Ekisodo

34 Patsogolo pake Yahova adauza Mose kuti: “Sema minyala yawiri yolingana na yoyamba yale, ndipo inepano nidzanembe paminyala mwayo mawu yomwe yenze paminyala yoyamba yale, yomwe iwepo udaphwanya. 2 Ndipo ukonzeke kuti mangwana machibese ukakwere phiri ya Sinai nkukakhala pamaso pangu kumuko padzulu pa phiri mwiyo. 3 Koma ayi kukwera m’phiri mumo na munthu munango, ndipo ayi kuti mugumanike munthu aliyese mumo. Olo nkhosa panango ng’ombe ayi kuti zidyere m’nyantsi mwa phiri mwiyo.”

4 Pamwapo Mose adasema minyala yawiri yolingana na yoyamba yale, ndipo adamuka machibesebese nkukwera m’phiri ya Sinai ali nyamule minyala yawiri mwayo m’manja mwake, mobverana na vomwe Yahova adamulamula. 5 Patsogolo pake Yahova adabuluka muntambo nkuimirira pafupi na Mose ndipo adalengeza va dzina yake yakuti Yahova. 6 Manje Yahova adagwata pamaso pa Mose ankulengeza kuti: “Yahova, Yahova, Mulungu wachifundo na wabwino ntima, wosakalipa kamangu komasoti wachikondi chokhulupirika na chonadi.* 7 Awonesa chikondi chokhulupirika kwa mibadwo mamidyau yazinji, akhululukira vophonya na machimo, koma adzalekererelini wophonya ne kumulanga. Alanga wana, azizukulu na wana wa azizukulu mwawo ndawa ya vophonya va ababa wawo.”

8 Nthawe mwiyo Mose adagwada nkujolimira pasi. 9 Patsogolo pake iye adati: “Manje peno mwanikomeradi ntima, imwepo Yahova, pulizi Yahova, muyende nase pabodzi ndipo mukhale pakati pathu, olo kuti ndise akambulamatu. Mutikhululukire pomwe vophonya vathu na machimo yathu, ndipo mutitenge kuti tikhale chuma chanu.” 10 Mulungu adadawira kuti: “Inepano ninkuchita namwe pangano iyi: Nidzachite vinthu vodabwisa pamaso pa wanthu wako wose, vomwe vikalibe vachitikako padziko yose yapasi panango pakati pa makhaindi yose. Ndipo wanthu wose okuzungulirani adzawonedi basa za Yahova, ndawa nidzakuchitireni chinthu chopasa mantha.

11 Koma imwepo mutetekere bwinobwino vomwe nikukulamulani lero. Inepano ninkuthamangisa pamaso panu Aamori, Akanani, Ahiti, Aperezi, Ahivi na Ayebusi. 12 Samalani kuti osati muchite pangano na wanthu wa mudziko yomwe munkuyenda, kugopera kuti ungakhale nsampha kwa imwepo. 13 Koma maguwa yawo yantsembe mukayagwese, vipilala vawo vopatulika mukaviphwanye ndipo mizati* yawo yopatulika mukayagwate. 14 Ayi kugwadira mulungu munango, ndawa Yahova afuna kuti wanthu ambadzipereke kwa iye yekha basi.* Iye ni Mulungu yemwe afuna kuti wanthu ambadzipereke kwa iye yekha.* 15 Samalani kuti osati muchite pangano na wanthu okhala m’dziko mumo, ndawa akambachita uhule na milungu yawo komasoti kupereka ntsembe kwa milungu yawo, munango adzakuchemerereni kumuyi kwake ndipo imwembo mudzadye ntsembe yake. 16 Patsogolo pake mudzatengedi wana wawo anango akazi kuti akhale akazi wa wana wanu amuna. Ndipo wana wawo akazi adzachite uhule na milungu yawo nkuchitisa wana wanu amuna kuchita uhule na milungu yawo.

17 Ayi kukonza milungu yachisimbi chosungunula.

18 Mumbachite Chikondwerero cha Mikate Yalibe Vofufumisa. Mobverana na vomwe nidakulamulani, mumbadye mikate yalibe vofufumisa kwa ntsiku 7 m’mwezi wa Abibu* panthawe yomwe idaikhiwiratu, ndawa mudachoka mu Iguputo m’mwezi wa Abibu.

19 Mwana aliyese mwamuna woyamba kubadwa* ni wangu, kuphatanidzapo mwana woyamba kubadwa wa vipfuwo vanu vose, peno ni mwana woyamba kubadwa wa ng’ombe panango wa nkhosa. 20 Mwana woyamba kubadwa wa bulu mumbamuwombole na nkhosa. Koma peno mungamuwombolelini, mumbamuponyongole khosi. Ndipo mumbawombole mwana wanu mwamuna aliyese woyamba kubadwa. Palibe yemwe afunika kubwera kwa inepano alibe chinthu.*

21 Mumbaphate basa zanu kwa ntsiku 6, koma pantsiku yachi 7 mumbapumule.* Olo ikhale nthawe yolima na yokolola mumbapumule.

22 Mumbachite Chikondwerero cha Masatade,* ndipo pakuchita chikondwerero chimwicho mumbapereke tirigu woyamba kukhuma pa tirigu yemwe mwakolola. Kumapeto kwa gole mumbachite Chikondwerero cha vokolola.*

23 Katatu pagole, mwamuna aliyese pakati panu ambawonekere pamaso pa Ambuya chaiye Yahova, Mulungu wa Izirayeli. 24 Makhaindi yose ya wanthu nidzayathamangisire kutali na imwepo, ndipo nidzakulise dera yanu. Palibe aliyese yemwe adzakhumbire dziko yanu mukayenda kukaona nkhope ya Yahova Mulungu wanu katatu pagole.

25 Mukambapereka magazi ya ntsembe yangu, ayi kumbapereka pabodzi na chirichose chokhala na vofufumisa. Ayi kumbasunga ntsembe ya chikondwerero cha Pasika mpakana machibese.

26 Vipaso voyamba kukhuma vabwino maninge va m’munda mwanu mumbavibwerese kunyumba ya Yahova Mulungu wanu.

Ayi kumbaphika mwana wambuzi munkaka wa mayi wake.”

27 Yahova adapitiriza kuuza Mose kuti: “Unembe mawu mwaya ndawa inepano nikuchita pangano na iwepo komasoti na Izirayeli mobverana na mawu mwaya.” 28 Pamwapo Mose adapitiriza kukhala m’phiri na Yahova kwa ntsiku 40, usiku na masikati. Iye alibe kudya nkate panango kumwa madzi. Ndipo Mulungu adanemba mawu ya pangano, Malamulo Khumi,* paminyala mwayo yosema.

29 Manje Mose adabuluka m’phiri ya Sinai ali takule minyala yawiri ya Umboni yale m’manja mwake. Pambabuluka m’phiri mumo, Mose ambadziwalini kuti nkhope yake imbagwerewera ndawa yakuti ambayankhula na Mulungu. 30 Aroni na Aizirayeli wose padaona Mose, adaona kuti nkhope yake ikugwerewera ndipo adagopa kumufenderera.

31 Koma Mose adawachemera. Pamwapo Aroni na atsogoleri wose wa gulu ya Izirayeli adayenda kwa iye, ndipo Mose adayankhula nawo. 32 Patsogolo pake Aizirayeli wose adamufenderera, ndipo iye adawauza malamulo yose yomwe Yahova adamupasa m’phiri ya Sinai. 33 Mose akamaliza kuyankhula nawo ambaikha chinthu chobisa nkhope yake. 34 Koma Mose akambangena muchihema chogumanako kukaonekera kwa Yahova kuti ayankhule naye, ambachosa chinthu chobisa nkhope yake mpakana abulemo. Patsogolo pake ambayenda kwa Aizirayeli nkuwauza vomwe walamuliwa. 35 Ndipo Aizirayeli adaona kuti nkhope ya Mose ikugwerewera. Manje Mose adabisa pomwe nkhope yake mpakana pomwe adabwerera kukayankhula na Mulungu.