23-29 MARS 2026
LUNGIMBO 18 Mersi Yehowa Mukunda nu Gibawu
Luholo Lutshi Wajiya Guhana Yehowa Mersi Mukunda nu Gibawu?
“Guzumba gudi nago Klisto gudi gutuhinyina.”—2 KOL. 5:14.
MU GUHIHIA
Tuza mumona luholo mukut’etu agasue tuajiya gumonesa egi tudi muhana Yehowa mersi mukunda nu gibawu.
1-2. Itshi tudi naye gutshita mu luholo Yesu wahanele monyo wenji mukunda nu esue? Mukunda natshi? (2 Kolinto 5:14, 15) (Tala nji gifuanesa.)
TANGIZA gale egi udi muthu munu inzo yabuila tuazuelela mu longo diabalega. Itshi wakhalele naye gutshita mukunda nu muthu waguhuluisa? Ikhale muthu muene wamihuluisa nu athu ako, idi yadiago egi mbawumuhana mersi ha gumonesa egi udi muzula ukuateshi wenji nu ndando.
2 Gifua luholo tuayimonyi mu longo diabalega, tuakhalelego nu luholo lua gudihuiluisa mu gubola guatubembelele Adama nu Eva. Uvi gibawu giana gutukuatesa hagula 1) Yehowa atutotesele gubola guetu, 2) tukhale nu felela egi mbatubua athu atagana mu masugu adi muza nu 3) tukuate ufuta wakola nu Yehowa. Giana gutukuatesa nji ha guheta felela dia guheta monyo wa mayilago mu masugu adi muza. Yesu wamonesele egi wakhalele muzumba athu muavula tangua diahanele muene monyo wenji gifua mulambu mukunda nu esue. Wakhalele muzumba athu muavula sendese mualeha gutuama dia guza guenji ha mavu. (Ish. 8:30, 31) Mupostolo Phaula wasonegele egi: “Guzumba gudi nago Klisto gudi gutuhinyina.” (Tanga 2 Kolinto 5:14, 15.) Mbimbi eji jidi mukotelesa egi tudi naye guhana Yesu mersi mukunda nu guzumba guenji nu tushigo naye gujimbila ndaga yakalegele muene mukunda nu esue.
Gula muthu waguhuluisa, udi naye gumuhana mersi mukunda nu ndaga yene; luholo lumoshi nji, tudi naye guhana Yehowa nu Yesu mersi mukunda nu gibawu handaga giatukudile mu uhiga wa gubola nu gufua (Tala paragrafe 1-2)
3. Mukunda natshi ndaga wajiya gutshita ha guhana Yehowa mersi jiajiya gudisha nu jia athu ako?
3 Luholo lutshi wajiya gumonesa egi udi muhana Yehowa mersi mukunda nu gibawu? Mvutu yaye yajiya gukhala ya gudisha nu ya muthu muko. Ha gufezegesa, tangiza gale egi athu thathu adi mu membo a gudisha uvi mukut’awo agasue adi mutshigina guya mu dimbo dimoshi ngenyi. Ajiya gawo guyila mu njila jia gudisha, uvi mukut’awo aguasue mbaaheta mu dimbo diene dimoshi. Luholo lumoshi nji, “njila” wajiya gukalegela nga ndaga wajiya gutshita ha gutagenesa felela diaye, yakotelesa egi felela diaye dia guhana Yehowa mersi mukunda nu gibawu, yajiya gudisha nu ya athu ako. Uvi ndaga ya ndando idi egi mukut’etu agasue tudi naye Yehowa mersi. Hene, mu longo edi tuza muzuelela athu a maluholo thathu: 1) athu tuana longesa Biblia, 2) Aklisto abatijiwe gale nu 3) imeme yatotele.
ATHU TUANA LONGESA BIBLIA
4. Luholo lutshi Yehowa wana tadila athu tuana longesa Biblia?
4 Gula udi mulonguga Biblia nu Matemue a Yehowa, jiya egi luholo wana tshigina lukuma luabonga udi mukatshi dia athu anyi Yehowa wana tshigina egi abue mafuta enji. (Yone 6:44; Makal. 13:48) Yehowa wana jiya ndaga jidi mu mutshima waye, yakotelesa egi wana mona luholo wana tshita ngolo ha gulonguga giamatshidia; wana suanguluga nji luholo udi mulandula gusombegesa makalegelo aye ha gutumagela mikhuala yenji. (Ish. 17:3; 27:11) Gibawu giafutshile Yesu giajiya gugukuatesa ha gukuata ufuta nu wakola nu Yehowa. (Roma 5:10, 11) Hene, ujimbilago guhana mersi mukunda nu gibawu giene.
5. Luholo lutshi athu tuana longesa Biblia ajiya gukalegela longo didi mu Filiphi 3:16?
5 Gula wana longuga Biblia, luholo lutshi wajiya gumonesa egi udi muhana Yehowa nu Yesu mersi mukunda nu gibawu? Wajiya guhana mersi mukunda nu gibawu gula wakalegela longo Phaula wahanele gudi Aklisto a gu Filiphi egi: “Ikhale tuakudile gale luholo lutshi, tubembigo guwenda mu luholo luatagana mu njila yene imoshi.” (Fili. 3:16) Hene, ubembigo egi nga ndaga imoshi igukange njila ha guwenda mu njila ya monyo.—Mat. 7:14; Luka 9:62.
6. Ndaga itshi athu tuana longesa Biblia ajiya gutshita gula idi lamba gudi ene ha gusombegesa? (Mikhuala 30:11-14) (Tala nji gifuanesa.)
6 Yajiya gukhala egi idi lamba mukunda nu aye ha gutshigina longo dimoshi dia Biblia wakatuga gulonguga. Itshi wajiya gutshita? Kamba gujiya ndaga jiavula jiatadila longo diene, toga nji Yehowa ha gugukuatesa ha gukotelesa longo diene muabonga. (Ngi. 86:11) Gula ushigo mukotelesa longo dimoshi ngenyi, udisagesago muavula, landula gulonguga Biblia. Yajiya gukhala egi gungima dia masugu mbawukotelesa longo diene muabonga. Itshi wajiya gutshita gula ushigo mutagana ha gubemba khadilo dimoshi diabola? Ujimbilago egi Yehowa ganago gutoga athu ha gukalagala ndaga jidi lamba mukunda nu ene. Aye nji wajiya gukalagala ndaga jiajiya gumusuanguluisa. (Tanga Mikhuala 30:11-14.) Yehowa walayele egi mbawugukuatesa. (Yesh. 41:10, 13; 1 Kol. 10:13) Hene, landula gumutumagela. Ikhale ndaga itshi udi mutagana nayo, landula guhana Yehowa mersi mukunda nu ndaga jiagasue jiana gugukalegela muene nu mukunda nu gibawu. Gula wakudisa guzumba guaye mukunda nu Yehowa, mbawumona egi “mikhuala yenji yana khalago yanema.”—1 Yone 5:3.a
Yehowa ganago gututoga ha gutshita ndaga jidi lamba mukunda nu esue. Uvi muene hakhenji mbawutukuatesa ha gutshita ndaga jidi gumusuanguluisa (Tala paragrafe 6)
7. Ndaga itshi mavuala anyi mvuaji jiawo jidi Matemue a Yehowa ashigo naye gujimbila?
7 Na itshi tuajiya guzuela mukunda nu mavuala anyi mvuaji jiawo jidi akombeledi a Yehowa? Ene nji ana longuga Biblia. Idi yadiago egi mvuaji jienu jiana suanguluga muavula ha gumilongesa Biblia. Biblia idi muzuela egi: “Suenenu hehi nu Nzambi, muene mbawusuena hehi nu enue.” (Yak. 4:8; 1 Gudi. 28:9) Gula udi musuena hehi nu Yehowa, muene nji mbawusuena hehi nu aye. Yehowa ganago guguzumba handaga mvuaji jiaye jiana gumukombelela uvi idi handaga wana tshigina egi aye hakhaye ukuate ufuta wakola n’enji. Ndaga itshi Yehowa wakalegele hagula wajiya gukuata ufuta wakola n’enji? Wafutshile gibawu mukunda nu aye; ubuitshigo kado gene ga ndando mutshima. (Roma 5:1, 2) Gutuama dia guya mu gudibungisa gua Guwunguluga Gufua gua Yesu gua givo egi, zula tangua dia gutangigiza ndaga yakalegele Yehowa nu Yesu mukunda nu aye. Gungima tangigiza ndaga wajiya gukalagala mu monyo waye nu mafelela wajiya gudihagela ha gumonesa egi udi muhana Yehowa nu Yesu mersi mukunda nu gibawu.b
AKLISTO ABATIJIWE GALE
8. Mu maluholo atshi Aklisto abatijiwe gale amonesele gutshigina guawo mu gibawu?
8 Gula udi Muklisto wabatijiwe gale, idi yadiago egi wamonesele gutshigina guaye mu gibawu mu maluholo avula. Ha gufezegesa, wakalegele ngolo ha gukuata ufuta nu Yehowa nu ha gutumagela mikhuala yenji. Watumagele nji mukhuala wa Yesu wa gubuisa athu alandudi luholo wana longesa athu ako lukuma luabonga. Wadihanele nji gudi Yehowa nu wabatijiwe. Yajiya gukhala egi wataganele nu usageshi handaga wana kombelela Yehowa. (2 Tim. 3:12) Ikhale ngenyi, walanduile gumukombelela nu gujinginyina guagasue, walanduile nji gumuhana mersi mukunda nu gibawu giafutshile muene mu njila ya mun’enji.—Heb. 12:2, 3.
9. Muheto utshi Aklisto abatijiwe gale adi naye gutemena?
9 Gula tuabatijiwe gale sendese mualeha, tudi naye gutemena muheto umoshi wakoma. Muheto wene udi gusendesa gubuita mutshima ha guhana Yehowa mersi mukunda nu gibawu. Itshi yajiya gututuma ha gubua mu muheto wene? Tutadilenu gifezegeselo gia Aklisto a gu Efeso a mu siekle ya thomo. Akhalele mukolesela mu ndaga jiavula, Yesu waashimanele nji mukunda nu khadilo diene. Uvi waawambelele egi: ‘Ndaga ngudi gumimonela gubola yenyeyi, mushigo luko nu guzumba gunu muakhalele nago ha thomo.’ (Gumo. 2:3, 4) Gifua luholo mbimbi jia Yesu jidi guyimonesa, Muklisto wajiya gusendesa gukombelela Yehowa handaga wajidile gale genji gutshita ngenyi uvi ishigo handaga wana zumba Yehowa. Muthu wa luholo elu wajiya genji gutshita isambu, guya mu gudibungisa nu mu mudimo wa gulongesa handaga wajidile gale gutshita ngenyi. Uvi gashigo luko guyitshita handaga wana zumba Yehowa nu athu. Itshi wajiya gukalagala gula wamona egi guzumba guaye gudi Yehowa gudi muya nu guleba?
10. Luholo lutshi wajiya gukalegela longo diahanele mupostolo Phaula gudi Timote? (1 Timote 4:13, 15)
10 Mupostolo Phaula wawambelele Timote ha gukhala “mutangigiza ndaga” jia mu nyuma nu ha ‘gudihana diago mu ndaga jiene.’ (Tanga 1 Timote 4:13, 15.) Aye nji wajiya gukalegela longo diene, wajiya gukamba maluholo wajiya gukolesa guzamba guaye gudi Yehowa hagula ‘nyuma ya Nzambi igukuatese ha gukhala nu gikhesa.’ (Roma 12:11; tala note d’étude “Débordez de zèle grâce à l’esprit” mu Biblia ya français.) Ha gufezegesa, gula udi mutshigina gulandula gudibungisa muabonga, tshita yagasue ha gudilondega muabonga gutuama. Nga ndo gula udi mutshigina guheta gubonga tangua udi mulonguga, wajiya guya ha fundo dishigo nu matululu dinyi diajiya gugukuatesa ha gutangigiza muabonga ndaga udi mulonguga. Gifua luholo muthu wana landula gumba khunyi ha jigo hagula tshuya tujimigo, aye nji udi naye gulandula gutshita ndaga eji tuazuelela hagula wajiya gulandula guhana Yehowa mersi mukunda nu gibawu nu mukunda nu ndaga jiagasue jiana gugukalegela muene. Ndaga iko wajiya gutshita yenyeyi: Mu phoso jidi gutuama dia Guwunguluga Gufua gua Yesu, wajiya guzula tangua dia gutangigiza gubonga tuana khala nago luholo tuakhala Matemue a Yehowa. Gutshita ngenyi mbagugukuatesa ha guhana Yehowa mersi mukunda nu gibawu handaga giene giana gutukuatesa ha gukhala nu ufuta wabonga n’enji.
11-12. Gula mu tangua dimoshi ngenyi ushigo luko gudihana muavula mu ndaga jia mu nyuma, idi mukotelesa egi ushigo luko nu nyuma ya Nzambi ba? Kotelesa. (Tala nji gifuanesa.)
11 Gula mu tangua dimoshi ngenyi wamona egi ushigo luko gudihana muavula mu ndaga jia mu nyuma gifua luholo wakhalele guyitshita thomo, ulebigo muila, utangizago nji egi ushigo luko nu nyuma ya Nzambi. Wunguluga ndaga mupostolo Phaula wawambelele Aklisto a gu Kolinto mukunda nu mudimo wenji egi: ‘Ikhale ngatshitshilego mudimo wene nu mutshima umoshi, udi khuta mudimo wanguhuile Nzambi.’ (1 Kol. 9:17) Itshi yatshiginyile guzuela muene?
12 Matangua ako, nzala ya gulongesa lukuma luabonga yakhalele nji muhua Phaula. Ikhale ngenyi, walanduile gulongesa lukuma luabonga. Aye nji wajiya gutshita ngenyi. Zula desizio dia gutshita ndaga jiabonga ikhale ushigo nu nzala ya gujitshita. Khala mutoga Yehowa ha guguhana “nzala nu ngolo jia gutshita ndaga.” (Fili. 2:13) Landula gutshita ndaga jia mu nyuma ha gukhala nu ufuta wakola nu Yehowa. Khala nji musha mutshima egi gula walandula gutshita ndaga jiene, mbawukolesa diago guzumba guaye gudi Yehowa.
Landula gukalagala ndaga jia mu nyuma ikhale matangua ako ushigo nu nzala ya gujitshita (Tala paragrafe 11-12)
13. Itshi yajiya gutukuatesa ha gujiya gula tudi mukalagala ndaga jiana gutulongesa Yehowa?
13 Tudi naye gukhala nu khadilo dia guditadila ha gujiya gula tuana kalegela diago longo dia Phaula didi mu 2 Kolinto 13:5 egi: “Khalenu guditala muabonga ha gujiya gula mudi nu gutshigina; khalenu nji guditala muabonga tangua diagasue ha gujiya gula mudi athu a luholo lutshi.” Ha gufezegesa, tuajiya nji gudihula egi: ‘Ngana gusha ndaga jia mu nyuma ha fundo dia thomo mu monyo wami ba?’ (Mat. 6:33) ‘Ndaga ngana kalagala ha gubalegesa tangua jiana monesa diago egi ngana tuna ndaga jiabola ba?’ (Ngi. 97:10) ‘Ngana tshita yagasue ha gubamba guhuima nu gudivua tuana khala nago mu hungu ba?’ (Ef. 4:2, 3) Lusugu lua Guwunguluga Gufua gua Yesu luana gutukuatesa ha gutangigiza ndaga Yehowa nu Yesu akalegele mukunda nu esue. Luana gutuhana nji luendu lua guditadila muabonga ha gujiya gula tuana jinga mukunda nu Klisto uvi ishigo mukunda nu esue hakhetu.c
IMEME YATOTELE
14. Mukunda natshi Aklisto ako abembele gale guya mu gudibungisa?
14 Aklisto ako abembele gale gawo guya mu gudibungisa gua mu hungu. Ako mukatshi diawo akhalele akombeledi a Yehowa agujinginyina a mualeha. Na itshi yaalebesele muila? Yajiya gukhala egi ako alebele gawo muila handaga akhalele nu “gikenene gia lujingu.” (Luka 21:34) Ako nji alebele muila handaga phangi mumoshi waawambelele nga waakalegele ndaga yabola. (Yak. 3:2) Uvi ako akalegele gubola guakoma uvi akambelego ukuateshi. Na itshi wajiya gukalagala ha guvutuga luko mu fami ya Yehowa gula walebele gale mu nyuma? Ndaga itshi wajiya gutshita luholo udi mujiya egi Yehowa nu Yesu ana guguzumba nu afutshile gibawu mukunda nu aye?
15. Luholo lutshi Yehowa wana monesa egi wana gudisagesa mukunda nu imeme yatotele? (Ezekiele 34:11, 12, 16)
15 Tangiza gale luholo Yehowa wana gudivua mukunda nu imeme yenji yatotele. Ganago guyivuila khabu nga guyituna. Uvi wana guya nu guyikamba. Wana guyidisa mu nyuma nu wana guyikuatesa ha guvutuga luko gudi muene. (Tanga Ezekiele 34:11, 12, 16.) Yehowa wana tshita nji ngenyi mukunda nu aye ba? Ayi! Luholo udi mutanga longo edi ludi mumonesa diago egi mu mutshima waye, aye gaye nu nzala ya gusuanguluisa Yehowa. Yehowa wamonele makalegelo aye abonga hene agunanele gudi muene, henyaha udi nji mutshigina gugukuatesa ha guvutuga gudi muene.
16. Itshi yajiya gukuatesa imeme yatotele gale ha guvutuga luko gudi Yehowa? (Tala nji gifuanesa.)
16 Gamukanda Reviens à Jéhovah gana khala nu mbimbi eji jidi muhana gikhesa: “Khala musha mutshima egi Yehowa mbawugukuatesa mu ndaga jiagasue udi mutshita ha guvutuga gudi muene. Mbawugukuatesa nji ha gutuna gudisagesa nga guvua gikenene, ha gutuna gudivuila khabu mukunda nu ndaga wakalegele, ha gukhala mu guhuima nu ha gukhala nu mutshima waphelegeta. Ngenyi mbawukhala luko nu ngolo jia gumukombelela hamoshi nu aphangi ako.” Jiya egi akulu adi nji hehi ha gugukuatesa. Adi gifua ‘fundo dia gudisuegela mukunda nu funji, fundo dia gulengela ha gudisuega mukunda nu gikudi.’ (Yesh. 32:2) Gula udi mutshigina gumonesa egi wana hana Yehowa mersi mukunda nu gibawu, dihule egi: ‘Ndaga jitshi ngajiya gukalagala mangino hagula ‘ngudivue luko’ nu Yehowa?’ (Yesh. 1:18; 1 Phet. 2:25) Ha gufezegesa, wajiya guvutugila guya mu gudibungisa gu Inzo ya Ufumu. Wajiya nji guwambela mukulu mumoshi egi udi mutshigina guvutuga gudi Yehowa. Mukulu muene wajiya gutoga phangi mumoshi ha gugulongesa luko Biblia mukunda nu tangua dimoshi ngenyi. Wajiya diago gusha mutshima egi Yehowa mbawushimbiga ndaga jiagasue udi mutshita ha gumonesa egi wana suanguluga nu gibawu giafutshile Yesu.
Dihule egi: ‘Ndaga jitshi ngajiya gukalagala mangino hagula ‘ngudivue luko’ nu Yehowa?’ (Tala paragrafe 16)
ITSHI MBAWUKALAGALA HA GUHANA YEHOWA MERSI MUKUNDA NU GIBAWU?
17-18. Luholo lutshi tuajiya gukalegela tangua dietu muabonga mu sungi ya Guwunguluga Gufua gua Yesu mu givo egi?
17 Yesu wazuelele egi Yehowa wamutumile ha gufuta gibawu “hagula muthu wagasue washa gutshigina gudi muene, gafuigo uvi ahete monyo wa ivo nu ivo.” (Yone 3:16) Gibawu gidi ndaga ya ndando yakalegele Yehowa ha gutukula mu uhiga wa gubola nu gufua. (Roma 3:23, 24; 2 Kol. 6:1) Mu masugu adi gutuama dia Guwunguluga Gufua gua Yesu, zula tangua dia gutangigiza guzumba Yehowa nu Yesu agumonesele nu ha guahana mersi mukunda nu ndaga yene.
18 Itshi wajiya gukalagala ha gumonesa egi udi muhana Yehowa mersi mukunda nu gibawu? Ndaga mbawukalagala mbajikhala jia gudisha nu jia athu ako. Uvi wajiya gusha mutshima egi Yehowa mbawushimbiga ndaga jiagasue udi mukalagala hamoshi nu akombeledi enji ako anyi ana khalago ‘nu monyo mukunda nu ene hakhawo, uvi akhala nu monyo mukunda nu muthu wafuile mukunda nu ene.’—2 Kol. 5:15.
LUNGIMBO 14 Louons le nouveau Roi de la terre !
a Wajiya gukalegela galuanda “Desizio Ngazula” gakhala gu suga ya longo diagasue dia mukanda Heta Monyo wa Ivo nu Ivo! ha gugukuatesa ha gukalegela ndaga udi mulonguga.
b Tala malongo ako ajiya gugukuatesa ha gukula mu nyuma mu longo « Jeunes, “menez à bien votre propre salut”» mu Inzo Yaleha ya Mutaledi ya Decembre 2017 ya français.
c Gula udi mutshigina gujiya malongo ako ajiya gugukuatesa ha gubamba khadilo diaye dia guhana Yehowa mersi, tala longo “Qu’est-ce qui nous pousse à servir Jéhovah?” mu Inzo Yaleha ya Mutaledi ya 15 Juin 1995 ya français.