Ekisodo

28 “Pakati pa Aizirayeli, usankhulepo Aroni m’bale wako pabodzi na wana wake Nadabu, Abihu, Eleazara na Itamara kuti atumikire ninge antsembe wangu. 2 M’bale wako Aroni umukonzere vovala vopatulika kuti vimupase ulemerero na kumukhuzisa. 3 Uyankhule na wanthu wose wabuya* omwe nidawapasa mzimu wanzeru. Wanthu mwawo amukonzere Aroni vovala vomwe vimbamuwonese kuti wachenesewa, kuti atumikire ninge wantsembe wangu.

4 Vovala vakuti akonze ni ivi: chovala pachifuwa, efodi, malaya yakunja yalibe manja, mkhanjo wamizera yogwatisagwatisa, duku na bande yapamimba. Aroni m’bale wako na wana wake awakonzere vovala vopatulika vimwevi, kuti atumikire ninge antsembe wangu. 5 Wanthu wabuya mwawo aphatise basa golide, usalu wagirini, ukuse wa nkhosa wapsupsupsu, usalu ufuwira maninge na nguwo zabwino maninge.

6 Akonze efodi woluka na golide, usalu wa girini, ukuse wa nkhosa wapsupsupsu, usalu ufuwira maninge na usalu woposa wabwino maninge. 7 Efodi muyo akhale na nguwo ziwiri zomwe zipita na m’mapewa ndipo aziphatanidze kumbuyo na kutsogolo. 8 Bande yosona* yomangira efodi, yolumatidza ku efodi muyo ikhale yokonzewa na nguwo mwiyo ya efodi. Ikhale yokonzewa na golide, usalu wagirini, ukuse wa nkhosa wapsupsupsu, usalu wofuwira maninge na usalu woposa wabwino maninge.

9 Utenge minyala ya onekisi nkunembapo madzina ya wana wa Izirayeli mochita kugoba. 10 Madzina 6 uyanembe pamwala ubodzi ndipo madzina yanango 6 uyanembe pamwala unango motewedza momwe adabadwira. 11 Mmisiri wogoba agobe madzina ya wana wa Izirayeli pa minyala yawiri mwayo ninge momwe agobera chidindo. Patsogolo pake minyala mwayo yadzaikhiwe mu voikhamo vake va golide. 12 Udzangenese minyala yawiri mwayo pa nguwo za m’mapewa za efodi kuti yakhale minyala yachikumbuso cha wana wa Izirayeli. Pakukaonekera kwa Yahova, Aroni ambanyamule madzina yawo pa nguwo ziwiri za m’mapewa yake kuti chikhale chikumbuso. 13 Ukonze voikhamo minyala vagolide, 14 na minyala yawiri ya golide wosefeka bwino. Uyakonze ninge vingwe voposa mwaluso, ndipo ulumatidze matcheni yokhala ninge vingwe mwivo ku voikhamo minyala.

15 Uuze munthu waluso yoluka kuti akonze chovala pachifuwa chachiweruzo ndipo achikonze mwaluso molingana na efodi. Achikonze na golide, usalu wagirini, ukuse wa nkhosa wapsupsupsu, usalu ufuwira maninge na usalu woposa wabwino maninge. 16 Ukachipeta pakati mbali zose zinayi zimbakhale zolingana, ntalintali mwake chikhale 22 sentimetro* ndipo mfupimfupi mwake chikhale 22 sentimetro. 17 Uikhepo minyala ndipo yakhale mizera yanayi. Mzera woyamba ukhale na minyala ya rube, topazi na emarodi. 18 Mzera wachiwiri ukhale na minyala ya nofeki, safiro na yasipi. 19 Mzera wachitatu ukhale na minyala ya lesemu,* agate na ametusito. 20 Mzera wachinayi ukhale na minyala ya kulusolito, onekisi na yade. Ndipo yaikhiwe mu voikhamo minyala vagolide. 21 Minyala mwayo uyaikhe mobverana na madzina 12 ya wana wa Izirayeli. Mwala uliwose aunembe mochita kugoba ninge momwe agobera chidindo ndipo mwala uliwose ukhale na dzina ibodzi pa madzina ya madzinza 12.

22 Pa chovala pachifuwa ukonzepo matcheni ya golide wosefeka bwino, yokhala ninge vingwe voposa. 23 Ukonze vizerenga viwiri vagolide nkuviikha pa chovala pachifuwa. Vizerenga viwiri mwivo uviikhe m’makhona yawiri ya chovala pachifuwa mwicho. 24 Ungenese vingwe viwiri vagolide vire mu vizerenga viwiri vomwe viri m’makhona ya chovala pachifuwa. 25 Ungenese vingwe viwiri mwivo pa voikhamo minyala vomwe viri pa nguwo za m’mapewa za efodi kutsogolo. 26 Ukonze vizerenga viwiri vagolide nkuviikha m’makhona yawiri ya chovala pachifuwa kumbali yankati yogumirirana na efodi. 27 Ukonze pomwe vizerenga viwiri nkuviikha kutsogolo kwa efodi, m’nyantsi mwa nguwo ziwiri za m’mapewa, pafupi na polumatidzira, padzulu pa bande yoluka* ya efodi. 28 Chovala pachifuwa mwicho achimange na chingwe chagirini. Chingwe chimwicho chingene pa vizerenga va chovala chapachifuwa na vizerenga va efodi. Vimwevi vidzathandize kuti chovala cha pachifuwa mwicho chimbakhale chophata padzulu pa bande yoluka* ya efodi.

29 Aroni ambanyamule madzina ya wana wa Izirayeli pantima pake, pachovala pachifuwa chachiweruzo, akambangena m’Malo Yochena kuti chikhale chikumbuso pamaso pa Yahova nthawe zose. 30 Udzaikhe Urimu na Tumimu* mu chovala pachifuwa chachiweruzo, ndipo vimbakhale pantima pa Aroni akambaonekera pamaso pa Yahova. Aroni ambanyamule pantima pake vinthu vophatisa basa pakuweruza Aizirayeli akambakaonekera kwa Yahova nthawe zose.

31 Ukonze malaya yalibe manja yovala nkati mwa efodi. Uyakonze na usalu wagirini wokhawokha. 32 Malaya mwayo yakhale yofungula padzulu pake, pakati.* Pofungula mwapo pakhale popenderera m’mphepete mwake na nguwo yosona. Pakhale pofungula ninge chovala chakunkhondo chamamba yachisimbi, kuti osati ching’ambike. 33 Mumpendero wake wa m’nyantsi ukonzemo vinthu vooneka ninge makangaza* va usalu wagirini, ukuse wa nkhosa wapsupsupsu, na usalu ufuwira maninge kuzungulira mpendero muyo. 34 Uikhe bero yagolide patsogolo pake kangaza, bero yagolide patsogolo pake kangaza mpakana kuzungulira mpendero wa m’nyantsi mwa malaya yalibe manja mwayo. 35 Aroni ambavale malaya mwayo kuti atumikire, ndipo mabero mwayo yambabveke kulira iye akambangena m’malo yopatulika pamaso pa Yahova komasoti akambabula, kuti aleke kufa.

36 Ukonze pomwe kasimbi koyetimira ka golide wosefeka bwino ndipo unembepo mochita kugoba ninge momwe agobera chidindo, mawu yakuti: ‘Yahova ni Wochena.’ 37 Kasimbi mwako ukamangirire paduku na chingwe chagirini. Kambakhale patsogolo pa duku mwiyo. 38 Kasimbi kamwako kambakhale pankuma pa Aroni. Munthu akachimwira vinthu vopatulika vomwe Aizirayeli avichenesa akambavipereka ninge mphaso zopatulika, Aroni ambadawire mulandu wa chimo mwiyo. Kasimbi mwako kambakhale pankuma pake nthawe zose, kuti ambachitise wanthu kukhala obvumizika pamaso pa Yahova.

39 Usone mkhanjo wa mizera yogwatisagwatisa wa usalu wabwino maninge. Ukonze pomwe duku ya nguwo yabwino maninge komasoti uluke bande ya mkhanjo.

40 Wana wa Aroni uwakonzere pomwe mikhanjo, mabande na maduku* yomanga kunsolo kuti yawapase ulemerero na kuwakhuzisa. 41 Uvazike Aroni m’bale wako pabodzi na wana wake vinthu vimwevi. Ukateno uwadzodze, uwachenese nkuwaikha* kuti atumikire ninge antsembe wangu. 42 Uwakonzere pomwe makabudula ya nguwo yofika* mu ntchafu kuti osati ambawonerewe. 43 Aroni na wana wake ambavale makabudula mwaya pakungena muchihema chogumanako panango pakuyenda ku guwa yantsembe kukatumikira pa malo yochena kuti osati apalamule mulandu nkufa. Mwiyi ni lamulo kwa iye na mbadwa* zake mpakana kalekale.”