Samueli wachiwiri
15 Patsogolo pake Abisalomu adagumana ngolo yoguziwa* na makavalo komasoti amuna 50 wakuti ambathamange patsogolo pake. 2 Abisalomu ambamuka machibese maninge nkukaima mphepete mwa nsewu woyenda kunsuwo wa mpanda. Manje munthu aliyese akafika na mulandu wakuti atongewe na mpfumu, Abisalomu ambamuchemera nkumubvunza kuti: “Wachokera thaundi iponi?” Munthu muyo ambamuuza dzinza ya Izirayeli yomwe wachokera. 3 Patsogolo pake Abisalomu ambamuuza kuti: “Vomwe wanena ivi ni chaivo komasoti ni vobveka. Koma kwa mpfumu kulibe aliyese wakuti angabvesere nkhani yako iyi.” 4 Abisalomu ambanena pomwe kuti: “Vidakakhala bwino nidakaikhiwa kukhala wotonga milandu mudziko iyi. Sembe ninkuwonesesa kuti munthu aliyese yemwe wabwera na mulandu kwa inepano, wachitiriwa chilungamo.”
5 Komasoti munthu akafika pafupi kuti amujolimire, Abisalomu ambamuphata nkumulambiza ndipo ambamubejali. 6 Abisalomu ambachita vimwivi kwa Aizirayeli wose omwe ambabwera kwa mpfumu kuti adzatongewe milandu yawo. Pamwapo Abisalomu adapitiriza kuchitisa wanthu kuti ambamukonde.
7 Payadapita magole yanayi,* Abisalomu adauza mpfumu kuti: “Ninkukumbira kuti niyende ku Heburoni kuti nikakwanirise polomisi yomwe nidapolomisa Yahova. 8 Inepano ntumiki wanu pomwe nenze ku Gesuri, ku Siriya nidapolomisa kuti: ‘Yahova akanibvumiza kubwerera ku Yerusalemu, nidzapereke ntsembe kwa* Yahova.’” 9 Mpfumu idamudawira kuti: “Yenda mwantendere.” Pavidateno, adanyamuka nkuyenda ku Heburoni.
10 Manje Abisalomu adatumiza akapirikoni ku madzinza yose ya Izirayeli ndipo adawauza kuti: “Mukandobva kulira kwa nyanga ya nkhosa, mukuwe kuti: ‘Manje Abisalomu ni mpfumu ku Heburoni!’” 11 Pakuchoka ku Yerusalemu, Abisalomu adatenga amuna 200. Wanthu mwawa adawachemera ndipo adayenda koma ambadziwalini chirichose. 12 Komasoti pomwe Abisalomu ambapereka ntsembe, adachemeresa Ahitofeli wa ku Gilo, mulangizi wa Davide, kuchoka ku thaundi yakwawo ku Gilo. Wanthu omwe adabverana na Abisalomu pa chiwembu mwichi adapitiriza kuingizirika.
13 Paidapita nthawe, munthu munango adauza Davide kuti: “Wanthu wa mu Izirayeli ayamba kutewera Abisalomu.” 14 Nthawe mwiyoletu, Davide adauza atumiki wake wose omwe enze naye ku Yerusalemu kuti: “Konzekerani mwakankulumize! Naboni tithawe, ndawa palibe yemwe angapulumuke na Abisalomu. Kulumizani! Ndawa angatigumane nkutiwina patsogolo pake nkupha wanthu wose wa mu thaundi mwiyi na chibemba!” 15 Atumiki wa mpfumu adadawira kuti: “Ndise wokonzeka kuchita chirichose chomwe imwepo mpfumu yathu mwasalula.” 16 Pamwapo mpfumu idanyamuka pabodzi na wanthu wose wa m’banja yake. Koma mpfumu mwiyo idasiya akazi wake ang’ono 10, kuti ambasamalire pamuyi.* 17 Mpfumu idapitiriza ulendo wake pabodzi na wanthu wose omwe ambailondola ndipo adaima ku Beti-merehaki.
18 Manje atumiki wose wa mpfumu omwe adanyamuka nawo pabodzi, Akereti wose, Apeleti wose, Agiti wose komasoti amuna 600 omwe ambamulondola* kuchokera ku Gati adayamba kugwata kutsogolo kwa mpfumu mwiyo kuti idziwe wanthu omwe alipo. 19 Patsogolo pake mpfumu idauza Itai wa ku Gati kuti: “Ko nawembo unkuyenda kuponi? Bwerera ukakhale na mpfumu inyowani pakuti udachoka kwanu ndipo kuno ndiwe mulendo. 20 Iwepo wabwera dzulodzulo, manje lero uyambe kufambafamba na isepano nkumbayenda komwe inepano ninkuyenda? Bwerera, utenge pomwe abale wako awa ndipo Yahova akuwonese chikondi na kukhulupirika kwake!” 21 Koma Itai adadawira mpfumu kuti: “Nikulumbira pa dzina ya Yahova Mulungu wamoyo komasoti mpfumu yangu muli apa, kulikose komwe imwepo mungayende, inepano ntumiki wanu niyendembo kumuko, ndipo ndine wokonzeka olo kufa namwe pabodzi!” 22 Padateno Davide adamuuza kuti: “Gwata uyende.” Pamwapo Itai wa ku Gati adagwata pabodzi na amuna wose omwe enze naye komasoti na wana wose.
23 Pomwe Davide ambagwata na wanthu wose omwe enze naye, wanthu wose wa mudziko mwiyo ambalira mokuwa. Mpfumu yenze idaimirira pafupi na chigwa cha Kidironi ndipo wanthu wose ambayambuka kuyenda cha ku nsewu woyenda kuchipululu. 24 Zadoki nayembo wenze kumuko pabodzi na Alevi wose ali nyamule likasa ya pangano ya Mulungu chaiye. Alevi mwawo adatula pasi Likasa ya Mulungu chaiye ndipo Abiyatara wenze pamwapo mpakana wanthu wose adamaliza kugwata kuchokera muthaundi. 25 Koma mpfumu idauza Zadoki kuti: “Tengani Likasa ya Mulungu chaiye mubwerere nayo muthaundi. Yahova akanikomera ntima adzanibvumize kuti nibwerere muthaundi ndipo nidzaiwone. Nidzaone pomwe malo yomwe ikhala. 26 Koma akanena kuti: ‘Ninkukondwalini nawe,’ inepano nidzabvume virivose vomwe adzanichitire.” 27 Mpfumu idauza Zadoki wantsembe kuti: “Pale iwepo ndiwe wa masomphenya. Iwepo na Abiyatara bwererani ku thaundi mwantendere. Mubwerere pabodzi na wana wanu awiri, Ahimazi mwana wako mwamuna na Yonatani mwana mwamuna wa Abiyatara. 28 Inepano nikhale pamalo yoyambukira yomwe yali pafupi na chipululu mpakana pomwe nitambire ntontholo wochokera kwa imwepo wonidziwisa momwe vinthu viriri.” 29 Pamwapo Zadoki na Abiyatara adatenga Likasa ya Mulungu chaiye nkubwerera nayo ku Yerusalemu, ndipo ambakhala kumuko.
30 Pomwe Davide ambakwira phiri ya Maolivi, ambalira ndipo adabisa kunsolo. Iye ambafamba chithatha ndipo wanthu wose omwe ambafamba naye nawombo adabisa kunsolo ndipo ambalira. 31 Patsogolo pake Davide adauziwa kuti: “Ahitofeli nayembo ali mu gulu ya wanthu omwe ankukonza chiwembu na Abisalomu.” Davide padabva vimwivi adanena kuti: “Pulizi Yahova, chitisani kuti malangizo ya Ahitofeli yakhale yosathandiza.”
32 Davide padafika padzulu pa phiri, pomwe wanthu ambayenda kukatumikirira Mulungu, adaona Husai mbadwa ya Areki ankubwera kudzagumana naye, anam’khanjo wake wong’ambika komasoti anamadothi munsolo. 33 Davide adamuuza kuti: “Ukayendanane pabodzi, vithandizelini. 34 Koma ubwerere ku thaundi ndipo ukauze Abisalomu kuti: ‘Mpfumu, inepano ndine ntumiki wanu. Pakuyamba nenze ntumiki wa ababa wanu koma manjeuno ndine ntumiki wanu.’ Ukakateno, ukakwanise kunitsutsira malangizo ya Ahitofeli. 35 Zadoki na Abiyatara omwe ni wantsembe ali kumuko. Chirichose chomwe ukabve kumuyi kwa mpfumu, ukauze Zadoki na Abiyatara. 36 Iwo ali pabodzi na wana wawo awiri kumuko, Ahimazi mwana wa Zadoki na Yonatani mwana wa Abiyatara. Manje mukatume wana wawo mwawo kuti adzaniuze vose vomwe mukabve.” 37 Pamwapo Husai, munzake wa Davide, adayenda ku Yerusalemu panthawe yomwe Abisalomu ambangena muthaundi mwiyo.