adatenga mwala wakuthwa nkumuchita mdulidwe mwana wake muyo. Ndipo khanda yomwe adagwata iyo adaithusa pasi ndipo idagwera pamapazi yake. Patsogolo pake adanena kuti: “Pakuti ndimwe nkwati wamagazi kwa ine.” 26 Padateno, Mulungu adamusiya. Pamwapo Zipora adati, “mkwati wa magazi,” ndawa ya mdulidwe muyo.
27 Pamwapo Yahova adauza Aroni kuti: “Yenda ku chipululu ukachunguzire Mose.” Pamwapo Aroni adanyamuka ndipo adagumana na Mose paphiri ya Mulungu chaiye ndipo adamumonisa nkumubejali. 28 Padagumana, Mose adauza Aroni mawu yose ya Yahova yomwe adamutuma. Adamuuza pomwe vizindikiro vose vomwe adamulamula kuti akachite. 29 Patsogolo pake Mose na Aroni adasonkhanisa akulu wose wa Aizirayeli. 30 Aroni adawauza mawu yose yomwe Yahova adauza Mose, ndipo Mose adachita vizindikiro pamaso pa wanthu mwawo. 31 Pavidateno wanthu mwawo adakhulupirira Mose. Padabva kuti Yahova ankufuna kuthandiza Aizirayeli komasoti kuti waona mabvuto yomwe ankugumana nayo, adagwada nkujolima mpakana nkhope zawo pasi.