Samueli wachiwiri
8 Paidapita nthawe Davide adawina Afilisiti ndipo adatenga thaundi ya Metege-ama.
2 Davide adawina pomwe Amowabu ndipo adawagonesa pasi nkuyamba pomwe kuwapima na chingwe. Ambati akapima vingwe viwiri, wanthu mwawo ambawapha ndipo akapima chingwe chibodzi, wanthu mwawo ambawasiya na moyo. Amowabu mwawo adakhala atumiki wa Davide ndipo ambapereka mtsonkho kwa iye.
3 Davide adawina Hadadezeri, mwana wa Rehobu mpfumu ya Zoba, pomwe Hadadezeri muyo ambayenda ku kamadzi ka Firate kukabwezeresa ufumu wake. 4 Davide adaphata amuna 1700 opakira pa makavalo na masocha 20 000 yofamba pasi ya Hadadezeri. Patsogolo pake Davide adapundula* makavalo yose ya ngolo zankhondo nkundosiya makavalo 100.
5 Asiriya wa ku Damasiko padabwera kudzathandiza Hadadezeri mpfumu ya Zoba, Davide adapha Asiriya 22 000. 6 Patsogolo pake Davide adamanga miyi ya masocha mudera ya Siriya wa ku Damasiko ndipo Asiriya mwawo adakhala akapolo wa Davide mwakuti ambapereka mtsonkho kwa iye. Yahova ambathandiza Davide kuti awine kulikose komwe ambayenda. 7 Komasoti Davide adatenga vovikira* valaundi vagolide va atumiki wa Hadadezeri ndipo adayenda navo ku Yerusalemu. 8 Mpfumu Davide adatenga kobre* uzinji ku Beta na ku Berota, mathaundi ya Hadadezeri.
9 Manje Toi, mpfumu ya Hamati, adabva kuti Davide wawina gulu yose ya nkhondo ya Hadadezeri. 10 Pamwapo Toi adatuma mwana wake Yoramu kwa Mpfumu Davide kukamubvunza momwe aliri na kumutembeja ndawa yomenyana na Hadadezeri nkumuwina. (Ndawa Hadadezeri ambakonda kumenyana na Toi.) Pakuyenda kwa Davide, Yoramu adatenga vinthu vasiliva, vagolide na vakobre. 11 Mpfumu Davide idapereka vinthu vimwivi kwa Yahova pabodzi na siliva komasoti golide wochokera ku makhaindi yose yomwe adayawina. 12 Makhaindi yake yenze Asiriya, Amowabu, Aamoni, Afilisiti na Aamaleki. Adapereka pomwe vinthu vomwe adatenga kwa Hadadezeri mwana wa Rehobu mpfumu ya Zoba. 13 Komasoti Davide adabvekera maninge padabwererako komwe adapha Aedomu 18 000 muchigwa cha Munyu. 14 Davide adakonza miyi ya masocha ku Edomu. Mu Edomu mose adaikhamo miyi ya masocha, mwakuti Aedomu adakhala anyabasa wa Davide ndipo Yahova ambathandiza Davide kuti ambawine kulikose komwe wayenda.
15 Davide adapitiriza kutonga Izirayeli wose ndipo ambalimbikisa chilungamo kwa wanthu wake wose. 16 Yowabu mwana wa Zeruya wenze nkulu wa masocha ndipo Yehosafati mwana wa Ahiludi ambanemba vomwe vachitika. 17 Zadoki mwana wa Ahitubu na Ahimeleki mwana wa Abiyatara enze wantsembe, ndipo Seraya wenze wonemba. 18 Benaya mwana wa Yehoyada wenze mtsogoleri wa Akereti na Apeleti. Wana amuna wa Davide enze wapambuyo wa mpfumu.*