Ekisodo

32 Mose ali m’phiri mumo, wanthu wose adaona kuti akuchedwa kubuluka. Pamwapo wanthu mwawo adasonkhana kwa Aroni nkumuuza kuti: “Tikonzere mulungu wakuti atitsogolere, ndawa tikudziwalini vomwe vachitikira Mose, yemwe ambatitsogolera pakuchoka ku Iguputo.” 2 Manje Aroni adawauza kuti: “Tengani mphete zagolide zomwe akazi wanu, wana wanu amuna na wana wanu akazi avala, ndipo mubwere nazo kwa inepano.” 3 Pamwapo wanthu wose adayamba kuvula mphete zawo za golide zomwe adavala nkuzipereka kwa Aroni. 4 Patsogolo pake iye adatambira golide muyo kuchokera kwa wanthu mwawo ndipo pakuphatisa basa chosemera, adakonza fano* ya mwana wa ng’ombe. Pavidateno iwo adayamba kunena kuti: “Uyu ni Mulungu wanu, imwepo Aizirayeli, yemwe adakubulisani mudziko ya Iguputo.”

5 Aroni padaona vimwevi, adamanga guwa yantsembe patsogolo pa fano mwiyo. Patsogolo pake iye adakuwa kuti: “Mangwana kuli chikondwerero cha Yahova.” 6 Manje mangwana yake, wanthu mwawo adamuka machibese maninge nkuyamba kupereka ntsembe zoshoka na zambverano. Padateno, iwo adakhala pasi ndipo adadya na kumwa. Patsogolo pake adaimirira nkuyamba kukondwa.

7 Manje Yahova adauza Mose kuti: “Yenda, buluka, ndawa wanthu wako omwe udawatsogolera pakuchoka mudziko ya Iguputo wale achita vinthu voipa. 8 Apatuka mwakankulumize panjira yomwe nidawalamula kuti ambafambemo. Iwo adzikonzera fano* ya mwana wang’ombe. Akuigwadira na kupereka ntsembe kwa fano mwiyo ndipo akunena kuti: ‘Imwe Aizirayeli, uyu ni Mulungu wanu yemwe adakutsogolerani pakuchoka mudziko ya Iguputo.’” 9 Yahova adapitiriza kuuza Mose kuti: “Naona kuti wanthu mwawa ni woshupa. 10 Nisiye kuti ukali wangu uwagakire ndipo uwapfudze, koma iwepo nikuchitise kuti ukhale ntundu ukulu.”

11 Patsogolo pake Mose adagwigwirira Yahova Mulungu wake kuti: “Ndawa chani imwepo Yahova mukufuna kuti ukali wanu ugakire wanthu wanu, patsogolo pakuti mwawachosa mudziko ya Iguputo pakuphatisa basa mphanvu ikulu na djanja yamphanvu? 12 Mukawadzonga, Aiguputo anene kuti: ‘Wenze na cholinga choipa pakuwachosa mudziko ino. Iye ambafuna kuti akawaphe kumapiri nkuwapfudza padziko yapasi.’ Bwezani ukali wanu wogaka moto muyo, ndipo chinjani maganizo yanu yofuna kubweresera wanthu wanu tsoka mweyi. 13 Kumbukirani Abulahamu, Isaki na Izirayeli atumiki wanu, omwe mudawalumbirira pakuwauza kuti: ‘Nidzawandise mbadwa* zanu ninge nyenyezi zakudzulu ndipo dziko yose yomwe naisankhula, nidzaipereke kwa mbadwa* zanu, kuti ikhale yawo mpakana kalekale.’”

14 Pamwapo Yahova adachinja maganizo yake ndipo alibe kudzonga wanthu wake ninge momwe adanenera.

15 Patsogolo pake Mose adachungunuka nkubuluka m’phiri mumo ali nyamule minyala yosema ya Umboni m’manja mwake. Paminyala mwayo adanembapo mawu mbali zose ziwiri. Adayanemba seri na seri. 16 Minyala mwayo yadakonzewa na Mulungu, ndipo mawu mwayo yadanembewapo na Mulungu mochita kugoba. 17 Yoswa padabva zungo ya kukuwa kwa wanthu, adauza Mose kuti: “Kukubveka zungo yankhondo kunsasa.” 18 Koma Mose adati:

19 Mose padasala pang’ono kufika munsasa muyo nkuwona mwana wa ng’ombe na wanthu akuvina, adakalipa maninge ndipo adaponya pasi minyala yale nkuyaphwanya ali m’nyantsi mwa phiri. 20 Manje adatenga mwana wang’ombe yemwe iwo adamukonza nkumushoka pamoto, patsogolo pake adamugayagaya kuti akhale pfumbi. Padateno adamwaza pfumbi mwiyo pamadzi ndipo adalamula Aizirayeli kuti amwe. 21 Patsogolo pake Mose adabvunza Aroni kuti: “Ko wanthu mwawa akuchitira chani kuti uwabweresere chimo ikulu tene?” 22 Manje Aroni adadawira kuti: “Ayi kukalipa mbuya wangu. Imwepo mukudziwa bwino kuti wanthu mwawa akonda kuchita vinthu voipa. 23 Pamwapo adaniuza kuti: ‘Tikonzere mulungu wakuti atitsogolere, ndawa tikudziwalini vomwe vachitikira Mose, yemwe ambatitsogolera pakuchoka ku Iguputo.’ 24 Manje nidawauza kuti: ‘Aliyese yemwe wavala chinthu cha golide avule nkunipasa.’ Patsogolo pake golide muyo nidauponya pamoto nkukhala mwana wa ng’ombe muyu.”

25 Mose adaona kuti wanthu mwawa ambachita vinthu virivose vomwe ambafuna, ndawa Aroni alibe kuwalambiza ndipo adachita vinthu vochitisa manyazi pamaso pa azondi wawo. 26 Manje Mose adaimirira pansuwo wa nsasa muyo ndipo adati: “Ni mbani ali kumbali ya Yahova? Abwere kwa inepano!” Ndipo Alevi wose adayenda kwa Mose. 27 Patsogolo pake iye adawauza kuti: “Yahova Mulungu wa Izirayeli wanena kuti: ‘Aliyese wa imwepo amange chibemba chake m’chiuno. Manje mupite na nkati mwa nsasa kuchokera pansuwo unango mpakana kukafika pansuwo unango, ndipo aliyese aphe m’bale wake, munthu yemwe akhala naye pafupi na munzake yemwe amukonda maninge.’” 28 Alevi adachita vomwe Mose adawauza. Ndipomwapa pantsiku mwiyo amuna othamangira 3000 adaphewa. 29 Pavidateno Mose adati: “Dzicheneseni* kuti mutumikire Yahova lero, ndawa aliyese wa imwepo wapha mwana wake na m’bale wake ndipo lero Mulungu akudaliseni.”

30 Mangwana yake Mose adauza wanthu mwawo kuti: “Mwachita chimo ikulu maninge. Ndipomwapa nikuyenda kuphiri ya Yahova kuti panango nikamugwigwirire kuti akukhululukireni chimo yanu.” 31 Manje Mose adabwerera kwa Yahova nkunena kuti: “Wanthu awa achita chimo ikulu. Adzikonzera mulungu wagolide! 32 Peno mukufuna, akhululukireni chimo yawo. Koma peno mukufunalini, pulizi nipfudzeni mu bukhu yanu yomwe mwanemba.” 33 Koma Yahova adauza Mose kuti: “Yemwe wanichimwira ndiye wati nimupfudze mu bukhu yangu. 34 Manje yenda uwatsogolere wanthu mwawo kumalo yomwe nakuuza. Ona! Mngelo wangu wakhala patsogolo panu, ndipo pantsiku yomwe nidzapereke chilango, nidzawalange ndawa ya chimo yawo.” 35 Manje Yahova adagwesera wanthu mwawo muliri ndawa ya mwana wa ng’ombe yemwe iwo adakonza kupitira mwa Aroni.