Ekisodo

26 Ukonze chihema pakuphatisira basa nguwo 10 zokonzera tenti. Nguwo mwizo zikhale na usalu woposa wabwino maninge, usalu wagirini,* ukuse wa nkhosa wapsupsupsu na usalu ufuwira wabwino maninge. Panguwo mwizo ulukepo akerubi. 2 Nguwo iriyose ikhale 13 metro* ntalintali ndipo mfupimfupi mwake ikhale mametro yawiri. Nguwo zose zikhale za saizi ibodzi. 3 Uphatanidze nguwo 5 kuti zikhale nguwo ibodzi ikulu ndipo muchite chibodzibodzi na nguwo 5 zinango izo. 4 Kumapeto kwa nguwo ibodzi ikulu, ukonze vingwe voposa vagirini vokolowekapo ngoloweko. Uchite pomwe chibodzibodzi kumapeto kwa nguwo inango, pamalo pomwe nguwo ziwiri zidzalumatidzane. 5 Uikhe vingwe voposa vokwana 50 vokolowekamo ngoloweko panguwo ibodzi, ndipo uikhe pomwe vingwe voposa vokwana 50 vokolowekamo ngoloweko m’mphepete mwa nguwo inango iyo kuti vikhale vonyang’anana pamalo yolumatidzirana. 6 Ukonze pomwe ngoloweko 50 zagolide nkuzilumatidza na nguwo za tenti zire na ngoloweko mwizo kuti nguwo mwizo zikhale chinguwo chibodzi chokonzera chihema.

7 Ukonze pomwe nguwo za ukuse wa mbuzi zofunikizira padzulu pa chihema mwicho. Nguwo mwizo zikhalepo zokwana 11. 8 Nguwo iriyose ikhale mametro 13 mtalimtali na mametro yawiri mfupimfupi. Nguwo zose 11 zikhale saizi ibodzi. 9 Ulumatidze nguwo 5 komasoti ulumatidze nguwo 6, patsogolo pake upete nguwo yachi 6 yomwe iri kutsogolo kwa nguwo zolumatidza izo. 10 Uikhe vingwe voposa vokwana 50 vokolowekamo ngoloweko m’mphepete mwa nguwo ya kumapeto chaiko kwa nguwo zachihema zolumatidzana izo. Uikhe pomwe vingwe voposa vokwana 50 vokolowekamo ngoloweko m’mphepete mwa nguwo zinango zolumatidzana, pamalo pomwe padzagumane magulu yawiri ya nguwo zolumatidzana. 11 Ukonze ngoloweko 50 za kobre nkuzingenesa mu vingwe voposa vokolowekamo ngoloweko mwizo, nkulumatidza nguwo mwizo kuti chikhale chinguwo chibodzi chokonzera chihema. 12 Kumbuyo kwa chihema mwicho nguwo ikhalire. Manje hafu ya nguwo yomwe ikhalire iyo imbzere mpakana m’nyantsi. 13 Ndipo kumbali iriyose ntalintali mwa chinguwo mwicho, mukhale nguwo yokwana 45 sentimetro. Nguwo mwiyo yati ikhalire imbambzere mpakana m’nyantsi kuti ifunikize chihema mwicho.

14 Utenge pomwe chofunikizira chihema mwicho cha vikumba va nkhosa vovuwika mu tinta ifuwira na chofunikiza chinango padzulu pake cha vikumba va akatumbu.

15 Ukonze maferemu yoimisa ya chihema ya matabwa ya akasiya. 16 Feremu iriyose ikhale mametro 4 ntalintali mwake, ndipo mfupimfupi mwake ikhale 70 sentimetro. 17 Feremu iriyose ikhale na volumatidzira viwiri vofendererana. Maferemu yose ya muchihema uyakonze teno. 18 Ukonze maferemu 20 mbali ya ku sul* ya chihema mwicho.

19 Ukonze visimbi 40 vasiliva vokhazikapo maferemu 20 yale. Visimbi viwiri vikhale pasi pa feremu iriyose kuti mungene volumatidzira viwiri. 20 Kumbali inango ya chihema mwicho, mbali ya ku norte* kukhale maferemu 20, 21 na visimbi vake 40 vasiliva vokhazikapo maferemu. Visimbi viwiri vikhale pasi pa feremu iriyose. 22 Ukonze maferemu 6 nkuyaikha kumbuyo kwa chihema mwicho, mbali ya kumaulo. 23 Patsogolo pake ukonze maferemu yawiri kuti yakhale yodjirikirira m’makhona yawiri kumbuyo kwa chihema mwicho. 24 Maferemu mwayo yakhale na matabwa yawiri yophatanidza kuyambira pasi mpakana padzulu. Matabwa mwayo yalumatidzane pa chizerenga choyamba. Maferemu yawiri mwayo yakonzewe molingana ndipo yakhale yodjirikirira m’makhona. 25 Pakhale maferemu 8 na visimbi 16 vasiliva vokhazikapo maferemu. Visimbi viwiri vikhale pasi pa feremu iriyose.

26 Ukonze pomwe tumiti twa muti wa akasiya, tumiti 5 tukhale twa maferemu ya mbali ibodzi ya chihema. 27 Tumiti 5 tukhale twa maferemu ya mbali inango ya chihema, ndipo tumiti tunango pomwe 5 tukhale twa maferemu yakumbuyo kwa chihema, mbali yakumaulo. 28 Kamuti komwe kankupita pakati pa maferemu yose kayambire kumayambiriro mpakana kumapeto.

29 Maferemu mwayo uyapalangire golide, ndipo vizerenga vake vongenesamo tumiti uvikonze na golide. Tumiti muto utupalangire golide. 30 Ukonze chihema mwicho mobverana na pulani yake yomwe nakuwonesa m’phiri.

31 Ukonze nguwo* yogwatiza pakati ya usalu wagirini, ya ukuse wa nkhosa wapsupsupsu, usalu wofuwira maninge na usalu woposa wabwino maninge. Pa nguwo mwiyo mulukepo akerubi. 32 Nguwo mwiyi uimanike pa vipilala vinayi va muti wa akasiya vopalangiwa golide. Tusimbi tokoloweka nguwo mwiyi tukhale twa golide. Vipilala vimwevi vikhale pavisimbi vinayi vasiliva. 33 Nguwo mwiyi uimanike m’nyantsi mwa ngoloweko zolumatidza ku nguwo zapadzulu pa chihema, ndipo uikhe likasa ya Umboni kuseri kwa nguwo mweyi. Nguwo mweyi ikhale malire ya Malo Yochena na Malo Yochena Maninge. 34 Ukachita teno uikhe chobwinikirira padzulu pa likasa ya Umboni m’Malo Yochena Maninge.

35 Uikhe meza kunja kwa nguwo. Uikhe pomwe choikhapo kandyero monyang’anizana na meza kumbali ya ku sul ya chihema mwicho. Koma meza mwiyo uyiikhe kumbali ya ku norte. 36 Manje ukonze nguwo yofungira* pansuwo wa chihema. Nguwo mwiyo ikhale ya usalu wagirini, ukuse wa nkhosa wapsupsupsu, usalu ufuwira maninge na usalu woposa wabwino maninge. 37 Nguwo yofungira* pansuwo pa chihema uikonzere vipilala 5 va muti wa akasiya vopalangiwa golide. Tusimbi tokolowekapo nguwo mwiyo tukhale twagolide. Ndipo ukonze visimbi 5 va kobre vokhazikapo vipilala mwivo.”