Samueli wachiwiri
6 Davide adaunganidza pomwe masocha yamphanvu mu Izirayeli yokwana 30 000. 2 Manje Davide na wanthu omwe enze naye adanyamuka nkuyenda ku Baale-yuda kuti akatenge Likasa ya Mulungu chaiye. Pa Likasa mwiyi wanthu ambachemererapo dzina ya Yahova wa magulu yankhondo yakudzulu, yemwe akhala padzulu* pa akerubi. 3 Koma iwo adanyamulira Likasa ya Mulungu chaiye pangolo inyowani kuti aichose ku nyumba ya Abinadabu yomwe yenze paphiri. Uza na Ahiyo, wana amuna wa Abinadabu, ndiwo ambatsogolera ngolo inyowani mwiyo.
4 Pamwapo adanyamula Likasa ya Mulungu chaiye kuchokera kunyumba ya Abinadabu yomwe yenze paphiri ndipo Ahiyo ambafamba patsogolo pa Likasa. 5 Davide na wanthu wose wa m’banja ya Izirayeli ambakondwa pamaso pa Yahova, uku ankuimba makhaindi yose ya voimbira va miti volingana na muti wa mkungudza. Ambaimba pomwe zeze, voimbira va vingwe, mabero na maseche yosiyanasiyana. 6 Koma padafika ku malo yopulira mbewu ya ku Nakoni, Uza adaphata Likasa ya Mulungu chaiye, ndawa ng’ombe zenze zidakhala pang’ono kuigwesa. 7 Pavidateno Yahova adakalipira maninge Uza ndipo Mulungu chaiye adamuphera mwapo ndawa yochita vinthu mosowa ulemu. Mwakuti Uza adafera mwapo, pafupi na Likasa ya Mulungu chaiye. 8 Koma Davide adakalipa ndawa Yahova adakalipa* maninge na Uza. Malo mwayo yadziwika na dzina yakuti Perezi-uza* mpakana lero. 9 Pamwapo Davide adachita mantha maninge na Yahova ntsiku mwiyo, ndipo adati: “Ko Likasa ya Yahova idzabwere tani komwe inepano nikhala?” 10 Davide alibe kufuna pomwe kutenga Likasa ya Yahova nkuyenda nayo komwe iye ambakhala, ku Thaundi ya Davide. Koma Davide adalamula kuti iyende kumuyi kwa Obedi-edomu wa ku Gati.*
11 Likasa ya Yahova idakhala kumuyi kwa Obedi-edomu wa ku Gati kwa minyezi yatatu, ndipo Yahova ambadalisa Obedi-edomu na banja yake yose. 12 Mpfumu Davide idauziwa kuti: “Yahova wadalisa banja ya Obedi-edomu na vinthu vake vose ndawa ya Likasa ya Mulungu chaiye.” Pamwapo Davide adayenda kukatenga Likasa ya Mulungu chaiye kumuyi kwa Obedi-edomu nkuyenda nayo ku Thaundi ya Davide, uku ankukondwa. 13 Wanthu omwe adanyamula Likasa ya Yahova padandotantsula ka 6, Davide adapereka ntsembe ya ng’ombe imuna na chipfuwo chonenepa.
14 Davide ambavina mozungulira pamaso pa Yahova na mphanvu zake zose. Pamwapa wenze vale efodi wa nguwo. 15 Davide na wanthu wose wa m’banja ya Izirayeli ambafamba na Likasa ya Yahova uku ankukuwa mokondwa komasoti ankuliza lupenga ya nyanga ya nkhosa. 16 Likasa ya Yahova paidafika mu Thaundi ya Davide, Mikala mwana nkazi wa Sauli adasuzumira pajanela ndipo adaona mpfumu Davide ankumogamoga nkumbavina mozungulira pamaso pa Yahova. Ndipo Mikala adayamba kumunyoza muntima mwake. 17 Patsogolo pake adaikha Likasa ya Yahova pamalo yake mutenti yomwe Davide adamanga. Pamwapo Davide adapereka ntsembe kwa Yahova, ntsembe zoshoka na ntsembe zambverano. 18 Davide padamaliza kupereka ntsembe zoshoka na ntsembe zambverano, adadalisa wanthu mudzina ya Yahova wa magulu yankhondo yakudzulu. 19 Komasoti adapasa wanthu wose mikate yalaundi yobowola pakati, makeke* ya vipaso va kanjedza na makeke ya uva. Adapereka vimwivi ku gulu yose ya Izirayeli, mwamuna komasoti nkazi. Patsogolo pake aliyese adayenda kumuyi kwake.
20 Davide padabwerera kumuyi kwake kuti akadalise banja yake, Mikala mwana nkazi wa Sauli adabula kukagumana naye. Mikala adati: “Lero mpfumu ya Izirayeli yawonesa ulemerero wake podzivula pamaso pa akapolo akazi wa atumiki wake, ninge momwe munthu alibe nzeru adzivulira mosowa manyazi.” 21 Davide adauza Mikala kuti: “Inepano pampale nimbakondwa pamaso pa Yahova yemwe adanisankhula m’malo mwa ababa wako na banja yawo yose kuti nikhale mtsogoleri wa wanthu wa Yahova, Aizirayeli. Ndipomwapa nidzakondwere pamaso pa Yahova. 22 Nipitirize kudzichepesa kuposha pamwapa ndipo nipitirize kudziwona ninge wonyozeka. Koma akapolo akazi omwe unkunena awo ambanilemekeze.” 23 Manje Mikala mwana nkazi wa Sauli alibe kukhalako na mwana mpakana ntsiku yomwe adafa.