Ekisodo
27 Ukonze guwa yantsembe ya matabwa ya akasiya, ntalintali mwake ikhale na mametro yawiri,* ndipo mfupimfupi mwake ikhale pomwe na mametro yawiri. Guwa mwiyo ikhale saizi ibodzi mbali zake zose zinayi, ndipo kutalimpha kwake kuchokera pasi mpakana padzulu ikhale 134 sentimetro. 2 Ukonze minyanga yanayi m’makhona yake. Nyanga mwizo zitulukire m’makhona mwayo ndipo uzipalangire kobre.* 3 Patsogolo pake ukonze vombo vake vochosera dotha,* mafosholo yake, mbale zake zonoka, magarfu yakuluyakulu na vopalira moto vake. Vombo vake vose uvikonze na kobre. 4 Ukonze pomwe chosasikira nyama cha visimbi va kobre vopiringishanapiringishana, ndipo pa chosasikira nyama mwicho ukonzepo vizerenga vinayi va kobre m’makhona yake yanayi. 5 Uikhe chosasikira nyama mwicho pakati pa guwa yantsembe, m’nyantsi mwa nkombero. 6 Guwa mwiyo uikonzere tumiti tonyamulira twa muti wa akasiya ndipo utupalangire kobre. 7 Tumiti tonyamulira muto umbatungenese mu vizerenga mwivo m’mbali zose ziwiri za guwa mwiyo pakuinyamula. 8 Ukonze bokosi ya matabwa yosafunga kuntsi. Uikonze mobverana na momwe nakuonesera m’phiri.
9 Ukonze malo kunja kwachihema. Ku mbali yaku sul, malo mwayo uyakonzere mpanda wa nguwo za usalu woposa wabwino maninge. Mpanda muyo ukhale 45 metro ntalintali mwake kumbali ibodzi mwiyo. 10 Ukonze pomwe vipilala vake 20 na visimbi 20 va kobre vokhazikapo vipilala mwivo. Tusimbi twa vipilala tokolowekapo nguwo na tolamatidzirapo twake tukhale twa siliva. 11 Nguwo ya mbali yaku sul kwa mpanda muyo ikhale 45 metro ntalintali mwake, ndipo kukhale vipilala 20 na visimbi 20 va kobre vokhazikapo vipilala mwivo. Tusimbi tokolowekapo nguwo na tolamatidzira twake tukhale twa siliva. 12 Mfupimfupi mwa malo mwayo, kumbali ya kumaulo, mpanda wa nguwo muyo kutalimpha kwake ukhale 23 metro, ndipo ukhale na vipilala 10 na visimbi 10 vokhazikapo vipilala mwivo. 13 Ndipo mfupimfupi mwa malo mwayo kumbali ya kumachibese, kochokera dzuwa, kukhale 23 metro. 14 Mbali ya kumakulu ya nsuwo wa mpanda wa nguwo muyo ukhale 7 metro kutalimpha kwake. Kukhale vipilala vitatu na visimbi vitatu vokhazikapo vipilala mwivo. 15 Ndipo kumadzere kwa nsuwo wa mpanda wa nguwo muyo ukhale 7 metro. Kukhale vipilala vitatu na visimbi vitatu vokhazikapo vipilala mwivo.
16 Pansuwo wa mpanda muyo pakhale nguwo yosona yokwana 9 metro ntalintali mwake. Ikhale ya usalu wagirini, ukuse wa nkhosa wapsupsupsu,* usalu ufuwira maninge na usalu woposa wabwino maninge. Pakhale vipilala vinayi na visimbi vinayi vokhazikapo vipilala mwivo. 17 Vipilala vose kuzungulila malo yose mwayo vikhale na tolumatidzira twa siliva, ndipo tusimbi tokolowekapo nguwo tukhale pomwe twa siliva, koma visimbi vokhazikapo vipilala mwivo vikhale va kobre. 18 Mpanda muyo ntalintali mwake ukhale 45 metro, mfupimfupi mwake 23 metro, ndipo kutalimpha kwake kuchokera pasi mpakana padzulu ukhale mametro yatatu. Nguwo zake zikhale za usalu woposa wabwino maninge, ndipo visimbi vake vokhazikapo vipilala vikhale va kobre. 19 Vombo vose vophatisa basa pa utumiki wose wa pachihema, nkhokho zake zose na nkhokho zose za nguwo ya mpanda wa malo mwayo zikhale za kobre.
20 Ulamule Aizirayeli kuti akunyang’anire mafuta yonunkhira yabwino maninge ya maolivi, kuti makandyero yambagake nthawe zose. 21 Muchihema chogumanako,* kunja kwa nguwo yogwatiza yomwe iri pafupi na Umboni, Aroni na wana wake ambaonesese kuti makandyero yakugaka pamaso pa Yahova, kuchokera kumaulo mpakana machibese. Mwiyi ni lamulo kwa Aizirayeli kuti ambachite vimwevi mpakana kalekale.”