Khala Munemesa Badesizio a Athu Ako

1-2. Mukunda natshi matangua ako badesizio etu akhala a gudisha nu a aphangi ako?

YAJIYA gukhala egi wazudi desizio dimoshi ngenyi uvi gungima wavua egi athu adi muzuela ndaga jiabola mukunda nu aye. Nga ndo yajiya gukhala egi aye wazuedi ndaga jiabola mukunda nu desizio diazudi phangi mumoshi wa Muklisto. Mu guzuela guabonga mukut’etu agasue ndaga ya luholo elu yatubuidile gale.

² Tushigo naye gudihula gula matangua ako badesizio etu ashigo gudivua nu a aphangi’etu Aklisto. Mukunda natshi? Handaga tuakhala a gudisha. Muthu wagasue mukatshi dietu wakhala nu luholo luenji lua gutangiza. Mafundo tuakudile, fami yetu nga ndaga jiatubuidile jiajiya gutshita egi tukhale mutangiza mu luholo lumoshi ngenyi. Uvi tushigo naye gubemba egi luholo matangi etu akhala a gudisha nu a aphangi ako lukatule guhuima nu gudivua tuakhala nago mu hungu.​—Ef. 4:3.

3. Itshi tuajiya gutshita gula tuasuangulugilego nu desizio dia phangi mumoshi?

³ Gula phangi mumoshi wazula desizio tushigo musuanguluga nadio, tuajiya gutangiza egi idi ndaga yabonga ha gumuwambela ha gusombegesa matangi enji nga guwambela athu ako egi wazudi desizio diabola. Yajiya gukhala egi tudi mutshita ngenyi handaga tudi gudisagesa mukunda nu phangi’etu. Tuana zumba aphangi etu agasue nu tuana tshigina egi akhale muabonga. (Ish. 17:17) Hene, tuanago gutshigina egi azule badesizio abola anyi ajiya gubolesa ufuta wawo nu Yehowa.

4-5. Itshi tudi naye gukalagala gula phangi mumoshi wazula desizio dimoshi dishigo gutusuanguluisa?

⁴ Tudi naye guya mumona phangi ha guta n’enji maga gula tushigo musuanguluga nu desizio diazudi muene ba? Mvutu yajiya gukhala egi ayi nga ndo handaga gudi nu ndaga tudi naye gutadila gutuama dia gutshita ngenyi. Ha gufezegesa, gula tuamona egi ndaga idi mutshigina gutshita muene idi mushiya mikhuala ya Biblia, tudi naye gumukuatesa ha gukotelesa egi ndaga idi mukalagala muene idi yabola. Tudi naye gutshita ngenyi handaga tuana gumuzumba. (Ish. 27:5, 6) Na itshi tuajiya gutshita gula desizio diazudi phangi dishigo diago gutusuanguluisa ikhale desizio diene dishigo mushiya mikhuala ya Yehowa? Mvutu ya muhu owu idi mu verse yakuata longo edi. Idi muzuela egi tushigo naye ‘gusophesa athu adi nu matangi a gudisha nu etu.’​—Roma 14:1.

⁵ Uvi matangua ako yajiya gukhala lamba ha gunemesa badesizio a athu ako. Gishina giene, mu longo edi tuza mumona mukunda natshi tudi naye gunemesa badesizio a athu ako nu luholo tuajiya guyitshita. Uvi ndaga jitshi jiajiya gututuma ha gusophesa athu ako mukunda nu badesizio awo? Tutadilenu gale ifezegeselo eyi yalandula.

BADESIZIO ATSHI ATHU AKO AJIYA GUZULA ANYI AJIYA GUTUTUMA HA GUASOPHESA?

6-7. Hana gifezegeselo gidi mumonesa ndaga yajiya gututuma ha gusophesa athu ako mukunda nu badesizio awo.

⁶ Gifua luholo tuayimonyi gu thunda, luholo luetu lua gutangiza luajiya gukhala lua gudisha nu lua athu ako handaga tuakudile mu mafundo a gudisha nga mukunda nu ndaga jiatubuidile. Matangua ako, tuajiya gutangiza egi matangi etu adi luholo lumoshi nu a athu ako. Uvi mu guzuela guabonga ishigo ngenyi. Tutadilenu ifezegeselo eyi. Gifezegeselo gia 1: Tata wa phangi mumoshi wa yala wakhalele munua matombe akola avula. Uvi gungima phangi muene wajiya giamatshidia. Hadi muene mubalegesa tangua nu aphangi, wamona egi aphangi ako adi munua matombe akola. Ndaga yene yamusagesa muavula, wawambela nji aphangi ene egi ndaga adi mutshita idi yabola. Gifezegeselo gia 2: Phangi mumoshi wa mukhetu wakatele misongo yakola, wavuile nji muabonga. Gungima wavua egi phangi muko wa mukhetu udi mukata nji misongo yene. Luholo ludi muene mutshigina gukuatesa phangi’enji, wamuwambela ha gusagewa gifua luholo luasagewe muene. Wamuwambela ha gudia ima imoshi ngenyi nga ha gunua ihemba yamukuatesele. Gifezegeselo gia 3: Phangi mumoshi wa yala wakhalele thomo mu gikombelelo gia mambo. Uvi gungima dia gujiya giamatshidia, gakhalelego luko musuanguluga nu gikombelelo giene. Havua muene egi phangi mumoshi wayi gu masaga akalegewa mu église imoshi ngenyi, ndaga yene yamusagesa muavula.a

⁷ Tutadilenu ifezegeselo iko. Gifezegeselo gia 4: Phangi wa yala mumoshi wakudile mu sungi inyi athu avula akhalele mumona egi ishigo ndaga yabonga gudi mala ha gubemba muevu nga gudi akhetu ha gusudiga miphano gu asamble, mu gudibungisa nga mu mudimo wa gulongesa. Phangi muene udi mujiya malongo ahe-ahe tuakatuga guheta atadila ndaga yene, uvi udi mulandula guwambela aphangi ako egi aphangi a mala ashigo naye gubemba muevu nu aphangi a akhetu ashigo naye gusudiga miphano tangua adi mutshita midimo ya Ufumu. Gifezegeselo gia 5: Mukulu mumoshi udi mujiya phangi mumoshi wa yala wazudile desizio dia gulonguga makhalasa aleha uvi gungima wabembele giamatshidia. Gungima phangi mumoshi wa muvuala wa mu hungu diawo wazula desizio dia gungina makhalasa aleha. Mukulu muene udi gudisagesa mukunda nu desizio dia phangi muene, waya gumutala hamoshi nu mvuaji jienji ha guta nawo maga hagula egi ajiya gusombegesa desizio diawo.

8. a) Itshi yajiya gutuma mvuaji ha gutangijila mvuaji jiko ndaga jiabola? b) Itshi yajiya gubua mu hungu gula tudi khadilo dia luholo elu?

⁸ Tutadilenu ndaga yajiya gusagesa mvuaji. Gifezegeselo gia 6: Luholo udi mvuaji, idi yadiago egi wana tshita yagasue ha gusasa an’aye mu gudivua nu “malongo nu mu mikhuala ya Yehowa.” (Ef. 6:4) Uvi wajiya gumona egi Aklisto ako ashigo diago mushila an’awo mikhuala yavula gifua aye. Ha gufezegesa, mvuaji jiko jianago gumona egi idi mulonga gula an’awo avutuga gu inzo mu phipha. Athu ako nji ana sumbila an’awo azonda telefone. Ndaga jia luholo elu jiajiya gutuma mun’aye ha gutangiza egi udi muenya ndaga jiakola. Wajiya guguhula egi: “Mukunda natshi wanago gungukalegela ndaga gifua mvuaji jia mafuta ami?” Ndaga jia luholo elu jiajiya gugutuma ha gusendesa guzuela ndaga jiabola mukunda nu mvuaji jiko. Mu guzuela guabonga, gula Muklisto mumoshi wazula desizio dinyi dishigo gutusuanguluisa, yajiya gutusagesa nga gututuma ha gumutangijila ndaga jiabola. Uvi tushigo naye gubemba egi matangi a luholo elu abue khadilo dietu nu anginyise ukhaphumunyi mukatshi dia hungu.

9. Felela dietu diakhala itshi tangua tudi muzula badesizio? Itshi tushigo naye gutshita? (Tala nji gifuanesa.)

⁹ Gula Aklisto mbadi azula desizio jia gudisha, ishigo mukotelesa egi desizio dia mumoshi didi diabonga uvi dia muko didi diabola. (Roma 14:5) Idi yadiago egi Biblia yana wambela Aklisto ha gukhala nu “matangi amoshi” mu ndaga yatadila mikhuala ya Yehowa, uvi ndaga yene ishigo mukotelesa egi tudi naye gukhala mutangiza luholo lumoshi mu ndaga jiagasue. (2 Kol. 13:11) Tuajiya gufuanesa badesizio tuana guzula nu luholo tuana tomba njila ya guyila gula tudi mutshigina guya ha fundo dimoshi ngenyi. Tuajiya gukhala nu njila jiavula jiajiya gutukuatesa ha guheta ha fundo diene. Uvi njila mbatutomba idi inyi mbatusuanguluga nayo nu mbayikhala yabonga mukunda nu esue. Luholo lumoshi nji, Aklisto ajiya guzula desizio jia gudisha mu ndaga imoshi ngenyi, uvi felela dietu diakhala dimoshi: Gusuanguluisa Yehowa Nzambi. Hene, tushigo naye gusophesa athu ako mukunda nu badesizio awo.​—Mat. 7:1; 1 Tes. 4:11.

MUKUNDA NATSHI TUDI NAYE GUNEMESA BADESIZIO A ATHU AKO?

10. Ha gutadila Yakoba 4:12, tushigo nu ufumu wa gutshita itshi? Mukunda natshi?

¹⁰ Biblia yana monesa gishina tudi naye gunemesa desizio jia athu ako. Thomo: Tushigo nu ufumu wa gusophesa athu ako gula azula desizio mu ndaga jishigo gututadila. (Tanga Yakoba 4:12.) Yehowa udi muhanyi wa mikhuala nu Nzuji wabonga. Phamba muene udi nu ufumu wa gutuhana mikhuala nu gutuameza monyo wetu. Aphangi etu a mala nu a akhetu mbaadisophela gutuama dia Yehowa uvi ishigo gutuama dietu. (Roma 14:10) Hene, tushigo naye gusophesa nga guzuela ndaga jiabola gula phangi wazula desizio dishigo gudivua nu matangi etu nga ndaga tuana suanguluga najio.b

11. Itshi tuajiya gukalagala hagula gudivua gukhale mu hungu? (Tala nji gifuanesa.)

¹¹ Ya mbadi: Yehowa wana toga akombeledi enji ha gukhala mu gudivua uvi ishigo ha gukhala luholo lumoshi. Nzambi wetu wana suanguluga nu luholo tuakhala a gudisha nu athu ako! Ima yafugile muene yana gututshiginyisa ndaga yene. Ha gufezegesa, gushigo nu muthu wamonele gale mayiji mbadi a mutshi adifuana. Yakhala nji luholo lumoshi nu esue athu. Tuakhala avula ha mavu, uvi gushigo nu athu mbadi akhala adifuana nu gu phala nu mu makalegelo. Yakhala ngenyi handaga Yehowa watufugile a gudisha. Ganago gutshigina egi tukhale diago gifua athu ako. Uvi wana tshigina egi tukhale mu gudivua. Hene, ha fundo dia gubemba egi luholo tuakhala a gudisha nu athu ako lutukhaphumune, tudi naye gutshita yagasue ha gukhala mu gudivua nu mu guhuima. Tudi naye guzula guhuima nu gudivua tuakhala nago mu hungu nu ndando yavula gubalega matangi etu.​—Roma 14:19.

LUHOLO TUAJIYA GUMONESA EGI TUDI MUNEMESA BADESIZIO A ATHU AKO

12-13. Ndaga itshi tushigo naye gujimbila gula tuamona egi muthu mumoshi wakalagala ndaga idi mushiya mikhuala ya Biblia? (Galatiya 6:1; tala nji galuanda “Gula Ushigo Musuanguluga nu Desizio dia Muthu Muko.”)

¹² Gula muthu wazula desizio mu ndaga ishigo gugutadila. Dihule egi: ‘Muthu muene “wakalagala diago ndaga yabola” ba? Nga ndo ndaga yakalagala muene idi ya gudisha nu ndaga ngakhadi naye gutshita nga ngakhadi ha fundo dienji ba?’ Gula muthu muene wakagala ndaga idi mushiya mikhuala ya Biblia, dihule egi: ‘Ngudi ngatagana ha guhana muthu muene malongo ba? Gudi nu muthu muko wajiya gumukuatesa muabonga gubalega ba?’ Gula udi watagana ha gumukuatesa, itshite nu gutuluga guagasue. (Tanga Galatiya 6:1.) Matangua ako, yajiya gukhala egi desizio diazula muthu muene dishigo diago mushiya mikhuala ya Nzambi uvi didi genji dia gudisha nu matangi aye. Gula idi ngenyi, umuvuilago gubola, uzuedigo nji ndaga jiabola mukunda nu desizio dienji. Jiya egi muthu muene udi nu ginemo gia gudizula badesizio, umusophesago nji.​—Roma 14:2-4.

¹³ Tangiza gale ndaga eyi: Gula waya musumba ima ya gudia nu futa diaye, mbamuwushinjiga ha gusumba ima ya luholo lumoshi nu yaye ba? Ndo sha. Mbawubemba egi muene hakhenji aditombele ima idi mutshigina gudia muene. Ikhale ima yatomba muene ha gudia ishigo gugusuanguluisa, ndaga yene mbayishigo diago gugusagesa handaga ishigo aye mbawuyidia. Gula nga aye wakhadi nji ha fundo dia futa diaye, wakhalelego naye gutshigina egi muene agutombele ima idi gumusuanguluisa ha fundo dia gugubembela egi uditombele. Luholo lumoshi nji, tuajiya gumonesa egi tudi munemesa athu ako gula tudi mubemba egi adizudile desizio mu ndaga jishigo gututadila; tushigo naye nji gukamba guashinjiga ha gutshigina matangi etu.

14. Luholo lutshi wajiya gukuatesa hungu ha gukhala mu gudivua tangua udi muzula badesizio mu ndaga jishigo mutadila athu ako? (1 Kolinto 8:12, 13)

¹⁴ Gula wazula desizio mu ndaga ishigo mutadila athu ako. Wajiya gukuatesa hungu ha gukhala mu gudivua gula udi mutshita yagasue ha gutuna gukhakhuisa athu ako. (Tanga 1 Kolinto 8:12, 13.) Matangua ako, wajiya gutangiza egi desizio udi mutshigina guzula dishigo diabola handaga dishigo mushiya mikhuala ya Biblia. Uvi gula udi mujiya egi desizio diene mbadikhakhuisa phangi’aye, mbadikhala diago nu “ndando” ba?c (1 Kol. 10:23, 24) Mu matangua a luholo elu, ha fundo dia gukhala jigi-jigi nu desizio diaye, kamba gujiya matangi a athu ako. (Roma 15:1) Uvi wajiya gudihula egi: “Tuakatuga guzuela egi athu ako adi naye gunemesa badesizio etu. Na ndaga jiasombegesa luko ba?” Ndo sha. Athu ako adi naye gunemesa badesizio etu gifua luholo tuana nemesa badesizio awo. Uvi tushigo naye gujimbila longo dia Biblia didi mu Roma 12:18, diana zuela egi: “Gula luholo ludi guene, kalagalenu ngolo ha gukhala mu guhuima nu athu agasue.” Gishina giene, tudi naye gutshita yagasue ha gukhala mu guhuima nu aku’etu nu gutuna gutshita ndaga jiajiya guakhakhuisa.

15. Luholo lutshi akulu ajiya gukuatesa hungu ha gukhala mu gudivua? (1 Kolinto 4:6)

¹⁵ Akulu adi naye gunemesa badesizio a athu ako. Akulu ana kuatesa hungu ha gukhala mu gudivua gula ashigo musha mikhuala mu mafundo aphangi adi naye gudizudila badesizio nu gula adi mutshita yagasue ha gulandula “phamba ndaga jidi jia gusonega” mu Biblia. (Tanga 1 Kolinto 4:6.) Adi naye nji gutshita yagasue ha guhana phamba malongo adi gudivua nu malongo a Biblia akhala mu mikanda yetu. Gula phangi mumoshi waatoga malongo, ashigo naye gumuhana malongo ha gutadila matangi awo nga ndaga atagenele gale najio. Ndaga jiagasue adi naye gumuwambela jidi naye gukatuga mu Mbimbi ya Nzambi.​—Yesh. 48:17, 18.

16. Luholo lutshi mukulu wajiya gumonesa egi udi munemesa badesizio azudi hunji dia akulu?

¹⁶ Mukulu wagasue udi naye gunemesa badesizio adi muzula hunji dia akulu. Gula akulu agasue adibungisa, atoga Yehowa ha guahana nyuma yenji, akamba malongo a Biblia mu mulonga umoshi ngenyi nu azula desizio, mukulu wagasue udi naye gutshigina desizio diene ikhale akulu ako atunyi matangi enji mu mulonga wene. (Ef. 5:17) Akulu adi naye gulandula muabonga malongo a Biblia nu malongo ana gutuhana ulondegi wetu, ashigo naye nji gukalegela malongo ene ha gutshiginyisa matangi awo. Ha gufezegesa, mukulu gashigo naye gukalegela fraze imoshi ngenyi yazudi muene mu longo dimoshi dia mikanda yetu ha gutshiginyisa matangi enji uvi muene nu gutadila ndo longo diene diagasue.

17. Gubonga gutshi tuana heta gula tudi munemesa badesizio a athu ako?

¹⁷ Gifua luholo tuayimona mu longo edi, tuakhala a gudisha nu athu ako. Muthu wagasue mukatshi dietu wakhala nu luholo luenji lua gutangiza nu ndaga jiana suanguluga najio muene. Gudisha guene guakhala diago ndaga yabonga! Luholo tuana katuga mu mafundo a gudisha nu tuana khala nu makalegelo a gudisha luana kuatesa muthu wagasue wa mu hungu ha gudivua gifua udi gumbo diawo. Ha fundo dia gubemba egi gudisha guene gutukhaphumune, tuana tshita yagasue ha gukhala mu guhuima. Tuana tshita nji yagasue ha gutuna gukhakhuisa athu ako. Tuana nemesa desizio jia athu ako mu ndaga jishigo gututadila. Gula tualandula gutshita ngenyi, Yehowa mbawutushimbiga. Mbatukhala nu gusuanguluga nu guhuima mu hungu.​—Ngi. 133:1; Mat. 5:9.