Mukunda Natshi Tuakhalele nu Funu ya Gibawu?

1-2. Mu ndaga itshi tuakhalele nu funu egi muthu atuhuluise? Mukunda natshi? (Roma 7:22-24) (Tala nji gifuanesa.)

TANGIZA gale ndaga eyi. Inzo imoshi yabuzumugila muthu. Muthu muene udi monyo, uvi gashigo nu luholo lua gudizola mukatshi dia ima yamubuila. Ndaga yajiya gukalagala muene idi gukaluguga ha gutoga ukuateshi nu gudifelela egi athu mbaaza gumuzola ha fundo diene.

² Esue nji tudi gifua muthu muene. Mu luholo lutshi? Tangua Adama walumbugidile Yehowa, wabuile muenya gubola. Ndaga yene yakalegele egi an’enji abue nji enya gubola. Gishina giene, athu agasue a ha mavu abuile enya gubola. Tuabuile gifua muthu tuazuelela mu gifezegeselo nu tuakhalele nu funu ya muthu wajiya gutukuatesa. Mu mukanda wasonegele muene Aklisto a gu Roma, mupostolo Phaula wazuelele egi mukut’etu agasue tuakhala mu ‘uhiga’ wa gubola. (Tanga Roma 7:22-24.) Watogele egi: “Nanyi giwa mbawunguhuluisa gu muila owu udi gungutuala gu gufua?” Mbimbi eji jia Phaula jiakhalele mumonesa egi muene nji wakhalele muenya gubola, gubola guene guakhalele naye gumubata gu gufua. (Roma 6:23) Esue nji tudi gifua Phaula. Tuakhalele nu funu ya muthu wajiya gutuhuluisa!

3. Gubonga gutshi tuana heta mu njila ya gibawu?

³ Phaula gasugilego phamba ha guzuelela luholo luakhalele muene muenya gubola. Gungima dia guhula egi: “Nanyi giwa mbawunguhuluisa gu muila owu udi gungutuala gu gufua?” wazuelele egi: “Ngudi muhana Nzambi mersi handaga wanguhuluisa mu njila ya Fumi’etu Yesu Klisto.” (Roma 7:25) Phaula wakhalele muzuelela gibawua giafutshile Yesu. Mu njila ya gibawu giene, 1) Yehowa wana gututotesela gubola guetu, 2) tuana khala nu felela diabonga mukunda nu masugu adi muza, 3) tuana khala nji nu luendu lua gukuata ufuta wakola nu Yehowa. Hatuza mutadila ndaga jiene, mbajitukuatesa ha guzumba muavula Yehowa “Nzambi yago wana guhana athu felela.” (Roma 15:13) Mbajitukuatesa nji ha guzumba Yesu muavula handaga mu njila ya mulambu wenji, “tuakatudiwe mu uhiga […] mu ukuateshi wa gibawu.”​—Kol. 1:14.

YEHOWA WANA GUTUTOTESELA MU NJILA YA GIBAWU

4-5. Mukunda natshi mukut’etu agasue tuakhala nu funu ya gibawu? (Mulongeshi 7:20)

⁴ Tuakhala nu funu ya gibawu hagula Yehowa wajiya gututotesela gubola guetu. Mukut’etu agasue tuana kalagala gubola, ikhale mu mbimbi nga mu ndaga tuana kalagala. (Tanga Mulongeshi 7:20.) Uvi gubola guko guakhala guakoma gubalega. Ha gufezegesa, mu tangua dikulu, mukhuala wa Moize wakhalele muhana njila ya gushiya muthu wagasue washiyi muthu nu muthu watshitshi uthambi nu mukaji’a ngane. (Levi 20:10; Lutang. 35:30, 31) Ikhale gubola guko guakhalago guakoma gifua ogu tuakatuga gutanga, uvi Biblia yana guyitanga mukatshi dia ndaga jiabola. Ha gufezegesa, muyimbi wa ngimbo Davidi wazuelele egi: ‘Mbangumonesa gutema mu ndaga ngudi mutshita hagula ngukalagalago gubola nu ludimi luami.’ (Ngi. 39:1) Ndaga eyi idi mumonesa egi matangua ako, tuana kalagala nji gubola mu mbimbi jietu.​—Yak. 3:2.

⁵ Tangiza gale ndaga wazuelele nga wakalegele mu masugu abalega. Wawambela muthu mbimbi jiabola udi mutangiza egi wakhalelego naye gumuwambela ba? Wakalagala ndaga yabola udi gudibela ba? Yajiya gukhala egi wahanyi mvutu egi “ayi” gu mihu yene mbadi. Biblia yana zuela egi: “Gula tudi muzuela egi: ‘Tushigo nu gubola,’ tudi gudihuiga esue hakhetu, giamatshidia nji gishigo mukatshi dietu.”​—1 Yone 1:8.

6-7. Itshi yana hana Yehowa njila ha gututotesela gubola guetu? (Tala nji gifuanesa.)

⁶ Gibawu giana guhana Yehowa njila ha gututotesela gubola guetu. (Ef. 1:7) Ikhale ngenyi, ndaga yene ishigo mukotelesa egi Yehowa wana suanguluga gula tuatshita gubola. Gubola guana gumusagesa muavula. (Yesh. 59:2) Luholo Yehowa wana kalagala ndaga mu luholo luatagana, wakalegele ndaga imoshi yana gumuhana njila ha gututotesela.

⁷ Mukhuala wa Moize wakhalele mutoga enya Isalele ha guhana milambu ya shitu hagula Yehowa wajiya guatotesela gubola guawo. (Levi 4:27-31; 17:11) Milambu yene yakhalele mumonesa egi athu akhalele nu funu ya mulambu wabalega ndando. Mulambu wa Yesu wakhalele naye gubatela athu gubonga guavula. Wakhalele naye nji guhana Yehowa njila ya gututotesela gubola guetu. Mu mukanda wasonegele muene Aklisto a gu Kolinto, Phaula wamonesele egi wakotelesele gubonga athu mbaaheta mu njila ya mulambu wa Yesu. Gungima dia guatangela ndaga jiabola akhalele mukalagala gutuama dia gubua Aklisto, waawambelele egi: “Amiwevele, amibuishile nji athu agijila. Muabuishiwe athu abonga gu meso a Nzambi mu jina dia Fumu Yesu Klisto nu mu njila ya nyuma ya Nzambi wetu.”​—1 Kol. 6:9-11.

8. Ndaga itshi wajiya gutangiza tangua udi gudilondega mukunda nu Guwunguluga Gufua gua Yesu mu givo egi?

⁸ Tangua udi gudilondega mukunda nu Guwunguluga Gufua gua Yesu guza mukalegewa mu givo egi, zula tangua dia gutangiza gubonga wana khala nago mu monyo waye mu luholo Yehowa wagutotesele gubola guaye. Ha gufezegesa, gibawu giana gugukuatesa ha gutuna gudisagesa muavula mukunda nu gubola wakalegele gunu wabalumuine gale mutshima. Na itshi wajiya gutshita gula udi mutangiza egi Yehowa gajiyilego gugutotesela? Yajiya gukhala egi wana zuela egi: ‘Ngudi mujiya egi Yehowa wana totesela athu, uvi ngushigo nu luholo lua guditotesela.’ Gula wana tangiza ngenyi, jiya egi: Yehowa wana totesela athu, wahanele nji mun’enji ginemo gia gusophesa athu. Yehowa gaguhanelego aye nga muthu muko ginemo gia gutomba muthu gadi naye muene gutotesela nga ndo. Biblia yana zuela egi: ‘Gula tudi muwenda mu muanya gifua luholo ludi Yehowa mu muanya, . . . mahatshi a mun’enji Yesu mbaaphelegetesa gubola guetu guagasue.’ (1 Yone 1:6, 7) Tudi naye gutshigina ndaga eyi gifua luholo tuana gutshigina malongo ako a Biblia. Gibawu giana hana Yehowa njila ya gututotesela gubola guetu, Biblia yana zuela nji egi wakhala ‘hehi ha gutotesela athu gubola guawo.’​—Ngi. 86:5.

GIBAWU GIANA GUTUHANA FELELA DIABONGA MUKUNDA NU MASUGU ADI MUZA

9. Mu Biblia, mbimbi “gubola” yana kotelesa itshi? (Ngimbo 51:5)

⁹ Mu Biblia, mbimbi “gubola” yanago gumonesa phamba ndaga yabola yakalagala muthu, uvi yana monesa nji luholo tuana vualewa athu ashigo atagana. (Tanga Ngimbo 51:5.) Luholo tuana vualewa athu ashigo atagana luana gututuma ha gutshita ndaga jiabola, ha gubua athu agukola, ha gukata nu gufua. Ndaga yene idi gutukuatesa ha gukotelesa gishina ana azonda ana kata nu ana gufua ikhale khenji akalegelego nga ndaga imoshi yabola. Yana gutukuatesa nji ha gukotelesa gishina athu abonga nu athu abola ana gumona malamba nu ana gufua. Mukut’etu agasue tuana khala mu uhiga wa gubola handaga Adama wakalegele gubola.

10. Adama nu Eva adivuile luholo lutshi tangua akalegele gubola?

¹⁰ Tangiza gale luholo Adama nu Eva adivuile tangua akalegele gubola. Gubola guaatumile ha gudisagesa muavula. Gungima dia gulumbugila Yehowa, Adama nu Eva avuile gikenene handaga atunyile gutumagela mukhuala wa Yehowa unu wakhalele “wa gusonega mu mitshima yawo.” (Roma 2:15) Akotelesele egi usombegeshi umoshi wakalegewa mu monyo wawo. Akotelesele nji egi adi naye gutshuiga itshinyi iko ya muila wawo nu gudisuega gifua mbundudi gutuama dia Mufugi wawo. (Gis. 3:7, 8) Mu tangua diene, yakhalele mbala ya thomo Adama nu Eva adibelele, avuile gikenene, adivuile egi ashigo mu ubambi, avuile lamba nu musonyi. Akhalele naye gulandula gudivua ngenyi uu nu gu gufua guawo.​—Gis. 3:16-19.

11. Luholo tushigo athu atagana luana gututuma ha gudivua luholo lutshi?

¹¹ Luholo tushigo athu atagana, matangua ako tuana gudibela, tuana guvua gikenene nu musonyi gifua muadivuile Adama nu Eva. Malamba tuana tagana nawo ana khala nji mukunda nu ndaga yene. Ikhale tuatshita getu gutshi ha gusombegesa ndaga jia mu monyo wetu, mbatulandula gukhala nu milonga inyi tuajiyilego gumanesela hakhetu. Mukunda natshi? Handaga Biblia yana zuela egi sendese Adama nu Eva akalegele gubola, muthu wagasue wana tagana nu malamba. (Roma 8:20) Ndaga yene idi nji ngenyi mukunda nu athu agasue a ha mavu. Ha gufezegesa, athu ana tshita ngolo ha gulondega mavu, ha gumanesela umbundudi nu uphutu nu ha gubata guhuima ha mavu. Ikhale ngenyi, khenji abingile ha gumanesela milonga yene. Uvi gibawu giatuhanele felela diabonga. Felela diene didi itshi?

12. Gibawu giana gutuhana felela ditshi?

¹² Gibawu giana gutuhana felela egi “ima yafugile [Yehowa] mbayikatudiwa . . . mu uhiga wa muila udi mufua.” (Roma 8:21) Yakotelesa egi tangua mbatubua athu atagana mu mavu ahe-ahe, mbatushigo luko mukhala mukata nga gudisagesa mu matangi; mbatushigo nji muvua gikenene, lamba, musonyi nga gudivua egi tushigo mu ubambi. Mu tangua diene, ndaga mbatutshita ha gulondega mavu nu ha gukhala mu guhuima mbajibinga handaga mbatukhala mu uhinyinyi wa Yesu Klisto “Phingua ya guhuima,” munu wafutshile gibawu mukunda nu esue.​—Yesh. 9:6, 7.

13. Ndaga itshi iko wajiya gutangiza tangua udi gudilondega mukunda nu Guwunguluga Gufua gua Yesu mu givo egi?

¹³ Tangiza gale gubonga mbawuheta tangua mbawubua muthu watagana. Mbawukhala muzuga lusugu luagasue nu ngolo mu muila, mbawushigo luko mukhala gudisagesa egi aye nga athu wana zumba mbamubanda nu nzala, mbamukata nga ndo mbamufua. Sendese mangino, wajiya gukhala mu guhuima gula udi ‘mukuata mangololo felela . . . didi gifua longo dia masuwa diana kuata monyo. Felela diene didi dia diago nu diakola.’ (Heb. 6:18, 19) Gifua luholo longo diana kuatesa masuwa ha gutuna gubulumuga, felela diaye mukunda nu masugu adi muza diajiya nji gugukuatesa ha gukolesa gutshigina guaye nu ha gukolesela mu malamba udi mutagana nawo mangino. Wajiya diago gusha mutshima egi Yehowa mbawuhana “lufuto gudi athu ana gumukamba.” (Heb. 11:6) Yadiago, gibawu giana guguhana gikhesa nu felela diabonga mukunda nu masugu adi muza.

GIBAWU GIANA GUTUKUATESA HA GUKHALA NU UFUTA WABONGA NU YEHOWA

14. Itshi yatubuidile tangua Adama nu Eva akalegele gubola? Mukunda natshi?

¹⁴ Tangua Adama nu Eva akalegele gubola, athu agasue a ha mavu akhalelego luko nu luholo lua gukuata ufuta nu Yehowa. Biblia yana monesa egi mukut’etu agasue tuakhalele mbalagaji jia Mufugi wetu. (Roma 8:7, 8; Kol. 1:21) Mukunda natshi? Handaga Yehowa wakhala Nzambi watagana, ganago gukanga meso gu ndaga jiabola. Biblia yana zuela mukunda nu muene egi: ‘Meso aye adi a gijila; aye wajiyilego gutala gubola nga gukanga meso gu ndaga jiabola.’ (Hab. 1:13) Gubola guanginyishile ukhaphumunyi hakatshi dia athu nu Nzambi. Gushigo nga nu muthu mukatshi dietu wakhalele naye gukuata ufuta nu Yehowa gula ndaga imoshi khenji ikalegewago ha gukatula umbalagaji wene. Gishina giene, gibawu giatuhanele njila ha gudivua luko nu Yehowa.

15. Luholo lutshi gibawu giatuluile mutshima wa Nzambi? Gubonga gutshi tuahetele?

¹⁵ Biblia yana zuela egi Yesu udi “mulambu wahanewe mukunda nu gubola guetu hagula tudivue luko nu Nzambi.” (1 Yone 2:2) Mbimbi ya Greke yabalumuiwe egi ‘mulambu wahanewe hagula tudivue luko nu Nzambi,’ yajiya gumonesa “ndaga ana kalagala ha gutuluisa mutshima wa muthu.” Na luholo lutshi gibawu giatuluile mutshima wa Yehowa? Tushigo naye gutangiza egi Yehowa wasuangulugile nu gufua gua mun’enji. Uvi gibawu giatuluile Nzambi wetu watagana mutshima handaga giamuhanele njila ya gudivua luko nu athu a ha mavu. (Roma 3:23-26) Giamuhanele nji njila ya gutamega akombeledi enji agujinginyina afuile gutuama dia gufua gua Yesu egi akhalele ‘athu abonga gu meso enji.’ (Gis. 15:1, 6) Mukunda natshi? Handaga Yehowa wakhalele mujiya egi mun’enji Yesu mbawufuta gibawu. (Yesh. 46:10) Gibawu giakuatesele athu ha gudivua luko nu Nzambi.

16. Ndaga itshi iko wajiya gutangiza tangua udi gudilondega mukunda nu Guwunguluga Gufua gua Yesu mu givo egi? (Tala nji gifuanesa.)

¹⁶ Tangiza gale gubonga wana heta mu luholo wadivuile luko nu Nzambi. Ha gufezegesa, wajiya gutamega Yehowa egi “Tata” waye gifua luholo Yesu watulongesele. (Mat. 6:9) Matangua ako wajiya nji gumutamega egi “futa” diaye. Uvi tangua tudi mukalegela mbimbi jiene ha gumutamega, tudi naye guyitshita nu ginemua nu gudibulumuisa guagasue. Mukunda natshi? Handaga tudi enya gubola nu tuajiyilego gukuata ufuta wakola nu Yehowa mu ngolo jietu hakhetu. Phamba gibawu giajiya gutukuatesa ha gukuata ufuta nu Yehowa. Mu njila ya Yesu, Yehowa watshitshile egi ‘ima iko yagasue ikhale mu gudivua n’enji, wahagele nji guhuima mu njila ya mahatshi ahanele [Yesu] ha mutshi wa lamba.’ (Kol. 1:19, 20) Ndaga yene yana gutuhana luendu lua gukuata ufuta nu Yehowa ikhale tushigo athu atagana.

GIBAWU GIANA GUTUMONESA EGI YEHOWA UDI NZAMBI WA KHENDA

17. Luholo lutshi gibawu giana monesa egi Yehowa wakhala Nzambi wa khenda? (Efeso 2:4, 5)

¹⁷ Gibawu giana gutumonesa haphelo egi Yehowa wakhala “Nzambi wa khenda jiagasue.” “Watuhanele luko monyo . . . hoho tuakhalele athu a gufua mukunda nu gubola guetu.” (Tanga Efeso 2:4, 5.) Gifua luholo muthu munu inzo yamubuzumugila wana kamba ukuateshi, athu akhala “nu mitshima yatagana ha guheta monyo wa mayilago” akotelesele gale egi akhala mu uhiga wa gubola, hene akhala nu funu ya ukuateshi. (Makal. 13:48) Yehowa wana guahana ukuateshi wene mu njila ya lukuma luabonga lua Ufumu hagula amujiye nu ajiye mun’enji Yesu. (Yone 17:3) Gula Satana watangijile egi ndaga yakalegele Adama nu Eva yakhalele naye gukanga Yehowa njila ha gutagenesa gutshigina guenji, wadihuigile diago!

18. Tangua tudi mutangigiza gubonga tuana heta mu njila ya gibawu, itshi tushigo naye gubuita mutshima?

¹⁸ Tangua tudi mutangigiza gubonga tuana heta mu njila ya gibawu, tushigo naye gubuita mutshima gishina Yehowa wafutshile gibawu giene. Idi yadiago egi Yehowa wafutshile gibawu mukunda nu gutuhuluisa, uvi wagifutshile nji ha guhana mvutu gu ndaga jia mambo jiazuelele Satana mu gilanga gia Edene. (Gis. 3:1-5, 15) Mu njila ya gibawu, Yehowa watshitshile egi jina dienji dinemesewe luko, wamonesele nji egi ndaga jiagasue jiazuelele Satana jiakhalele jia mambo. Watukudile nji mu uhiga wa gubola nu gufua, ngenyi wamonesele egi wakhala Nzambi wa guzumba. Ikhale tushigo athu atagana, uvi mu khenda jienji jiavula, Yehowa wana gutuhana luendu lua gumonesa egi ndaga jiazuelele Satana mukunda nu muene jidi jia mambo. (Ish. 27:11) Luholo lutshi wajiya guhana Yehowa mersi mukunda nu gibawu? Tuza muheta mvutu ya muhu owu mu longo dialandula.