Samueli wachiwiri
22 Davide adayankhula na Yahova mawu ya nyimbo iyi, pantsiku yomwe Yahova adamupulumusa kwa azondi wake wose na kwa Sauli. 2 Iye adati:
“Yahova ni dwale yangu, malo yangu yoniteteza na Wonipulumusa.
3 Mulungu wangu ni dwale yangu, inepano nithawira kwa iye,
Iye ni chovikira changu, nyanga* yangu yonipulumusa* na malo yangu yoniteteza.*
Komasoti ni malo yangu yothawirapo, mpulumusi wangu yemwe anipulumusa kwa wanthu oipa.
4 Nikumbira Yahova, yemwe ni wofunika kutamandiwa, kuti anithandize.
Ndipo adzanipulumuse kwa wanthu omwe anizonda.
5 Mabimbi ya impfa yadanizungulira;
Gulu ya wanthu wachabechabe imbanigopsya.
6 Vingwe va Manda* vidanizungulira;
Nidateyerewa misampha ya impfa.
7 Panthawe ya mabvuto, nidachemera Yahova,
Nidapitiriza kuchemera Mulungu wangu.
Iye adabva mawu yangu ali mukachisi wake,
Matu yake yadabva kulira kwangu kokumbira thandizo.
8 Dziko yapasi idayamba kugunduzika na kunjenjemera;
Fundasau yakudzulu idagwendezeka.
Idagwendezeka ndawa Mulungu wenze adakalipa.
9 Utsi udabula m’mphuno mwake,
Ndipo moto wodzonga udabula nkamwa mwake;
Masimbe yogaka yadabula mwa iye.
10 Iye adajolimisa kudzulu pomwe ambabuluka,
Mdima ukulu wenze pasi pa mapazi yake.
11 Iye adapakira pakerubi ndipo adabwera ankumbululuka.
Adaonekera pa maphaphiro ya mngelo.*
12 Patsogolo pake adaikha mdima womuzungulira ninge tenti,
M’madzi yapsyipa na m’mitambo yapsyipa.
13 Mukugwerewera komuzungulira mudabula masimbe yogaka moto.
14 Patsogolo pake Yahova adachitisa kudzulu kugunda ninge tukaphaliwali;
Wamdzulumdzulu adachitisa kuti mawu yake yabveke.
15 Adaponya tumikondo twake na uta ndipo adawamwaza;
Adaponya tukaphaliwali ndipo adawasokoneza.
16 Pasi panyanja padawonekera;
Fundasau ya dziko yapasi idawonekera ndawa ya kutsuula kwa Yahova,
Ndawa ya mphanvu ya mphuwe yochokera m’mphuno mwake.
17 Adapfuthula djanja yake kuchokera kudzulu;
Adaniphata nkunivuula m’madzi yonoka.
18 Adanipulumusa kwa wanthu omwe ambanizonda omwe enze wamphanvu,
Kwa wanthu omwe ambazondana nane omwe enze na mphanvu kuposha inepano.
19 Wanthu onizonda mwawa adaniphindukira pantsiku ya tsoka,
Koma Yahova adanithandiza.
20 Adanitenga nkuniikha pamalo yotetezeka;*
Adanipulumusa ndawa ambakondwa nane.
21 Yahova anidalisa mobverana na chilungamo changu,
Anipasa malipiro mobverana na kusaphonya* kwangu.
22 Ndawa natewedza njira za Yahova,
Ndipo inepano niribe kuchita chinthu choipa maninge, chomwe ni kusiya Mulungu wangu.
23 Nikumbukira viweruzo vake vose,
Ndipo nidzasiyelini kutewedza malamulo yake.
24 Nidzapitirize kukhala wosaphonya pamaso pake,
Ndipo nidzayesese kupewa voipa.
25 Yahova anipase malipiro mobverana na chilungamo changu,
Komasoti ndawa yakuti ndine wosaphonya pamaso pake.
26 Munthu wokhulupirika, mumuchitira mokhulupirika.
Munthu wamphanvu na wosaphonya, mumuchitira mwachilungamo.
27 Munthu wochena, mumuwonesa kuti ndimwe wochena,
Koma munthu wa maganizo yosokonezeka, mumuwonesa kuti ndimwe wochenjera.
28 Mupulumusa wanthu odzichepesa,
Koma munyantsiwa na wanthu odzikuza ndipo muwachitisa manyazi.
29 Imwepo Yahova ndimwe luju yangu;
Yahova ni yemwe anivunikira mumdima.
30 Na thandizo yanu ningakwanise kulimbana na gulu ya vigananga;
Na mphanvu za Mulungu ningapakire chipupa.
31 Njira ya Mulungu chaiye ni yangwiro.
Mawu ya Yahova ni yosefeka bwino.
Iye ni chovikira kwa wose wothawira kwa iye.
32 Ko pali Mulungu munango pomwe woposha Yahova?
Ko pali dwale inango pomwe kuchosapo Mulungu wathu?
33 Mulungu chaiye ni malo yangu yotetezeka maninge,
Ndipo iye adzasalaze njira yangu.
34 Achitisa kuti mapazi yangu yakhale ninge ya bawala;
Achitisa kuti niime pamalo yotunthumuka.
35 Iye apfunzisa manja yangu kumenya nkhondo;
Manja yangu yangakwanise kukwewa uta wakobre.*
36 Munipasa chovikira chanu chachipulumuso,
Ndipo kudzichepesa kwanu kunichitisa kuti nilemekezeke.
37 Mukulisa njira kuti mapazi yangu yambafambemo,
Ndipo mapazi yangu yadzatererekelini.
38 Nidzathamangise azondi wangu nkuwapha wose;
Ndipo nidzabwererelini mpakana kuwadzongeratu wose.
39 Nidzawadzongeretu na kuwaphwanya kuti aleke kumuka pomwe.
Iwo adzagwere pasi pa mapazi yangu.
40 Mudzanipase mphanvu kuti nikwanise kumenya nkhondo;
Mudzachitise kuti azondi wangu awiniwe.
41 Mudzachitise kuti azondi wangu athawe pamaso pangu;
Nidzaphe* wanthu omwe azondana nane.
42 Akuwa kuti athandiziwe, koma palibe angawapulumuse;
Afika polirira Yahova, koma iye awadawiralini.
43 Nidzawapeye ndipo adzakhale ninge pfumbi.
Nidzawapondeponde ninge matope ya munsewu.
44 Imwepo mudzanipulumuse kwa wanthu wa khaindi yangu wonigumanira vifukwa.
Mudzaniteteze kuti nikhale mtsogoleri wa makhaindi ya wanthu.
Wanthu omwe nikuwadziwalini adzanitumikire.
45 Wanthu ochokera mudziko inango adzanijolimire mwamantha;
Vomwe adzabve va ine vidzawachitise kuti ambanibvere.
46 Wanthu ochokera mudziko inango adzachite mantha;
Iwo adzabule m’malo yawo yotetezeka uku ankunjenjemera.
47 Yahova ni wamoyo! Itamandike Dwale yangu!
Mulungu wangu, yemwe ni dwale yomwe inipulumusa, alemekezeke.
48 Mulungu chaiye abwezera azondi wangu;
Iye achitisa kuti makhaindi ya wanthu yambanibvere;
49 Iye anipulumusa kwa wanthu omwe anizonda.
Munikwiza padzulu pa wanthu oniphindukira;
Munipulumusa kwa munthu woipa.
50 Ndipomwapa nidzakutembejeni imwepo Yahova pakati pa makhaindi ya wanthu.
Ndipo nidzaimbe nyimbo zotamanda dzina yanu.
51 Iye achita vinthu vikuluvikulu kuti apulumuse mpfumu yake;
Awonesa chikondi chokhulupirika kwa wodzodzewa wake,
Kwa Davide na mbadwa* zake mpakana kalekale.”