Samueli wachiwiri

14 Yowabu, mwana wa Zeruya adadziwa kuti mpfumu inkufunisisa Abisalomu. 2 Pamwapo Yowabu adatumiza wanthu ku Tekowa kuti akatenge nkazi wochenjera. Padabwera naye adamuuza kuti: “Pulizi ukhale ninge munthu yemwe ankulira maliro, uvale vovala volirira maliro komasoti ayi kudzola mafuta. Ukhale ninge nkazi yemwe wakhala ankulira maliro kwa nthawe ikulu. 3 Uyende kwa mpfumu ndipo ukaiuze mawu aya.” Padateno, Yowabu adamuuza vati akanene.*

4 Nkazi wa ku Tekowa ule adayenda kukawonana na mpfumu, ndipo adagwada nkujolima mpakana nkhope yake kufika pasi, patsogolo pake adadzigwesa nkunena kuti: “Pulizi mpfumu nithandizeni!” 5 Manje mpfumu idamubvunza kuti: “Ko chashupa ni chani?” Nkazi muyo adadawira kuti: “Inepano ndine nkazi wamasiye, mwamuna wangu adamwalira. 6 Inepano ntumiki wanu nenze na wana awiri amuna. Ntsiku inango wana mwawo ali n’thengo adayamba kumenyana ndipo penze palibe owaletserera. Ndipo mwana munango adapha munzake. 7 Manje banja yose inkufuna kunipha inepano ntumiki wanu ndipo aliyese ankunena kuti: ‘Bweresa mwana yemwe adapha munzake ule. Tifuna timuphembo kuti tibwezere vomwe adachitira m’bale wake. Peno vimwivi vichitise kuti pakhale palibe wotambira chuma cha banja, palibe bvuto.’ Wanthu mwawa adzadzimwe tsimbe yamoto yomwe yasala ndipo adzasiye mwamuna wangu alibe dzina komasoti mbewu yosala padziko yapasi.”

8 Manje mpfumu idauza nkazi muyo kuti: “Yenda kumuyi kwanu ndipo inepano nipereke lamulo pa nkhani mwiyi.” 9 Nkazi wa ku Tekowa uyo adauza mpfumu kuti: “Mpfumu yangu, wophonya nikhale inepano na wanthu wa m’banja ya ababa wangu, koma imwepo mpfumu na mpando wanu wachifumu ndimwe osaphonya.” 10 Patsogolo pake mpfumu idanena kuti: “Peno aliyese angayankhule nawe pomwe va nkhani mwiyi, ubwere naye kwa inepano ndipo adzakubonereselini pomwe.” 11 Koma nkazi muyo adati: “Pulizi mpfumu, kumbukirani Yahova Mulungu wanu kuti munthu wobwezera magazi aleke kuchita voipa vinango komasoti osati aphe mwana wangu.” Pamwapo mpfumu idati: “Ninkulumbira pa dzina ya Yahova Mulungu wamoyo, olo tsitsi ibodzi ya mwana wako idzagwelini pasi.” 12 Manje nkazi muyo adati: “Mpfumu yangu, pulizi nibvumeni inepano ntumiki wanu kuti nikuuzeni mawu yabodzi.” Mpfumu idamuuza kuti: “Yankhula!”

13 Nkazi muyo adanena kuti: “Ndawa chani imwepo mpfumu mwachitira wanthu wa Mulungu vinthu ninge vimwivi? Vomwe mwayankhula ivi imwepo mpfumu, vinkuwonesa kuti ndimwe wophonya ndawa mudathamangisa mwana wanu ndipo mulibe kumuchemeresa kuti abwere pomwe. 14 Tose isepano tidzafe ndipo tidzakhale ninge madzi yotayika yomwe yawolekalini. Koma Mulungu akuphalini munthu koma aganizira vifukwa vakuti munthu yemwe wathamangisiwa aleke kupitiriza kukhala wothamangisiwa. 15 Nabwera kudzakuuzani vimwivi mpfumu yangu ndawa wanthu ankunichitisa mantha. Mwakuti inepano ntumiki wanu nidaganiza kuti: ‘Tani nikayankhule na mpfumu. Panango mpfumu idzabvere vomwe kapolo wake wakumbira. 16 Mpfumu inganibvere nkunipulumusa kwa munthu yemwe ankufuna kupha inepano komasoti mwana wangu m’bodzi muyo kuti osati titambire chuma chabanja chomwe Mulungu adatipasa.’ 17 Manje inepano ntumiki wanu nidati: ‘Mawu ya mpfumu yangu yaninyamalise,’ pakuti imwepo mpfumu yangu muli ninge mngelo wa Mulungu chaiye, pakusiyanisa chabwino na choipa. Yahova Mulungu wanu akhale namwe.”

18 Pamwapo mpfumu idauza nkazi muyo kuti: “Ayi kunibisira chirichose pa vomwe ninkufuna kukubvunza.” Nkazi muyo adanena kuti: “Yankhulani mpfumu yangu.” 19 Patsogolo pake mpfumu idamubvunza kuti: “Ko Yowabu ndiye wakutuma?” Nkazi muyo adadawira kuti: “Ninkulumbira pali moyo wanu imwepo mpfumu yangu, vomwe imwepo mwanena ni chaivo. Ntumiki wanu Yowabu ndiye wanituma kuti nidzanene vose vomwe nayankhula ivi. 20 Ntumiki wanu Yowabu wachita vimwivi kuti muchinje momwe munkuiwonera nkhani mwiyi. Koma imwepo mpfumu yangu munanzeru ninge mngelo wa Mulungu chaiye, mwakuti munkudziwa vose vomwe vinkuchitika mudziko iyi.”

21 Pavidateno mpfumu idauza Yowabu kuti: “Viri bwino, nichite vomwe wanena. Yenda ukatenge Abisalomu ndipo ubwere naye.” 22 Yowabu padabva vimwivi adagwada nkujolima mpakana nkhope yake kufika pasi ndipo adatamanda mpfumu. Yowabu adati: “Inepano ntumiki wanu nadziwa kuti lero mwanikomera ntima, mpfumu yangu, ndawa imwepo mpfumu mwabvera vomwe inepano ntumiki wanu nakumbira.”* 23 Patsogolo pake Yowabu adayenda ku Gesuri ndipo adakatenga Abisalomu nkubwera naye ku Yerusalemu. 24 Koma mpfumu idanena kuti: “Ayende kumuyi kwake, ayi kuti awonane nane.” Pamwapo Abisalomu adayenda kumuyi kwake, ndipo alibe kuwonana na mpfumu.

25 Mu Izirayeli mwenze mulibe mwamuna wokhuza maninge kuposha Abisalomu. Iye wenze alibe bvuto iriyose* kuyambira kuminyendo mpakana kunsolo. 26 Abisalomu ambagera tsitsi yake kumapeto kwa gole iriyose ndawa imbamulemera maninge. Ndipo akagera tsitsi yake mwiyo, imbalemera masekeli 200* akaipima na mwala wachifumu wopimira kulema kwa vinthu.* 27 Abisalomu wenze na wana amuna atatu na mwana nkazi m’bodzi, dzina yake Tamara. Iye wenze mtsikana wokhuza maninge.

28 Abisalomu adakhala ku Yerusalemu kwa magole yawiri koma alibe kuwonana na mpfumu. 29 Patsogolo pake, Abisalomu adachemeresa Yowabu kuti amutume kwa mpfumu, koma Yowabu alibe kuyenda kwa Abisalomu. Iye adamuchemeresa pomwe kachiwiri, koma adalamba. 30 Pavidateno, Abisalomu adauza anyabasa wake kuti: “Pafupi na munda wangu pali munda wa Yowabu ndipo muli balere. Muyende mukaushoke.” Pamwapo atumiki wa Abisalomu adayenda kukaushokadi munda muyo. 31 Pavidateno Yowabu adayenda kumuyi kwa Abisalomu nkukamubvunza kuti: “Ndawa chani anyabasa wako ashoka munda wangu?” 32 Abisalomu adadawira kuti: “Inepano nidakutumizira mawu yakuti: ‘Ubwere kuno nikutume kwa mpfumu ukanene kuti: “Ndawa chani nidabwerako ku Gesuri? Vidakakhala bwino nidakandokhala kumuko. Nikufuna niwonane na mpfumu, ndipo peno ndine wophonya, mpfumu iniphe.”’”

33 Pamwapo Yowabu adayenda kwa mpfumu nkukanena mawu mwaya. Manje mpfumu idachemeresa Abisalomu ndipo iye adayenda. Padafika adagwada nkujolima, patsogolo pake adadzigwesa pasi pamaso pa mpfumu. Pavidateno, mpfumu idamubejali Abisalomu.