Ekisodo
33 Yahova adapitiriza kuyankhula na Mose kuti: “Nyamuka, uchoke pano pabodzi na wanthu omwe udawatsogolera pakuchoka mudziko ya Iguputo. Muyende mudziko yomwe nidalumbira kwa Abulahamu, Isaki na Yakobo kuti: ‘Nidzapereke dziko mwiyi kwa mbadwa* zako.’ 2 Nidzatumize mngelo patsogolo panu ndipo nidzathamangise Akanani, Aamori, Ahiti, Aperezi, Ahivi na Ayebusi. 3 Muyende kudziko yoyerera nkaka na uchi. Koma ine niyendelini pakati panu, ndawa ndimwe wanthu oshupa ndipo ningakupfudzeni panjira.”
4 Wanthu padabva mawu yochitisa nkhawa mwaya, adayamba kulira ndipo palibe aliyese yemwe adavala vodzikhuzisira. 5 Yahova adauza Mose kuti: “Uza Aizirayeli kuti: ‘Imwepo ndimwe wanthu oshupa. Ningangene pakati panu nkukupfudzani mu kanthawe kang’onong’ono. Ndipomwapa ayi kuvala vodzikhuzisira pomwe nikuganizira vomwe nikuchiteni.’” 6 Pamwapo Aizirayeli alibe kuvala pomwe* vodzikhuzisira kuyambira pomwe adachoka paphiri ya Horebe nkupitiriza ulendo wawo.
7 Manje Mose adatenga tenti yake nkuyenda kukaimanga kunja kwa nsasa, pataliko na nsasa muyo ndipo tenti mwiyo adaipasa dzina yakuti chihema chogumanako. Aliyese yemwe ambafuna kubvunza malangizo kwa Yahova ambayenda kuchihema chogumanako chomwe chenze kunja kwa nsasa. 8 Manje Mose akambayenda kuchihema muko, munthu aliyese ambaimirira pansuwo wa tenti yake nkumbanyang’anisisa Mose mpakana kungena muchihema mwicho. 9 Mose akandongena muchihema mwicho, chipilala cha ntambo chimbabuluka nkuima pansuwo wa chihema mwicho panthawe yomwe Mulungu ambayankhula na Mose. 10 Wanthu wose akaona kuti chipilala cha ntambo chaima pansuwo wa chihema, aliyese ambagwada pansuwo wa tenti yake. 11 Yahova ambayankhula na Mose maso na maso, ninge momwe munthu ayankhulira na munthu munzake. Mose akambabwerera kunsasa, ntumiki wake Yoswa, mwana wa Nuni, ambachokalini kuchihema muko.
12 Manje Mose adauza Yahova kuti: “Imwepo mukuniuza kuti: ‘Tsogolera wanthu mwawa,’ koma mulibe kunidziwisa yemwe mudzamutume kuti niyende naye. Komasoti mwanena kuti: ‘Ninkukudziwa bwino na dzina yako kubodzi,* ndipo nakukomera ntima.’ 13 Manje peno mwanikomeradi ntima, pulizi nidziwiseni njira zanu kuti nikudziweni komasoti kuti mupitirize kunikomera ntima. Kumbukirani pomwe kuti ntundu uyu ni wanthu wanu.” 14 Pamwapo Mulungu adati: “Inepano niyende nawe ndipo nidzakupase mpumulo.” 15 Patsogolo pake Mose adati: “Peno imwepo muyendelini nase pabodzi, ayi kutiuza kuti tichoke pano. 16 Peno muyendelini nase pabodzi, ko wanthu adziwe tani kuti inepano na wanthu wanu awa mwatikomera ntima? Koma mukayenda nase pabodzi, muwonese kuti inepano na wanthu wanu awa mwatisiyanisa na wanthu anango wose omwe ali padziko yapasi.”
17 Yahova adapitiriza kuuza Mose kuti: “Nichite pomwe vomwe wanikumbira ivi, ndawa nakukomera ntima ndipo ninkukudziwa bwino, na dzina yako kubodzi.” 18 Patsogolo pake Mose adati: “Pulizi niwoneseni ulemerero wanu.” 19 Koma Mulungu adati: “Inepano nidzakuwonese ubwino wangu wose, ndipo nidzalengeze dzina yangu yakuti Yahova kwa iwepo. Yemwe ninkufuna kudzamukomera ntima nidzamukomere ntima, ndipo yemwe ninkufuna kudzamuchitira chifundo, nidzamuchitire chifundo.” 20 Manje adaingizira pomwe kuti: “Ungakwaniselini kuwona nkhope yangu, ndawa palibe munthu yemwe anganiwone nkupitiriza kukhala na moyo.”
21 Yahova adanena pomwe kuti: “Pali malo pafupi na inepano, ndipo ukaime pamwala. 22 Ulemerero wangu ukambadzapita pafupi na iwepo, nidzakuikhe kumphako kwa mwala muyo, ndipo nidzakubise na djanja yangu mpakana nidzapite. 23 Patsogolo pake nidzachose djanja yangu, ndipo udzawone nsana wangu, koma nkhope yangu ungaiwonelini.”