Samueli wachiwiri
16 Davide padamaliza kukwera phiri ire, adagumana Ziba ntumiki wa Mefiboseti ankudikhira kuti agumane naye. Iye wenze na abulu awiri omwe enze na vishalo alinyamule mikate 200, makeke* 100 ya uva, makeke 100 ya vipaso va nchisalo* na m’tsuko ukulu wa vinyu. 2 Manje mpfumu idabvunza Ziba kuti: “Ndawa chani wabweresa vinthu vimwivi?” Ziba adadawira kuti: “Abulu awa nabweresera wanthu wa m’banja ya mpfumu kuti ambapakirepo, mikate na makeke ya vipaso va nchisalo nabweresera alumbwana kuti adye ndipo vinyu uyu nabweresera wanthu omwe aneta muchipululu, kuti ambamwe.” 3 Patsogolo pake mpfumu idabvunza kuti: “Manje mwana* wa abwana wako ali kuponi?” Ziba adauza mpfumu kuti: “Wakhala ku Yerusalemu ndipo wanena kuti: ‘Lero Aizirayeli anibwezere ufumu wa ababa wangu.’” 4 Patsogolo pake mpfumu idauza Ziba kuti: “Vinthu vose vomwe venze va Mefiboseti vikhale vako.” Ziba adanena kuti: “Ulemu wanu mpfumu. Pitirizani kunikomera ntima mpfumu yangu.”
5 Mpfumu Davide paidafika ku Bahurimu, mwamuna munango wa m’banja ya Sauli, dzina yake Simeyi, mwana wa Gera adatulukira ankuyankhula mawu yonyoza. 6 Iye adayamba kuponyera minyala Davide, atumiki wose wa mpfumu Davide, wanthu wose komasoti amuna wose wamphanvu omwe enze kumakulu na kumadzere kwa mpfumu. 7 Simeyi ambanena kuti: “Choka! Choka! Munthu wakupha wanthu komasoti wachabechabe! 8 Yahova wakubwezera mulandu wakupha wanthu* wa m’banja ya Mpfumu Sauli yemwe iwepo udangena m’malo yake. Yahova wapereka ufumu m’manja mwa Abisalomu mwana wako. Ndipo tsoka yakugwera ndawa ya mulandu wakupha wanthu!”
9 Patsogolo pake Abisai mwana wa Zeruya adauza mpfumu kuti: “Ndawa chani mbwaya yakufa iyi inkukunyozani mpfumu yangu? Tani niyende nikamugwate nsolo?” 10 Koma mpfumu idati: “Ko munavo basa yanyi imwepo wana wa Zeruya? Musiyeni anyoze ndawa Yahova wamuuza kuti: ‘Munyoze Davide!’ Manje ni mbani angamubvunze kuti: ‘Ndawa chani unkuchita vimwivi?’” 11 Pamwapo Davide adauza Abisai na atumiki wake wose kuti: “Peno mwana wangu chaiye, wobereka nekha ankufuna kunipha, kuli tani munthu wadzinza ya Benjamim? Musiyeni anyoze, ndawa Yahova ndiye wamuuza. 12 Panango Yahova awone mabvuto yangu, ndipo Yahova adzabwezerese vabwino kwa inepano m’malo mwa vomwe Simeyi ankunena lero pakuninyoza.” 13 Pamwapo Davide na amuna omwe ambafamba nawo adapitiriza ulendo wawo. Simeyi ambafamba m’mbali mwa phiri pafupi na Davide, uku ankuyankhula mawu yonyoza, kuwaponyera minyala na kuwaza pfumbi izinji.
14 Paidapita nthawe, mpfumu na wanthu wose omwe enze nayo adafika komwe ambayenda ali woneta maninge ndipo adayamba kupumula.
15 Abisalomu na amuna wose wa Izirayeli, adafika ku Yerusalemu ndipo Ahitofeli wenze naye pabodzi. 16 Husai mbadwa ya Areki, munzake wa Davide, padafika kwa Abisalomu adauza Abisalomu kuti: “Mpfumu ikhale na moyo utali! Mpfumu ikhale na moyo utali!” 17 Pavidateno, Abisalomu adabvunza Husai kuti: “Ko vomwe wachita ivi waonesa munzako chikondi chokhulupirika? Ndawa chani ulibe kuyenda naye pabodzi munzako muyo?” 18 Husai adadawira Abisalomu kuti: “Neye, inepano niri kumbali ya munthu yemwe wasankhuliwa na Yahova komasoti yemwe wasankhuliwa na wanthu awa na amuna wose wa mu Izirayeli. Inepano nidzakhale na munthu muyo. 19 Nibwerezere kunena kuti, ningatumikire pomwe mbani? Nifunika kutumikira mwana wake. Inepano nikutumikireni imwepo ninge momwe nidachitira na ababa wanu.”
20 Patsogolo pake Abisalomu adauza Ahitofeli kuti: “Nipaseni malangizo. Nichite chani?” 21 Ahitofeli adauza Abisalomu kuti: “Ugone na azikazi ang’ono wa ababa wako omwe awasiya kuti ambasamalire nyumba.* Ukachita teno Aizirayeli wose adzabve kuti wadziipisa pamaso pa ababa wako, ndipo udzapase mphanvu wanthu omwe ali kumbali yako.” 22 Pamwapo adamangira Abisalomu tenti padenga, ndipo Abisalomu adayamba kugona na azikazi ang’ono wa ababa wake, Aizirayeli wose ankuwona.
23 Panthawe mwiyi, malangizo ya Ahitofeli yambaoneka ninge ni mawu yochokera kwa Mulungu chaiye. Umu ni momwe Davide na Abisalomu ambawonera malangizo yose ya Ahitofeli.