Samueli wachiwiri

18 Manje Davide adawerenga amuna omwe enze naye nkusankhula atsogoleri wa magulu ya wanthu 1000 na atsogoleri wa magulu ya wanthu 100. 2 Padateno, Davide adagawa wanthu mwawo m’magulu yatatu. Gulu yoyamba adaipereka kwa Yowabu, gulu yachiwiri adaipereka kwa Abisai mwana wa Zeruya, m’bale wake wa Yowabu, ndipo gulu yachitatu adaipereka kwa Itai wa ku Gati. Patsogolo pake mpfumu idauza wanthu mwawo kuti: “Inembo niyende namwe.” 3 Koma wanthu mwawo adati: “Neye, ayi kuti muyende, ndawa peno tingakakathawe, akalimbanelini na isepano. Ndipo peno anango wa isepano tingakafe, akakhutirisiwelini ndawa imwepo ndimwe wofunika kuposha masocha 10 000. Ndipomwapa vingakhale bwino kuti mumbatithandize muli muthaundi muno.” 4 Mpfumu idawauza kuti: “Nichite virivose vomwe imwepo munkuwona kuti nivabwino.” Pamwapo mpfumu idaima pafupi na nsuwo wa mpanda wa thaundi ndipo wanthu wose mwawo adayenda kunkhondo m’magulu ya wanthu 100 na ya wanthu 1000. 5 Manje mpfumu idalamula Yowabu, Abisai na Itai kuti: “Ayi kukachitira vinthu voipa Abisalomu ndawa mwana muyu nimukonda.” Wanthu wose adabva vomwe mpfumu idalamula atsogoleri mwawa pankhani ya Abisalomu.

6 Wanthu adanyamuka ulendo woyenda kukamenyana na Aizirayeli ndipo nkhondo idayambika mutheketa* ya Efuraimu. 7 Aizirayeli adawiniwa na atumiki wa Davide ndipo pa ntsiku mwiyi padaphewa wanthu azinji mwakuti adakwana 20 000. 8 Nkhondo mwiyi idafalikira dera yose mwiyo. Komasoti pa ntsiku mwiyi wanthu omwe adafera mutheketa enze azinji kuposha omwe adaphewa na chibemba.

9 Patsogolo pake Abisalomu adagumana na atumiki wa Davide. Abisalomu wenze adapakira nyulu,* ndipo nyulu mwiyo idapita na pasi pa voyangayanga va nthawi za muti ukulu maninge. Pamwapo nsolo wa Abisalomu udakolowekewa muvoyangayanga mwivo koma nyulu yomwe wenze adapakira iyo idapita mwakuti idamusiya ali lere-lere. 10 Manje munthu munango adawona vimwivo nkuyenda kukauza Yowabu kuti: “Nawona Abisalomu ali lere-lere m’muti ukulu.” 11 Yowabu adabvunza munthu muyo kuti: “Peno wamuwona, ndawa chani ulibe kumupha nthawe mwiyo? Sembe wamupha, nidakakondwa maninge ndipo nidakakupasa kobiri 10 zasiliva komasoti bande.” 12 Koma munthu muyo adauza Yowabu kuti: “Podiya mudakanipasa kobiri 1000 zasiliva, nidakaphalini mwana wa mpfumu. Pale tidabva mpfumu inkukulamulani imwepo, Abisai na Itai kuti: ‘Aliyese osati akaphe Abisalomu.’ 13 Sembe niribe kubvera nkumupha, vidakadziwika kwa mpfumu ndipo imwepo sembe mulibe kunithandizira.” 14 Koma Yowabu adati: “Ayi kunichebwesa iwe!” Padateno adatenga volasira* vitatu ndipo adakalasa Abisalomu pantima adakali na moyo pakati pa voyangayanga va muti ukulu. 15 Patsogolo pake atumiki 10 onyamula vitsulo va nkhondo va Yowabu adabwera nkudzamalizisa kupha Abisalomu. 16 Pavidateno, Yowabu adaliza lupenga ya nyanga ya nkhosa ndipo wanthu adaleka kuthamangisa Aizirayeli. Pamwapo Yowabu adauza wanthu mwawo kuti aleke kumenya nkhondo. 17 Padateno, adatenga Abisalomu nkumuthusa mu chidindi chikulu mutheketa mumo ndipo adaunjikapo nthutu ikulu maninge ya minyala. Koma Aizirayeli wose adathawa nkuyenda m’mamiyi yawo.

18 Abisalomu ali moyo, adamanga chipilala chake mu Chigwa cha Mpfumu, pakuti iye adati: “Inepano niribe mwana mwamuna wakuti atenge dzina yangu kuti nimbakumbukiriwe.” Pamwapo chipilala mwicho adachipasa dzina yake ndipo chinkupitiriza kudziwika na dzina yakuti Chipilala cha Abisalomu mpakana lero.

19 Manje Ahimazi mwana wa Zadoki adati: “Tani nithamange nikapereke ntontholo kwa mpfumu, ndawa Yahova wachitira mpfumu chilungamo pakuipulumusa m’manja mwa wanthu omwe aizonda?” 20 Koma Yowabu adamuuza kuti: “Iwepo ukaperekelini ntontholo lero, udzapereke ntsiku inango. Lero ukaperekelini ntontholo ndawa mwana wa mpfumu wafa.” 21 Pamwapo Yowabu adauza munthu munango wa ku Kusi* kuti: “Yenda ukauze mpfumu vomwe wawona.” Munthu muyo adajolimira Yowabu nkuyamba kuthamanga. 22 Ahimazi mwana wa Zadoki adauza pomwe Yowabu kuti: “Peno chichitike ni chani, koma ko tani inembo nithamange kulondola munthu wa ku Kusi ule?” Koma Yowabu adati: “Mwana wangu, ndawa chani iwembo unkufuna kuyenda pakuti palibe mawu yakuti ukanene?” 23 Iye adangingimira nkunena kuti: “Peno chichitike ni chani, koma ko tani inepanombo nithamange?” Pamwapo Yowabu adati: “Thamanga!” Padateno Ahimazi adayamba kuthamanga kupitira njira yakuchigawo cha Yorodano ndipo adamupitirira munthu wa ku Kusi ule.

24 Davide wenze adakhala pakati pa misuwo yawiri ya mpanda wa thaundi ndipo gwarda adapakira padenga pa nsuwo wa mpanda wolumatidzana na mpanda wa thaundi. Pamwapo adawona munthu ankuthamanga ali yekha. 25 Pamwapo gwarda muyo adakuwa nkuuza mpfumu vimwivo. Mpfumu mwiyo idati: “Peno ali yekha, ndiye kuti ankubwera kudzanena ntontholo.” Munthu ule padafendera, 26 gwarda ule adawona pomwe munthu munango ankuthamanga. Pamwapo gwarda muyo adakuwa nkuuza gwarda wa pansuwo pa mpanda kuti: “Munthu munango pomwe ankuthamanga, ali yekha.” Mpfumu idati: “Muyo pomwe ankubweresa ntontholo.” 27 Gwarda muyo adati: “Momwe munthu woyamba muyo ankuthamangira, ninkuwona ninge ni Ahimazi mwana wa Zadoki.” Padateno, mpfumu idati: “Ahimazi ni munthu wabwino, ndipo abwera na ntontholo wabwino.” 28 Patsogolo pake Ahimazi adauza mpfumu kuti: “Vose viri bwino!” Padateno adagwadira mpfumu mwiyo nkujolima mpakana nkhope yake kufika pasi. Pamwapo adati: “Atamandike Yahova Mulungu wanu, yemwe wapereka wanthu omwe adakuphindukirani imwepo mpfumu!”

29 Koma mpfumu idati: “Ko mwana wangu Abisalomu ali bwino?” Ahimazi adadawira kuti: “Pomwe Yowabu ambatuma ntumiki wanu mpfumu na inepano, nidawona chipiringu chikulu, koma niribe kudziwa kuti chikuchitika ni chani.” 30 Pamwapo mpfumu idati: “Ima apa pambali.” Iye adachoka nkuima pambali.

31 Patsogolo pake munthu wa ku Kusi ule adafika, ndipo adanena kuti: “Nakubwereserani ntontholo mpfumu yangu. Lero Yahova wakuchitirani chilungamo pakukupulumusani m’manja mwa wanthu wose omwe adakuphindukirani.” 32 Koma mpfumu idabvunza munthu muyo kuti: “Ko mwana wangu Abisalomu ali bwino?” Iye adadawira kuti: “Azondi wanu wose mpfumu yangu komasoti wanthu wose omwe adakuphindukirani kuti akuchitireni voipa, akhale ninge iye.”

33 Vimwivi vidawawa maninge mpfumu ndipo idayenda muchipinda chapadzulu chapansuwo wa mpanda wa thaundi nkuyamba kulira, uku ankufambafamba. Mpfumu imbanena kuti: “Mwana wangu Abisalomu, mwana wangu, mwana wangu Abisalomu! Vidakakhala bwino nidakafa m’malo mwa iwepo, Abisalomu mwana wangu, mwana wangu!”