Samueli wachiwiri
9 Patsogolo pake Davide adabvunza kuti: “Ko pali aliyese yemwe adasala wa m’banja ya Sauli yemwe ningamuwonese chikondi chokhulupirika ndawa ya Yonatani?” 2 Manje penze munthu munango yemwe ambatumikira m’banja ya Sauli dzina yake Ziba. Pamwapo adachemerewa kuti ayende kwa Davide. Padafika, mpfumu idamubvunza kuti: “Ko ndiwe Ziba?” Iye adadawira kuti: “Inde ndine.” 3 Mpfumu idati: “Ko pali aliyese yemwe adasala wa m’banja ya Sauli yemwe ningamuwonese chikondi chokhulupirika cha Mulungu?” Ziba adadawira mpfumu kuti: “Alipo mwana mwamuna wa Yonatani, wopunduka mapazi.” 4 Patsogolo pake mpfumu idamubvunza kuti: “Ankukhala kuponi?” Ziba adadawira mpfumu kuti: “Kumuyi kwa Makiri, mwana mwamuna wa Amiyeli, ku Lo-debara.”
5 Nthawe mwiyoletu, Mpfumu Davide idatumiza wanthu kuti akamutenge kumuyi kwa Makiri, mwana wa Amiyeli, ku Lo-debara. 6 Mefiboseti mwana wa Yonatani, mwana wa Sauli, padangena n’kuona Davide, nthawe mwiyoletu adagwada nkujolima mpakana nkhope yake kufika pasi. Patsogolo pake Davide adati: “Mefiboseti!” Iye adadawira kuti: “Ine mpfumu yangu.” 7 Pamwapo Davide adamuuza kuti: “Ayi kugopa. Shuwa nikuwonese chikondi chokhulupirika ndawa ya ababa wako a Yonatani. Nikubwezere malo yose ya ambuya wako a Sauli ndipo iwepo nthawe zose umbadye pameza yangu.”
8 Mefiboseti padabva vimwivi adajolima mpakana nkhope yake kufika pasi ndipo adati: “Inepano ndinembo mbani kuti munikumbukire, mbwaya yakufa ninge ine?” 9 Pamwapo mpfumu idachemera Ziba ntumiki wa Sauli, nkumuuza kuti: “Chirichose chomwe chenze cha Sauli komasoti chomwe chenze cha wanthu wa m’banja yake, ninkuchipereka kwa mzukulu wa abwana wako. 10 Iwepo, wana wako amuna na anyabasa wako, mumbamulimire minda yake komasoti kumukololera kuti wanthu wa m’banja ya mzukulu wa abwana wako ambakhale na chakudya. Koma Mefiboseti mzukulu wa abwana wako ambadye na ine pameza pangu nthawe zose.”
Ziba wenze na wana amuna 15 na anyabasa 20. 11 Ziba adadawira mpfumu kuti: “Vose vomwe mpfumu yangu mwaniuza, nichite vimwivo.” Pamwapo Mefiboseti ambadya na Davide pameza yake* ninge m’bodzi wa wana wa mpfumu. 12 Mefiboseti wenze na mwana mng’ono mwamuna dzina yake Mika, ndipo wanthu wose wa m’banja ya Ziba enze anyabasa wa Mefiboseti. 13 Pamwapo Mefiboseti ambakhala ku Yerusalemu ndipo ambadya pabodzi na mpfumu pameza yake nthawe zose. Iye wenze wopunduka mapazi.