Samueli wachiwiri
21 Manje mu ntsiku za Davide kudagwa njala kwa magole yatatu yolondolana. Pamwapo Davide adabvunza Yahova ndipo Yahova adamuuza kuti: “Sauli na wanthu wa m’banja yake anamulandu wakupha wanthu ndawa Sauli adapha Agibiyoni.” 2 Pamwapo mpfumu idachemeresa Agibiyoni na kuyankhula nawo. (Agibiyoni enzelini Aizirayeli koma Aamori omwe enze adakhala. Aizirayeli adalumbirira Agibiyoni kuti awaphelini, koma Sauli ambafuna kuwapha wose ndawa ya ntima wofunisisa kuthandiza Aizirayeli na Ayuda.) 3 Davide adabvunza Agibiyoni kuti: “Nikuchitireni chani ndipo nipereke chani kuti nifuchire chimo mwiyi, kuti imwepo mudalise wanthu wa Yahova?” 4 Agibiyoni adadawira kuti: “Tikufunalini siliva panango golide pankhani ya Sauli na wanthu wa m’banja yake, komasoti tingaphelini munthu aliyese mu Izirayeli.” Pamwapo Davide adati: “Chirichose chomwe mungafune nikuchitireni.” 5 Iwo adauza mpfumu kuti: “Tinkufuna kuti munthu yemwe adapha wanthu wa khaindi yathu na kutikonzera chiwembu kuti tileke kugumanika pomwe m’madera yose ya Izirayeli, 6 mutipase wana wake 7 amuna. Timanike* vitanda vawo kuti Yahova aviwone. Tivimanike ku Gibeya, kwawo kwa Sauli, munthu yemwe Yahova adamusalula.” Manje mpfumu idati: “Nikupaseni.”
7 Koma mpfumu idabvera ntsisi Mefiboseti mwana mwamuna wa Yonatani, mwana wa Sauli, ndawa ya lumbiro yomwe Davide muyo na Yonatani mwana wa Sauli adachita pamaso pa Yahova. 8 Pamwapo mpfumu idatenga Arimoni na Mefiboseti, omwe enze wana awiri amuna wa Rizipa, mwana nkazi wa Aya, yemwe Rizipa muyo adaberekera Sauli. Adatenga pomwe wana amuna 5 wa Mikala,* mwana nkazi wa Sauli omwe adaberekera Adiriyeli, mwana wa Barizilai wa ku Mehola.* 9 Iye adawapereka kwa Agibiyoni ndipo Agibiyoni mwawo adamanika vitanda vawo paphiri kuti Yahova aviwone mwakuti wose 7 adafera pabodzi. Iwo adaphewa ntsiku zoyambirira panthawe yokolola, kumayambiriro kwa nthawe yokolola balere. 10 Patsogolo pake Rizipa mwana nkazi wa Aya adatenga chisakha nkuchiyanza pamwala kuti ambakhalepo, kuyambira kumayambiriro kwa nthawe yokolola mpakana pomwe nvula idagwera pa vitanda mwivo. Iye alibe kubvuma kuti mbalani zamunlengalenga zitere pa vitanda mwivo masikati, ndipo usiku alibe kubvuma kuti vilombo vakuthengo vifenderere pamalo pomwe penze vitanda mwivo.
11 Davide adauziwa vomwe Rizipa mwana wa Aya, nkazi mng’ono wa Sauli adachita. 12 Pamwapo Davide adayenda kukatenga mabonzo ya Sauli na mabonzo ya Yonatani mwana wake kwa atsogoleri* wa ku Yabesi-giliyadi. Atsogoleri mwawo adayenda kukatenga mobisa chitanda cha Sauli na cha Yonatani nkati mwa thaundi ya Beti-sani, komwe Afilisiti adavimanika, pantsiku yomwe adapha Sauli pa phiri ya Giliboa. 13 Iye adabweresa mabonzo ya Sauli na ya mwana wake Yonatani. Padateno adaunganidza mabonzo ya wanthu omwe adaphewa* wale. 14 Patsogolo pake wanthu adaikha mabonzo ya Sauli na mwana wake Yonatani mudera ya Benjamim ku Zela m’manda ya Akisi ababa wake. Padachita vose vomwe mpfumu idawalamula, Mulungu adabva madandaulo yawo yonena va dziko mwiyo.
15 Manje padayambika pomwe nkhondo pakati pa Afilisiti na Aizirayeli. Pamwapo Davide na atumiki wake adayenda kukamenyana na Afilisiti, koma Davide wenze adaneta maninge. 16 Pavidateno, Isibi-benobi, mbadwa ya Arefai yemwe wenze na nkondo wakobre wolemera makilograma yothamangira yatatu na hafu* komasoti chibemba chinyowani, ambafuna kupha Davide. 17 Nthawe mwiyoletu, Abisai mwana wa Zeruya adathandiza Davide ndipo adapha Mfilisiti muyo. Pavidateno masocha ya Davide yadamulumbirira kuti: “Ayi kuti mudzayende pomwe na isepano kunkhondo. Ayi kudzimwisa luju ya Izirayeli.”
18 Nkhondo mwiyi paidamala, padayambika pomwe nkhondo inango yomenyana na Afilisiti ku Gobu. Panthawe mwiyi Sibekai wa ku Husa* adapha Safi, mbadwa ya Arefai.
19 Patsogolo pake padayambika pomwe nkhondo inango na Afilisiti ku Gobu, ndipo Elihanani mwana wa Yaare-oregimu wa ku Betelehemu adapha Goliyati wa ku Gati, yemwe muti wa nkondo wake wenze nkulu ninge muti wophatisa basa pakukonza nguwo.
20 Patsogolo pake padayambika pomwe nkhondo inango ku Gati ndipo kwenze munthu munango nkulu maninge. Iye wenze na vala* 6 kudjanja iriyose na vala 6 ku phazi iriyose, mwakuti wenze na vala 24. Nayembo wenze mbadwa ya Arefai. 21 Iye ambanyoza maninge Aizirayeli. Pamwapo Yonatani mwana wa Simeyi, m’bale wake wa Davide, adamupha.
22 Wanthu anayi mwawa enze mbadwa za Arefai ku Gati ndipo adaphewa na Davide na atumiki wake.