Ekisodo

25 Manje Yahova adauza Mose kuti: 2 “Uza Aizirayeli kuti apereke vopereka kwa inepano. Utambire vopereka vangu kwa munthu aliyese yemwe ankufunisisa kupereka. 3 Vopereka vomwe ukufunika kutambira kwa iwo ni ivi: golide, siliva kobre,* 4 usalu wagirini,* ukuse wa nkhosa wapsupsupsu, usalu ufuwira maninge, nguwo zabwino maninge na ukuse wa mbuzi. 5 Utambire pomwe vikumba va nkhosa voloweka mu tinta ifuwira, vikumba va akatumbu,* matabwa ya akasiya,* 6 mafuta ya kandyero, basamu wokonzera mafuta yodzodzera na vofukiza vonunkhira. 7 Komasoti utambire minyala ya onekisi na minyala yanango yoikha pa efodi komasoti chovala pachifuwa. 8 Munikonzere malo yopatulika, ndipo nidzakhale pakati panu. 9 Mukakonze chihema chopatulika na vombo vake vose mobverana na vomwe ninkukuonesa.

10 Mukonze likasa* ya muti wa akasiya, 110* sentimetro ntalintali, 70 sentimetro mfupimfupi na 70 sentimetro kuchokera pasi kuyenda mdzulu. 11 Patsogolo pake muipalangire na golide wosefeka bwino. Nkati na kunja muipalangire na golide, ndipo mukonze nkombero wa golide kuzungulira likasa mwiyo. 12 Muikonzere vizerenga vinayi na kuviikha padzulu pa mendo yake yanayi. Viwiri vikhale mbali ibodzi, ndipo vinango viwiri vikhale mbali inango. 13 Mukonze pomwe tumiti tonyamulira likasa mwiyo tokonzewa na muti wa akasiya nkutupalangira golide. 14 Mungenese tumiti tonyamulira muto mu vizerenga mule m’mbalim’mbali mwa Likasa kuti ambanyamulire Likasa mwiyo. 15 Tumiti tonyamulira muto tumbadzakhale m’mphepete mwa Likasa mwiyo. Tufunikalini kuchosewamo. 16 Nkati mwa Likasa mwiyo udzaikhemo Umboni womwe nidzakupase.

17 Mudzakonze chobwinikirira chagolide wosefeka bwino, 110 sentimetro ntalintali na 70 sentimetro mfupimfupi. 18 Mukonze pomwe akerubi awiri wagolide. Akhale wochita kuphula ndipo muwaikhe m’makhona yose yawiri ya chobwinikirira mwicho. 19 Kerubi m’bodzi akhale kumbali ibodzi ya chobwinikirira mwicho ndipo kerubi munango akhale kumbali inango iyo. 20 Akerubi mwawo apfuthule maphaphiro yawo nkuyakwiza mdzulu ndipo abise chobwinikirira mwicho na maphaphiro yawo. Iwo akhale monyang’anana, koma nkhope zawo zijolimire pa chobwinikirira mwicho. 21 Chobwinikirira mwicho udzachiikhe pa Likasa mwiyo, ndipo mu Likasa mumo udzaikhemo Umboni womwe nidzakupase. 22 Inepano nidzaonekere kwa iwepo pamwapo nkuyankhula nawe kuchokera padzulu pa chobwinikirira mwicho. Nidzakuuze malamulo yose yakuti ukawauze Aizirayeli kuchokera pakati pa akerubi awiri mwawo, omwe ali padzulu pa likasa ya Umboni.

23 Mukonze pomwe meza ya muti wa akasiya, 90 sentimetro ntalintali, 45 sentimetro mfupimfupi na 70 sentimetro kuchokera pasi mpakana padzulu. 24 Mudzaipalangire na golide wosefeka bwino, ndipo mudzakonze nkombero wagolide kuzungulira meza yose mwiyo. 25 Mukonze feremu kuzungulira meza yose, mpimo wake ukhale 7* sentimetro mfupimfupi mwake ndipo mukonze pomwe nkombero wagolide paferemu mwiyo. 26 Meza mwiyo muikonzere vizerenga vinayi na kuviikha m’makhona yake 4 momwe munamendo yake 4. 27 Vizerenga mwivo vikhale pafupi na feremu kuti mumbapite tumiti twa meza mwiyo. 28 Mukonze pomwe tumiti tonyamulira twa muti wa akasiya ndipo mutupalangire golide. Tumiti muto ambanyamulire meza mwiyo.

29 Mukonze pomwe mbale zake, makhapu, mitsuko na mbale zonoka zakuti ambathirire ntsembe zachakumwa. Muzikonze na golide wosefeka bwino. 30 Ndipo pa meza mwapo mumbaikhepo nkate wachiwonesero pamaso pangu nthawe zose.

31 Patsogolo pake mukonze choikhapo kandyero chagolide wosefeka bwino. Choikhapo kandyero mwicho chikhale chinthu chibodzi chochita kuphula ndipo chikhale na tsinde, mwendo, nthawi, tumasamba twa m’nyantsi mwa mafololi, mpfundo na mafololi. 32 Choikhapo kandyero mwicho chikhale na nthawi 6. Kumbali inango kukhale nthawi zitatu, ndipo kumbali inango kukhale pomwe nthawi zitatu. 33 Nthawi za mbali ibodzi, iriyose ikhale na tumasamba tutatu twa m’nyantsi mwa mafololi tokonzewa ninge mafololi ya muti wa amondi, ndipo tumasamba muto tulondolane na mpfundo na mafololi. Nthawi za mbali inango, iriyose ikhale pomwe na tumasamba tutatu twa m’nyantsi mwa mafololi tokonzewa ninge mafololi ya muti wa amondi, ndipo tumasamba muto tulondolane na mpfundo na mafololi. Nthawi 6 zophuka pa muti wa choikhapo kandyero mwicho zikhale teno. 34 Pamwendo wa choikhapo kandyero mwicho pakhale tumasamba tunayi twa m’nyantsi mwa mafololi tokonzewa ninge mafololi ya muti wa amondi, ndipo tumasamba muto tulondolane na mpfundo na mafololi. 35 Mpfundo ibodzi ikhale m’nyantsi mwa nthawi zake ziwiri zoyambirira. Mpfundo inango ikhale pomwe m’nyantsi mwa nthawi zake ziwiri, ndipo mpfundo inango ikhale m’nyantsi mwa nthawi zinango pomwe ziwiri. Vikhale teno na nthawi 6 zophukira pamwendo wa choikhapo kandyero. 36 Choikhapo kandyero chose mwicho, kuphatanidzapo mpfundo na nthawi zake, chikhale chibodzi ndipo chiphuliwe na golide wosefeka bwino. 37 Muchikonzere makandyero 7 ndipo makandyero mwayo yakagasiwa yambavunikire malo yomwe yali patsogolo pake. 38 Vobaninkhira vake vodzimwira kandyero na mbale zoikhamo dotha ya vingwe va kandyero, vikhale vagolide wosefeka bwino. 39 Choikhapo kandyero mwicho pabodzi na vombo vake vose vimwevi avikonze pakuphatisa basa golide wosefeka bwino wolemera talente ibodzi.* 40 Uwonesese kuti wavikonza pakutewedza chitsanzo chomwe waonesewa m’phiri.”