Samueli wachiwiri
19 Wanthu anango adayenda kukauza Yowabu kuti: “Mpfumu inkulira Abisalomu.” 2 Manje pa ntsiku mwiyi wanthu wose enze okwinyirira m’malo mokondwa kuti awina kunkhondo ndawa adabva kuti: “Mpfumu inkulira maliro ya mwana wake.” 3 Ntsiku mwiyo wanthu adangena muthaundi mwakazizizi ninge wanthu omwe ankuchita manyazi ndawa yakuti athawa kunkhondo. 4 Manje mpfumu idabisa nkhope yake ndipo imbapitiriza kulira mokuwa kuti: “Mwana wangu Abisalomu! Abisalomu mwana wangu, mwana wangu!”
5 Patsogolo pake Yowabu adayenda kumuyi kwa mpfumu nkuiuza kuti: “Lero mwachitisa manyazi atumiki wanu wose omwe apulumusa moyo wanu, wa wana wanu amuna, wana wanu akazi, azikazi wanu komasoti azikazi wanu ang’ono. 6 Mukonda wanthu omwe akuzondani ndipo muzonda wanthu omwe akukondani. Lero mwawonesa kuti atumiki wanu na atsogoleri mulibe nawo basa ndipo ninkukaikiralini kuti Abisalomu adakakhala na moyo koma anango tose nkufa, mudakadandaulalini. 7 Manje nyamukani, muyende mukalimbikise atumiki wanu, ndawa peno muyendelini, shuwa ninkulumbira mudzina ya Yahova, palibe munthu yemwe akhale na imwepo usiku uno. Vimwivi vikhale voipa maninge kwa imwepo kuposha voipa vose vomwe mwagumana navo kuyambira muli mulumbwana.” 8 Pamwapo mpfumu idanyamuka nkukakhala pansuwo wa mpanda wa thaundi. Patsogolo pake wanthu wose adauziwa kuti: “Mpfumu yakhala pansuwo wa mpanda wa thaundi.” Manje wanthu adabwera pomwe penze mpfumu mwiyo.
Koma Aizirayeli enze adathawira kumamiyi yawo. 9 Wanthu wa m’madzinza yose ya Izirayeli adayamba kugegedzana ndipo ambati: “Mpfumu mwiyi ndiyo idatipulumusa kwa wanthu omwe atizonda komasoti kwa Afilisiti. Koma manjeuno yathawa mudziko ino ndawa ya Abisalomu. 10 Apa Abisalomu yemwe tidamudzodza kuti akhale mtsogoleri wathu wafa kunkhondo. Manje ndawa chani munkuchitalini chirichose kuti mpfumu ibwerere?”
11 Mpfumu Davide idatumiza mawu kwa wantsembe Zadoki na Abiyatara yakuti: “Muwabvunze akulu wa Yuda kuti: ‘Ndawa chani imwepo mwekha munkuchitalini chirichose kuti mpfumu ibwerere kumuyi kwake, pomwe Aizirayeli wose atumiza mawu kwa mpfumu? 12 Imwepo ndimwe abale wangu ndipo ndise magazi yabodzi.* Manje ndawa chani imwepo mwekha munkuchitalini chirichose kuti mpfumu ibwerere?’ 13 Amasa mumuuze kuti: ‘Iwepo na inepano ndise magazi yabodzi. Mulungu anilange maninge peno nikuikhelini kukhala mtsogoleri wa gulu yangu yankhondo m’malo mwa Yowabu.’”
14 Pamwapo amuna wose wa Yuda adatengeka ndipo adabvana chinthu chibodzi, mwakuti adatumiza mawu kwa mpfumu yakuti: “Bwererani pabodzi na atumiki wanu wose.”
15 Pamwapo mpfumu idayamba kubwerera kwawo ndipo idafika ku Yorodano. Wanthu wa ku Yuda adabwera ku Giligala kudzagumana na mpfumu komasoti kuti aiperekeze poyambuka kamadzi ka Yorodano. 16 Patsogolo pake Simeyi mwana wa Gera wa ku Bahurimu, wa dzinza ya Benjamim, adathamangira amuna wa ku Yuda nkuyenda nawo kukagumana na Mpfumu Davide. 17 Iye wenze na amuna 1000 wa ku Benjamim. Nayembo Ziba, ntumiki wa m’banja ya Sauli na wana wake 15 komasoti atumiki wake 20 adafamba mwakankulumize nkukafika ku Yorodano mpfumu ikanati yafika. 18 Iye* padafika, adayambukira tsidya inango kuti akayambuse wanthu wa m’banja ya mpfumu komasoti kuchita chirichose chomwe mpfumu mwiyo ingafune. Koma mpfumu paidakhala pang’ono kuyambuka Yorodano, Simeyi mwana wa Gera, adagwada pamaso pake. 19 Pamwapo adauza mpfumu kuti: “Mpfumu yangu, munikhululukire vomwe nidaphonyesa. Ayi kukumbukira voipa vomwe inepano ntumiki wanu nidachita pantsiku yomwe imwepo mpfumu yangu mumbachokera ku Yerusalemu. Ayi kusunga vimwivi muntima mwanu mpfumu. 20 Inepano ntumiki wanu ninkudziwa kuti nidachimwa, ndipomwapa lero nakhala woyamba m’banja yose ya Yosefe kubwera kuno kudzagumana namwe mpfumu yangu.”
21 Nthawe mwiyoletu Abisai mwana wa Zeruya adati: “Pa vomwe wanena ivi, ko Simeyi ankufunikalini kuphewa ndawa yakuti adatemberera wodzodzewa wa Yahova?” 22 Koma Davide adati: “Ko bvuto yanu ni chani imwepo wana wa Zeruya kuti lero mumbatsutsane na inepano? Ko mu Izirayeli mufunika kuphewa munthu lero? Ko inepano ninkudziwalini kuti ndine mpfumu ya Izirayeli?” 23 Patsogolo pake mpfumu idauza Simeyi kuti: “Ufelini.” Ndipo mpfumu idamulumbirira.
24 Nayembo Mefiboseti, mzukulu wa Sauli, adabwera kudzawonana na mpfumu. Kuchokera ntsiku yomwe mpfumu idachoka mpakana ntsiku yomwe idabwerera mwantendere, iye alibe kusamba* m’minyendo mwake. Alibe kugera ndebvu zapamulomo komasoti alibe kufula* vovala vake. 25 Padafika* ku Yerusalemu nkugumana na mpfumu, mpfumu mwiyo idamubvunza kuti: “Mefiboseti, ndawa chani ulibe kuyenda nane?” 26 Iye adadawira kuti: “Mpfumu yangu, ntumiki wangu ndiye adaninamiza. Inepano ntumiki wanu nidamuuza kuti: ‘Niikhire chishalo pabulu nipakirepo kuti niyende pabodzi na mpfumu,’ ndawa inepano ntumiki wanu ndine wopunduka. 27 Koma ntumiki wangu muyo adakuuzani imwepo mpfumu yangu vinthu vabodza va inepano ntumiki wanu. Koma olo nteno, imwepo mpfumu yangu muli ninge mngelo wa Mulungu chaiye, ndipomwapa chitani virivose vomwe munkuwona kuti nivabwino. 28 Imwepo mpfumu yangu, mudakakwanisa kupha wanthu wose wa m’banja ya ababa wangu. Koma mudaikha inepano ntumiki wanu mugulu ya wanthu omwe akudya pameza yanu. Ndipomwapa niribe chifukwa chobveka chakuti nipitirize kudandaula kwa imwepo mpfumu.”
29 Koma mpfumu idamuuza kuti: “Ayi kubonera na kuyankhula vose vimwivo. Inepano ninkulamula kuti iwepo na Ziba mugawane malo yale.” 30 Mefiboseti adadawira mpfumu kuti: “Mulekeni atenge malo yose mwayale, kwa inepano viri bwino ndawa imwepo mpfumu yangu mwabwerera kumuyi kwanu mwantendere.”
31 Manje Barizilai wa ku Giliyadi adabwera kudera ya Yorodano kuchokera ku Rogelimu kuti adzaperekeze mpfumu mpakana kuyambuka kamadzi ka Yorodano. 32 Barizilai wenze na magole 80 ndipo wenze wokalamba maninge. Pomwe Mpfumu Davide wenze ku Mahanaimu, Barizilai ambamupasa chakudya pakuti wenze wolemera maninge. 33 Manje mpfumu idauza Barizilai kuti: “Nabo tiyambuke pabodzi tiyende ku Yerusalemu ndipo nimbakakupase chakudya.” 34 Koma Barizilai adauza mpfumu kuti: “Ko nakhala na magole yangasi kuti niyende ku Yerusalemu pabodzi na mpfumu? 35 Manjeuno ninamagole 80. Ko ningasiyanise chabwino na choipa? Ko inepano ntumiki wanu ningabve kukoma kwa chakudya na vakumwa? Ndipo ningakwanise pomwe kubvesera nyimbo za amuna na akazi oimba? Manje inepano ntumiki wanu nikupaseni basa ndawa chani mpfumu yangu? 36 Viri bwino kuti inepano ntumiki wanu nakuperekezani kudzafika kuno ku Yorodano. Manje ndawa chani imwepo mpfumu munkufuna kunipasa malipiro mwaya? 37 Nibvumizeni inepano ntumiki wanu nibwerere nikafere muthaundi yakwathu pafupi na manda ya ababa na amayi wangu. Koma mungayambuke na ntumiki wanu Chimamu kuti muyende naye pabodzi mpfumu yangu, ndipo mukamuchitire virivose vomwe munkuwona kuti nivabwino.”
38 Mpfumu idati: “Chimamu niyende naye pabodzi, ndipo inepano nikamuchitire vomwe munkuwona kuti nivabwino. Chirichose chomwe mudzakumbire kuti nikuchitireni, nidzakuchitireni.” 39 Patsogolo pake wanthu wose adayamba kuyambuka Yorodano, ndipo mpfumu paidayambuka, idabejali Barizilai nkumudalisa. Pavidateno, Barizilai adabwerera kwawo. 40 Pomwe mpfumu imbayambuka kuyenda ku Giligala, Chimamu adayenda nawo. Ayuda wose komasoti hafu ya wanthu wa ku Izirayeli adaperekeza mpfumu.
41 Pamwapo wanthu anango wa ku Izirayeli adabwera kwa mpfumu nkunena kuti: “Ndawa chani abale wathu wa ku Yuda akubweresani mobisa imwepo mpfumu, pabodzi na banja yanu komasoti wanthu wose omwe mwenze nawo kutsidya ya Yorodano?” 42 Wanthu wa ku Yuda adadawira wanthu wa ku Izirayeli kuti: “Ndawa yakuti mpfumu mwiyi ni m’bale wathu. Manje imwepo mwakalipa navo ndawa chani? Ko isepano tadya chirichose cha mpfumu panango kutambira mphaso?”
43 Koma wanthu wa ku Izirayeli adadawira wanthu wa ku Yuda kuti: “Isepano tinamadzinza 10 mu ufumu wa Davide, ndipomwapa tinamphanvu zizinji maninge kuposha imwepo. Manje ndawa chani mwatinyoza tene? Ko isepano timbafunikalini kukhala patsogolo pakubweresa mpfumu yathu?” Koma wanthu wa ku Izirayeli mwawo adandokhala zii ndawa ya vomwe wanthu wa ku Yuda adanena.