Samueli wachiwiri
20 Manje penze munthu munango wosokoneza dzina yake Sheba, mwana mwamuna wa Bikiri, wadzinza ya Benjamim. Iye adaliza lupenga ya nyanga ya nkhosa nkunena kuti: “Isepano Davide tiribe naye basa ndipo tingapasiwelini chuma cha banja kuchokera kwa mwana wa Jese. Imwepo Aizirayeli, aliyese ayende kwa milungu* yake!” 2 Pavidateno, wanthu wose wa Izirayeli adachoka kwa Davide nkuyamba kutewera Sheba mwana wa Bikiri. Koma wanthu wa ku Yuda, kuyambira ku Yorodano mpakana ku Yerusalemu, adapitiriza kukhala na mpfumu yawo.
3 Mpfumu Davide padafika kumuyi kwake* ku Yerusalemu, adatenga akazi wake ang’ono 10 omwe adawasiya kuti ambasamalire pamuyi wale nkuwafungira m’nyumba inango ndipo adaikhapo magwarda. Iye ambawapasa chakudya koma alibe kugona nawo. Iwo adapitiriza kukhala m’nyumba mumo mpakana ntsiku yomwe adamwalira. Ambakhala ninge akazi wamasiye olo kuti mwamuna wawo wenze moyo.
4 Mpfumu idauza Amasa kuti: “Uchemere amuna wose mu Yuda kuti asonkhane kuno ntsiku zitatu zikalibe kumala, ndipo iwembo ubwere.” 5 Pamwapo Amasa adayenda kukachemera wanthu wa mu Yuda, koma adachebwa kubwera ndipo alibe kufika panthawe yomwe adauziwa. 6 Manje Davide adauza Abisai kuti: “Sheba mwana mwamuna wa Bikiri atibonerese maninge kuposha Abisalomu. Manje tenga masocha yangu ndipo mukamufage kuti osati agumanike m’mathaundi ya mipanda yolimba maninge nkubishala.” 7 Pamwapo masocha ya Yowabu, Akereti, Apeleti na amuna wose wamphanvu adayamba kumufagafaga. Iwo adachoka ku Yerusalemu nkuyenda kukafagafaga Sheba mwana wa Bikiri. 8 Padasala pang’ono kufika pamwala ukulu womwe uli ku Gibiyoni, Amasa adabwera kudzagumana nawo. Yowabu wenze adavala vovala vankhondo ndipo adaikha chibemba muchoikhamo chake nkuchikoloweka nchiuno mwake. Padafenderera Amasa, chibemba mwicho chidagwa.
9 Manje Yowabu adabvunza Amasa kuti: “Uli tani m’bale wangu?” Patsogolo pake Yowabu adaphata ndebvu za Amasa na djanja yake yamakulu ninge ankufuna kumubejali. 10 Koma Amasa wenzelini tcheru na chibemba chomwe chenze m’manja mwa Yowabu. Pamwapo Yowabu muyo adamulasa nacho m’mimba ndipo matumbo yake yadakhuthukira pasi. Adandomulasa kabodzi nkuferatu, alibe kumulasa kawiri. Patsogolo pake Yowabu na m’bale wake Abisai adapitiriza kufaga Sheba mwana wa Bikiri.
11 Mulumbwana munango wa Yowabu adaima pafupi na Amasa ndipo ambanena kuti: “Aliyese yemwe ali ku mbali ya Yowabu komasoti ya Davide, atewere Yowabu!” 12 Panthawe mwiyi nkuti Amasa ali gone pamagazi yake ali wakufa, pakati pa nsewu. Mulumbwana ule padawona kuti wanthu wose akuima pamalo mwapo, adachosa thupi ya Amasa nkuiikha pathengo. Patsogolo pake adaifunikiza na chovala ndawa adawona kuti aliyese akafika pamalo mwayo, ambaima. 13 Padandoichosa thupi mwiyo pansewu mwapo, aliyese ambandogwata nkutewera Yowabu pofaga Sheba mwana wa Bikiri.
14 Manje Sheba adapitirira madzinza yose ya Izirayeli nkukafika kuthaundi ya Abele ya ku Beti-maaka. Nayombo dzinza ya Abikiri idasonkhana nkuyamba kumutewera.
15 Yowabu na masocha yake* adafika nkuzungulira thaundi ya Abele ya ku Beti-maaka yomwe idazunguliriwa na malo yotunthumuka yomwe wanthu wamuthaundi mwiyo adamanga. Yowabu na masocha yake adamanga pomwe malo yotunthumuka yomenyerapo nkhondo. Wanthu wose omwe enze na Yowabu ambakumba pasi pa mpanda muyo kuti augwese. 16 Manje mayi munango wanzeru wa muthaundi mwiyo adakuwa kuti: “Bveserani amuna imwe, bveserani! Pulizi muuzeni Yowabu abwere pafupi apa kuti niyankhule naye.” 17 Pamwapo Yowabu adafenderera ndipo mayi muyo adati: “Ko ndimwe a Yowabu?” Yowabu adadawira kuti: “Inde, ndinepano.” Manje mayi muyo adati: “Bveserani vomwe kapolo wanu ine ninkufuna kukuuzani.” Yowabu adadawira kuti: “Lewani tibve.” 18 Manje mayi muyo adati: “Kalekale wanthu ambanena kuti, ‘kafageni nzeru kuthaundi ya Abele,’ akateno nkhani imbamalira mwapo. 19 Inepano ninkuimira wanthu okonda ntendere na okhulupirika wa mu Izirayeli. Imwepo munkufuna kudzonga thaundi yomwe iri ninge mayi mu Izirayeli. Ndawa chani munkufuna kudzonga chuma cha Yahova?” 20 Yowabu adadawira kuti: “Inepano ningadzongelini thaundi mwiyi, nivosakwanisika vimwivi. 21 Nkhani irilini teno. Koma munthu wochokera kudera yamapiri ya Efuraimu, dzina yake Sheba mwana wa Bikiri, waphindukira Mpfumu Davide. Imwepo mukandotipasa munthu muyu, inepano nidzongelini thaundi mwiyi.” Mayi muyo adauza Yowabu kuti: “Tikuthusireni nsolo wake na padzulu pa mpanda!”
22 Nthawe mwiyoletu, mayi wanzeru muyo adayenda kukayankhula na wanthu wose, ndipo wanthu mwawo adagwata nsolo wa Sheba mwana wa Bikiri nkuuthusa kwa Yowabu. Pavidateno, Yowabu adaliza lupenga ya nyanga ya nkhosa ndipo wanthu wose adachoka muthaundi mwiyo nkuyenda kwawo. Nayembo Yowabu adabwerera ku Yerusalemu kwa mpfumu.
23 Yowabu wenze mtsogoleri wa gulu yose ya nkhondo ya Aizirayeli ndipo Benaya mwana wa Yehoyada ambatsogolera Akereti na Apeleti. 24 Adoramu ambatsogolera wanthu wonembewa basa yochichimiza ndipo Yehosafati mwana wa Ahiludi ambanemba vomwe vachitika. 25 Seva wenze wonemba ndipo Zadoki na Abiyatara enze wantsembe. 26 Ira mbadwa ya Yairi adakhalambo mtsogoleri nkulu* wa Davide.