Samueli wachiwiri
7 Mpfumu imbakhala m’nyumba yake* ndipo Yahova adachitisa kuti imbakhale mwantendere komasoti kuti osati imbaboneresewe na wanthu wose oizonda. 2 Pamwapo mpfumu mwiyo idauza mneneri Natani kuti: “Inepano ninkukhala m’nyumba ya miti ya mkungudza, pomwe Likasa ya Mulungu chaiye inkukhala mutenti.” 3 Natani adauza mpfumu kuti: “Chitani chirichose chomwe ntima wanu unkufuna, ndawa Yahova ali namwe.”
4 Usiku wa ntsiku mwiyo, Yahova adayankhula na Natani kuti: 5 “Yenda ukauze ntumiki wangu Davide kuti: ‘Yahova wanena kuti: “Ko iwepo unkufunika kunimangira nyumba yakuti inepano nikhalemo? 6 Kundochokera ntsiku yomwe nidabulisa Aizirayeli mu Iguputo mpakana lero, niribe kukhalako m’nyumba koma nthawe zose nimbandofambafamba niri mutenti. 7 Panthawe yose yomwe nimbafamba na Aizirayeli,* ko pali ntsiku yomwe nidabvunzako atsogoleri wa madzinza ya Izirayeli omwe nidawasankhula kuti ambatsogolere wanthu wangu Aizirayeli kuti: ‘Ndawa chani mulibe kunimangira nyumba ya miti ya mkungudza?’”’ 8 Manje ntumiki wangu Davide ukamuuze kuti: ‘Yahova wa magulu yankhondo yakudzulu wanena kuti: “Inepano nidakutenga kunyakabusa komwe umbabusa nkhosa kuti ukhale mtsogoleri wa wanthu wangu. 9 Inepano nidzakhale nawe kulikose komwe ungayende, ndipo nidzawine wanthu wose omwe akuzonda. Nidzachitise kuti dzina yako idziwike ninge momwe vikhalira na wanthu omwe ni obvekera mudziko iyi. 10 Wanthu wangu Aizirayeli nidzawasankhulire malo nkuwaikha pamalo mwayo. Iwo adzakhale pamwapo ndipo adzasokonezewelini pomwe. Wanthu oipa adzawachitirelini pomwe vinthu voipa ninge momwe ambachitira kalekale, 11 panthawe yomwe nidasankhula oweruza kuti ambatsogolere wanthu wangu Aizirayeli. Nidzachitise kuti umbakhale mwantendere osaboneresewa na wanthu okuzonda.
Komasoti Yahova wakuuza kuti, Yahova adzakulimbisire nyumba.* 12 Ukadzamwalira nkuikhiwa m’manda na azibereki wako, nidzachitise kuti mbadwa* yako, mwana wako chaiye, akhale mpfumu ndipo nidzachitise kuti ufumu wake ukhale wolimba. 13 Iye ndiye yemwe adzamange nyumba mudzina yangu, ndipo nidzakhazikise mpando wake wachifumu mpakana kalekale. 14 Inepano nidzakhale ababa wake ndipo iye adzakhale mwana wangu. Akambadzaphonyesa vinthu vinango, inepano nidzamulange na mpsimbo ya wanthu na mishamu ya wana wa wanthu.* 15 Ndipo chikondi changu chokhulupirika chidzachokelini pa iye ninge momwe nidachichosera pa Sauli, yemwe nidamuchosa pamaso pako. 16 Nyumba yako na ufumu wako vidzapitirize kukhalapo mpakana kalekale. Mpando wako wachifumu udzakhazikike mpakana kalekale.”’”
17 Natani adauza Davide mawu yose mwaya na masomphenya yose yomwe adaona.
18 Patsogolo pake Davide adakhala pasi pamaso pa Yahova ndipo adanena kuti: “Ndine mbani inepano, Yahova Ambuya Nkulu Maninge? Ndipo ko banja yathu* ni chani kuti munifikise pomwe niri pano? 19 Imwepo Yahova Ambuya Nkulu Maninge, kuingizira pomwe mwapa, mwanena kuti nyumba ya ntumiki wanu idzakhazikike mpakana m’tsogolo maninge. Mwaya ni malangizo* yomwe mwapereka kwa wanthu wose, imwepo Yahova Ambuya Nkulu Maninge. 20 Manje inepano ntumiki wanu Davide ninganene pomwe chani kwa imwepo pakuti munkunidziwa bwino maninge, imwepo Yahova Ambuya Nkulu Maninge? 21 Imwepo mwachita vinthu vikuluvikulu vimwivi ndawa ya mawu yanu komasoti mobverana na vomwe viri muntima mwanu* ndipo mwanidziwisa inepano ntumiki wanu. 22 Ndipomwapa ndimwedi wodabwisa, imwepo Yahova Ambuya Nkulu Maninge. Palibe yemwe angalingane namwe komasoti palibe Mulungu munango koma imwepo mwekha. Vose vomwe tabva vinkutsimikizira vimwivi. 23 Ni khaindi iponi padziko yapasi yomwe ingalingane na khaindi ya wanthu wanu Aizirayeli? Imwepo Mulungu mudayenda kukapulumusa wanthu wanu ndipo mudadziwika pomwe mudawachitira vinthu vikuluvikulu na vochitisa mantha. Mudathamangisa makhaindi na milungu yawo ndawa ya wanthu wanu omwe mudawapulumusa ku Iguputo. 24 Mudachitisa kuti Aizirayeli akhale wanthu wanu mpakana kalekale. Ndipo imwepo Yahova mwakhala Mulungu wawo.
25 Manje imwepo Yahova Mulungu, chitani vomwe mwapolomisa kwa ntumiki wanu na nyumba yake ndipo muchite vimwivi mpakana kalekale. Muchite mobverana na vomwe mwapolomisa. 26 Dzina yanu ikwiziwe mpakana kalekale kuti wanthu anene kuti: ‘Yahova wa magulu yankhondo yakudzulu, ni Mulungu wa Izirayeli,’ ndipo nyumba ya inepano ntumiki wanu Davide ikhazikike pamaso panu. 27 Ndawa imwepo Yahova wa magulu yankhondo yakudzulu, Mulungu wa Izirayeli, mwaniululira ine ntumiki wanu kuti: ‘Nidzakumangire nyumba.’* Ndipomwapa inepano ntumiki wanu nalimba ntima kupemphera kwa imwepo mpemphero mwiyi. 28 Imwepo Yahova Ambuya Nkulu Maninge, ndimwe Mulungu chaiye ndipo mawu yanu ni chaiyo, komasoti mwanipolomisa inepano ntumiki wanu vinthu vabwino vimwivi. 29 Manje dalisani nyumba ya ntumiki wanu kuti ikhazikike pamaso panu mpakana kalekale. Imwepo Yahova Ambuya Nkulu Maninge mwapolomisa ndipo madaliso yanu yakhale pa banja ya ntumiki wanu mpakana kalekale.”