Landula Gukolesa Ufuta Waye nu Yehowa Gula Wangina Makhalasa Aleha

1-2. a) Itshi udi naye gulandula gutshita gula wazula desizio dia gungina makhalasa aleha? b) Mbimbi “tubembigo guwenda mu luholo luatagana mu njila yene imoshi” jidi mukotelesa itshi? (Filiphi 3:16)

AKOMBELEDI a Yehowa ako azudile gale desizio dia gungina makhalasa aleha gungima dia gumanesela khalasa. Ana tshita ngenyi handaga makhalasa ene ajiya guakuatesa ha guheta mudimo mbawakuatesa ha gudihana mu mudimo wa Yehowa. Gula wazula desizio dia gungina makhalasa aleha, itshi mbayigukuatesa ha gubamba ufuta waye nu Yehowa? (Yak. 4:8a) Tangua wakhalele mu makhalasa a gu mbongo, wataganele nu ndaga jiavula jialolele gutshigina guaye nu wajibingile nji. Uvi henyaha udi naye gulandula “guwenda mu luholo luatagana mu njila yene imoshi,” yakotelesa egi udi naye gulandula gukombelela Yehowa nu gujinginyina guagasue gifua luholo wana guyitshita gale.​—Tanga Filiphi 3:16.

² Mbimbi jia Greke jiabalumuiwe egi “guwenda mu luholo luatagana mu njila yene imoshi” akhalele gujikalegela muavula gudi masuta, akhalele gujikalegela ha guzuelela luholo masuta ana wenda hamoshi gumagana ndo, gutala nji ndo gungima. Gula wazula desizio dia gungina makhalasa aleha, udi naye gutshita yagasue ha gulandula “guya gutuama” mu mudimo wa Yehowa gumagana ndo fundo dimoshi, gutala nji ndo gungima. Longo edi diza muzuelela malongo a Biblia nguana ajiya gugukuatesa. Idi yadiago egi udi mujiya malongo ene muabonga, waakalegele nji mu masugu abalega. Uvi udi naye gulandula guakalegela tangua mbawukhala gu khalasa nu tangua mbawumanesela gulonguga.

BAMBA PROGRAME YAYE YABONGA YA GUTSHITA NDAGA JIA MU NYUMA

3. Ndaga jitshi jiajiya gugubuila gula wangina makhalasa aleha?

³ Ndaga yajiya gugubuila. Makhalasa aleha ajiya guguzula tangua diavula, ngenyi mbayikhala lamba gudi aye ha gutshita ndaga jiko wakhalele mutshita lusugu nu lusugu. Luholo udi mutshigina gudihana muavula gu khalasa, wajiya gusendesa gutangiza egi mudimo wa Yehowa ushigo diago nu ndando. Wajiya gusendesa gudifula gudibungisa gua mu hungu, gubemba guya mu mudimo wa gulongesa, gutshita gulonguga guaye hakhaye nu isambu.​—Gumo. 2:4.

4. Mukunda natshi idi nu ndando egi ulandule gukhala “nu ndaga jiavula jia gutshita mu mudimo wa Fumu”? (1 Kolinto 15:58)

⁴ Tanga 1 Kolinto 15:58. Hagula egi inzo imoshi isale ya gumagana gula funji yakola yabunda, idi naye gukhala nu makunji akola. Aye nji gula udi mutshigina gusala wagumagana mu nyuma, udi naye gukhala “tangua diagasue nu ndaga jiavula jia gutshita mu mudimo wa Fumu,” mu mudimo wa Yehowa. Mbimbi ‘khala tangua diagasue nu ndaga jiavula jia gutshita’ jishigo mumonesa phamba tangua wana balegesa mu ndaga jia nyuma. Uvi jidi nji mumonesa ndaga jidi naye gukhala diago nu ndando mu monyo waye, yakotelesa egi udi naye gumonesa egi wana gudihana mu mudimo wa Yehowa ishigo handaga waheta tangua uvi handaga yene ndaga yabalega ndando mu monyo waye. Khala mujiya egi udi thomo mukombeledi wa Yehowa, ndaga jiaye jia khalasa jidi naye guza gungima. (Mat. 22:37) Phangi Samantha udi muzuela egi: “Gutuama dia gungina mu khalasa, ngazuelele egi gula ndaga jia khalasa jiasendesa gubinda mudimo wami mukunda nu Yehowa, mbangubemba khalasa mbala imoshi.”

5. Itshi wajiya gutshita ha gulandula gusha ndaga jia mu nyuma ha fundo dia thomo?

⁵ Ndaga wajiya gutshita gutuama dia gusendesa makhalasa aleha. Tshita yagasue ha gusha ndaga jia mu nyuma ha fundo dia thomo. Dihule egi: ‘Itshi ngajiya gutshita hagula egi ngukhale nu tangua dia guya mu gudibungisa gua mu hungu, mu mudimo wa gulongesa nu gutshita gulonguga guami hakhami?’ (Yosh. 1:8; Mat. 28:19, 20; Heb. 10:25) Dihule nji egi: Itshi yakhalele gungukuatesa ha gusha ndaga jia mu nyuma ha fundo dia thomo tangua ngakhalele mu makhalasa a gu mbongo? Gula wamona egi wakalegelego diago ndaga muabonga mu masugu abalega, itshi wajiya gutshita mangino ha gusombegesa? Tshita yagasue ha gusha ndaga jia mu nyuma ha fundo dia thomo tangua udi mungina makhalasa aleha. Gudihana gu khalasa gushigo ndaga yabola, uvi ubembigo egi makhalasa ene aguzule tangua nu ngolo jiagasue wajiya gukalegela mu mudimo wa Yehowa.a​—Mat. 6:24.

6. Mihu itshi wajiya gudihula ha gujiya gula aye gaye mulandula gusha Yehowa ha fundo dia thomo? (Tala nji gifuanesa.)

⁶ Tangua udi mungina makhalasa aleha, khala guditadila tangua diagasue, wajiya guyitshita mbeji nu mbeji. Dihule egi: ‘Ame mulandula gusha ndaga jia mu nyuma ha fundo dia thomo ba?’ Mihu yajiya gugukuatesa ha guhana mvutu gu muhu wene yenyeyi: ‘Ngabui gale gudifula gudibungisa gua mu hungu? Nga ndo masugu awa ngabui gale guheta mu gudibungisa guene ngusangi asendesa gale ba? Ngabui gale gutangiza ndaga jia khalasa tangua ngudi mu gudibungisa ba? Ngasendesa gale gulandula gudibungisa gua mu hungu phamba mu Zoom ba?’ Gula wamona egi ushigo luko mutshita isambu, gutanga Biblia nu guya mu mudimo wa gulongesa nu gikhesa giagasue gifua luholo wakhalele guyitshita thomo, sombegesa muphushi. Ubembigo egi ndaga jiaye jia khalasa jizule fundo dia thomo mu monyo waye.

BAMBA MATANGI AYE MUABONGA

7. Luholo lutshi makhalasa aleha ajiya gusombegesa matangi aye?

⁷ Ndaga yajiya gugubuila. Gula wangina makhalasa aleha, matangua ako ajiya gusendesa gumilongesa ndaga jia ‘filozofi nga malongo a mambo’ gifua longo dia évolution nga malongo ana zuela egi Nzambi gashigo guene. (Kol. 2:8) Muajiya nji gusendesa gulonguga ndaga jiajiya gugutuma ha gusendesa gudishila mutshima. Phangi mumoshi wa muvuala udi muzuela egi: “Akhalelego gutulongesa phamba ndaga jiajiya gutukuatesa ha guheta mudimo, akhalele nji gutulongesa luholo lua gutangiza lunu luakhalelego gudivua nu matangi a Yehowa. Ha gufezegesa, akhalele gutulongesa egi ha gukhala nu gusuanguluga udi naye gusha mutshima mu ndunge jiaye. Ndaga yene yasendesele gungutuma ha gutangiza egi ngajiya gami gukhala nu gusuanguluga ikhale ngakambelego ukuateshi wa Yehowa. Yangubuidile nji lamba ha gumushila mutshima.”

8. Mukunda natshi idi nu ndando ha “gubamba khadilo dia gutangigiza muabonga”? (Ishima 5:1, 2)

⁸ Tanga Ishima 5:1, 2. Biblia yana zuela egi udi naye ‘gubamba khadilo diaye dia gutangigiza muabonga.’ Tuana bamba gima gimoshi ngenyi gula tudi mujiya egi muthu udi mutshigina gugibolesa nga gugikuya. Udi naye nji gutshita ngenyi nu matangi aye. (1 Phet. 5:8) Enya ha mavu awa ana kamba gugutuma ha gukhala nu badute mu ndaga gifua mikhuala ya Nzambi, luholo monyo wasendesele nga ndo gula Nzambi wakhala guene. Ajiya gumonesa gifua matangi awo adi ‘abalega’ gubonga, uvi mu guzuela guabonga ishigo ngenyi. Biblia yana monesa egi “ndunge jia ha mavu awa jidi guheya.”​—1 Kol. 3:18-20.

9. Itshi wajiya gutshita ha gubamba khadilo dia gutangigiza muabonga?

⁹ Ndaga wajiya gukalagala gutuama dia gungina makhalasa aleha. Kamba gujiya gula gutshigina guaye mu ndaga Biblia yana longesa gudi guakola gutuama dia gungina makhalasa aleha, handaga gutshita ngenyi mbagugukuatesa ha gubamba khadilo dia gutangigiza muabonga. Dihule egi: ‘Mukunda natshi ngana tshigina egi Nzambi wakhala guene? Itshi yana gungutshiginyisa egi Biblia idi Mbimbi yenji? Itshi yana gungutshiginyisa egi mikhuala ya Nzambi idi mu Biblia idi nu ndando gubalega mikhuala ya ha mavu awa?’ Tangiza gale tangua wakhalele gu makhalasa a gu mbongo, idi yadiago egi wakhalele mumona ndaga jiajiya gubolesa matangi aye. Ha gufezegesa, tangua an’a khalasa ako akhalele mutshigina egi ima yagasue yadizogelele, ndaga yene yalebesele gutshigina guaye ba? Wakhalele nji muvua nzala ya gutshita ndaga gifua an’a khalasa dienu ba? Gula wamona egi wakalegelego ndaga mu luholo luabonga mu masugu abalega, itshi wajiya gutshita ha gukolesa gutshigina guaye mangino? Gula udi mungina makhalasa aleha, tshita yagasue ha gubamba khadilo dia gutangigiza muabonga.​—2 Tim. 2:16-18.b

10. Itshi yajiya gugukuatesa ha gubamba matangi aye?

¹⁰ Tangua mbawungina makhalasa aleha, tshita yagasue ha gukhala guditadila tangua diagasue. Dihule egi: ‘Ngasendesa gale gutangiza egi ndaga jidi mutshita athu ngana khala nawo jishigo diago jiabola ikhale ndaga jiene jiana suanguluisa ndo Yehowa ba? Ngudi nu luholo lua gukotelesa egi ndaga adi gutulongesa jidi khuta matangi a athu a ha mavu awa ba? Ngana gusha diago mutshima egi phamba Ufumu wa Nzambi mbawumanesela milonga yagasue ya ha mavu ba?’ Gula udi mutshigina gubamba matangi aye, landula gulonguga Biblia muabonga. Gulonguga Biblia nu gutangigiza ndaga jiene mbagugukuatesa ha gukolesa gutshigina guaye egi wakhala mu giamatshidia.​—1 Tim. 4:15.

KHALA MUKALEGELA TANGUA DIAYE MUABONGA

11. Mukunda natshi yajiya gukhala lamba ha gukalegela tangua diaye muabonga tangua udi mulonguga makhalasa aleha?

¹¹ Ndaga yajiya gugubuila. Gulonguga makhalasa aleha guajiya guguzula tangua diavula, muavula-muavula gula udi gudilonda mukunda nu examen nga ndo mudi mutshita projet imoshi ngenyi mudi naye gumanesela gu khalasa. Gula ushigo mukalegela tangua diaye muabonga, wajiya gukata muto nga guhuila muavula. Gishina giene udi naye gubamba sante yaye nu matangi aye muabonga.

12. Ndaga jitshi jiajiya gugutoga egi ‘ukalegele tangua diaye mu luholo luabonga’? (Efeso 5:15, 16)

¹² Tanga Efeso 5:15, 16. Matangua ako, yajiya gugukhalela lamba ha ‘gukalegela tangua diaye mu luholo luabonga.’ Yajiya gukhala ngenyi gula udi nu ndaga jiavula jia gutshita. Ha gufezegesa, katula gudihana gu khalasa, mbawukhala nu funu ya tangua dia gubalegesa nu enya fami yaye nu aphangi a mu hungu. (Ngi. 133:1; Ish. 18:1) Mbawukhala nji nu funu ya tangua dia gutshita ndaga jia mu nyuma handaga yene ndaga yabalega ndando mu monyo waye. (Mat. 6:33) Mbawukhala nji nu funu ya tangua dia gukuatesa enya fami yaye nu dia guya gu mudimo. Mbawukhala nji nu funu ya tangua dia gutshita ndaga jiajiya gugukuatesa ha gubamba sante yaye muabonga gifua gutshita ba exercice nu guhuluguga muabonga. (Mulo. 4:6; 1 Tim. 4:8) Hene, ha gutshita ndaga eji jiagasue udi naye gujiya luholo lua gukalegela tangua diaye muabonga.

13. Itshi yajiya gugukuatesa ha gukalegela tangua diaye muabonga?

¹³ Ndaga wajiya gutshita gutuama dia gusendesa makhalasa aleha. Biblia yana zuela egi muthu udi mudianga gudilondega mbawubinga. (Ish. 21:5) Gishina giene, londega programe yabonga gutuama egi ungine makhalasa aleha. Mihu yajiya gugukuatesa yenyeyi: Luholo lutshi wakhalele mukalegela tangua diaye tangua wakhalele mu makhalasa a gu mbongo? Gula wamona egi wakalegelego diago ndaga muabonga mu masugu abalega, itshi wajiya gutshita mangino ha gusombegesa? Tshita yagasue ha gukhala nu programe yabonga hagula egi ulabigo gukata muto.c

14. Mihu itshi yajiya gugukuatesa ha guditadila muabonga?

¹⁴ Tangua mbawungina makhalasa aleha, tshita yagasue ha gukhala guditadila tangua diagasue. Dihule egi: ‘Ndaga ngana tshita gu khalasa jiana gungushila tangua dia guhuluguga nu gutshita ba exercice ba? Jiana gungushila nji tangua dia gubalegesa nu aphangi a mu hungu ba? Ngudi nu luholo lua gumanesela badevuare ami mu tangua diabonga ba? Gula ngushigo nu luholo lua gutshita ngenyi, idi handaga ngudi nu ndaga jiavula jia gutshita nga ndo handaga ame ngana laba gubalegesa tangua? Mafuta ami nu enya fami yami adi mutangiza egi ngudi naye gusombegesa ba?’ Gula wamona egi udi naye gusombegesa programe yaye nga luholo luaye lua gukalegela tangua, itshite muphushi. Wajiya nji gutoga malongo gudi athu ana kalegela tangua diawo mu luholo luabonga.​—Ish. 11:14.

KHALA “MUWENDA NU ATHU ATEMA”

15. Ndaga itshi yajiya gugubuila tangua mbawukhala mulonguga makhalasa aleha?

¹⁵ Ndaga yajiya gugubuila. Tangua mbawukhala mulonguga makhalasa aleha, an’a khalasa dienu ajiya gusendesa gugutamega ha gubalegesa nawo tangua gungima dia matangua a khalasa. Wajiya nji gutangiza egi gutshita ngenyi gudi ndaga yabonga. Wajiya gutangiza ngenyi handaga mudi nawo gindongo gimoshi, muana balegesa gale tangua diavula hamoshi mu khalasa nu muana suanguluga nji nu ndaga jia luholo lumoshi. Wajiya nji gusendesa gutangiza egi aye nu an’a khalasa dienu mudi nu ndaga jiavula jia gutshita hamoshi gubalega ndaga wana tshita nu aphangi a mu hungu. Uvi udi naye gumonesa gutema. Wajiya gukhala nu ndaga jiavula jia gutshita hamoshi nu an’a khalasa dienu, uvi ujimbilago egi aye nu ene mushigo luholo lumoshi handaga aye wana tshigina gusuanguluisa Yehowa uvi ene ndo. Gula udi mubalegesa nawo tangua diavula, wajiya gusendesa gutangiza gifua ene. (1 Kol. 15:33) Yene ndaga yabuidile phangi Michael. Wanginyile khalasa dia gulonguga ndaga jia zembo (électricité) ivo nguana, udi muzuela egi: “Ngakhalele mutshita mudimo masugu agasue nu mafuta ami a mudimo anyi akhalelego munemesa akhetu, akhalele mutegelela miziki yabola, akhalele nji muzuela mbimbi jiabola ha kano. Mage-mage ame nji ngasendesele gutangiza gifua ene.”

16. ‘Guwenda nu athu atema’ gudi mukotelesa itshi? (Ishima 13:20)

¹⁶ Tanga Ishima 13:20. Biblia yana gututemesa gu malamba ajiya gutubuila gula tudi nu mafuta abola. Uvi yana gutuwambela nji egi: “Muthu udi muwenda nu athu atema mbawubua watema.” Longo tuajiya guzula didi egi: Athu tuana balegesa nawo tangua ajiya gututuma ha gutshita ndaga jiabonga nga jiabola. Hene, landula gukolesa ufuta waye nu athu ana guguzumba, anyi ana kombelela Yehowa nu mutshima wagasue gifua aye.​—Ngi. 101:6, 7; 119:63.

17. Itshi wajiya gukalagala ha gutuna gubalegesa tangua diavula nu athu anago guzumba Yehowa?

¹⁷ Ndaga wajiya gutshita gutuama dia gusendesa makhalasa aleha. Dishile mididilo. Phangi Trenton udi muzuela egi: “Ngana gudivua muabonga nu an’a khalasa dietu, uvi nganago gubalegesa nawo tangua gungima dia matangua a khalasa. Mukunda nu ame, adi phamba an’a khalasa dietu uvi ashigo diago mafuta ami.” Na mididilo itshi wajiya gudishila? Mihu yajiya gugukuatesa ha guhana mvutu gu muhu wene yenyeyi: Luholo lutshi wakhalele mubalegesa tangua nga gutshita ndaga nu an’a khalasa dienu tangua wakhalele gu makhalasa a gu mbongo? Gula wamona egi wakalegelego diago ndaga muabonga mu masugu abalega, itshi wajiya gutshita mangino ha gusombegesa? Tshita yagasue ha gulandula ‘guwenda nu athu atema’ nu gutuna gubalegesa tangua diavula nu athu anago guzumba Yehowa.d

18. Mihu itshi udi naye gudihula? (Tala nji gifuanesa.)

¹⁸ Tangua mbawukhala gu khalasa, khala gudihula tangua diagasue egi: ‘Ngasendesa gale gukuata ufuta wakola nu an’a khalasa dietu ba? Ngabui gale muzuela, mutangiza nga gutshita ndaga jiko gifua ene ba? Yehowa mbawukhala nu gusuanguluga gula athu a luholo elu abua mafuta ami ba?’ (Ngi. 1:1) Gula wamona egi gudi nu ndaga ishigo muyila luko muabonga, sombegesa muphushi. Kuata ufuta phamba nu athu ana zumba Yehowa gifua aye. Ukhadigo nji muvua musonyi ha gulongesa mafuta aye a khalasa. Gulonguga nawo hamoshi gudi diago okazio yabonga wajiya guakuatesa ha gujiya giamatshidia.

DIANGA GUDILONDEGA

19. Luholo lutshi wajiya gudilondega mukunda nu malamba ajiya gugubuila tangua mbawungina makhalasa aleha? Hana gifezegeselo.

¹⁹ Muthu udi mutshigina gukanduga gu mulundu wana gudilondega muabonga gutuama. Ikhale gashigo mujiya malamba ajiya gutagana nawo muene, uvi wana tshita yagasue ha gukhala nu sante yabonga nu ngolo, wana sudiga muabonga nu wana jiya fundo didi muya muene. Aye nji wajiya gudilondega ngenyi mukunda nu makhalasa aleha. Landula gukolesa gutshigina guaye, sudiga “iluilo yagasue yana hana Nzambi,” ujimbilago nji gishina udi munginyila makhalasa aleha. Felela diaye dishigo naye gukhala dia gubua nu makuta avula nga gukamba lutumbu ha mavu awa, uvi didi naye gukhala dia gusuanguluisa Yehowa nu gumutumbuisa mu ndaga jiagasue udi mutshita.​—Ef. 6:11-13; 1 Kol. 9:26, 27; 10:31.

20. Luholo lutshi wajiya gulandula ‘guditala muabonga ha gujiya gula udi nu gutshigina’?

²⁰ Biblia idi gutuwambela egi: “Khalenu guditala muabonga ha gujiya gula mudi nu gutshigina; khalenu nji guditala muabonga tangua diagasue ha gujiya gula mudi athu a luholo lutshi.” (2 Kol. 13:5) Yene ndaga wajiya gutshita gula wangina makhalasa aleha. Luholo lutshi wajiya guyitshita? Wajiya guyitshita gula wakamba mvutu gu mihu eyi: Aye gaye mulandula gubamba programe yaye ya gutshita ndaga jia mu nyuma ba? Aye mulandula gubamba matangi aye gu malongo a mambo a ha mavu awa ba? Wana kalegela tangua diaye mu luholo luabonga ba? Udi mulandula gukuata ufuta nu aphangi a mu hungu nu udi mutuna mafuta abola ba? Muthu wagasue mukatshi dietu wajiya gudihula mihu eyi ikhale tudi gu khalasa, ha fundo dia mudimo nga ha fundo ditshi diko. Zula desizio dia gukhala nu gutshigina guakola gudi Yehowa mu ndaga jiagasue udi mutagana najio. Wajiya diago gusha mutshima egi gula watshita ngenyi, Yehowa mbawugushimbiga.​—Ish. 3:5, 6.