Khala Mukalegela Mbimbi Jiabonga Tangua Diagasue Udi Mulongesa Giamatshidia

1. Itshi tudi naye gutshita ha gukhala mu fami ya Yehowa?

TANGUA tuana tagana nu aphangi’etu mu mbala ya thomo, muhu tuana guahula muavula wakhala egi: “Luholo lutshi muajiyile giamatshidia?” Aphangi ako ana hana mvutu egi “avualewe mu giamatshidia.” Ako nji ana zuela egi akatuga “guza mu giamatshidia.” Tuana zuela ngenyi handaga giamatshidia gidi mu Biblia giana tuameza monyo wetu. Mukunda natshi? Handaga tudi mujiya egi hagula tukhale mu fami ya Yehowa, tudi naye guzumba giamatshidia giene nu gugitumagele. Yakotelesa egi ndaga tudi muzuela nu tudi mukalagala jidi naye gukhala jia giamatshidia.​—Ngi. 15:1-3.

2. a) Yesu wakhalele muthu wa luholo lutshi? b) Ndaga itshi giamatshidia giakhalele mulongesa Yesu giakhalele naye gubata?

² Yesu wakhalele muzuela giamatshidia tangua diagasue. Nu jiene mbalagaji jienji jiakhalele mujiya egi Yesu wana zuela giamatshidia ikhale ndaga jiakhalele muzuela muene jiakhalele musagesa athu ako. (Mat. 22:16) Yesu wawambelele alandudi enji ndaga mbayibua tangua mbaalongesa athu giamatshidia, wazuelele egi: “Ngajile ha gukhaphumuna mon’a yala nu sh’enji, mon’a mukhetu nu gin’enji, mon’a mukhetu nu giwaji gienji gia mukhetu.” (Mat. 10:35) Yesu gakhalelego mutshigina egi athu atune lukuma luabonga luakhalele mulongesa muene nu alandudi enji, uvi wakhalele mujiya egi ndaga ya luholo elu yajiya gubua. (Mat. 23:37) Wakhalele mujiya egi lukuma luabonga mbalukhaphumuna athu mu itshinyi mbadi: athu mbaatshigina giamatshidia gia Biblia nu athu mbaatuna gawo.​—2 Tes. 2:9-11.

3. Itshi tuza muzuelela mu longo edi?

³ Esue nji tuana tshita yagasue ha guzuela giamatshidia tangua diagasue, ikhale gutshita ngenyi gushigo musuanguluisa athu ako. Tuana longesa nji giamatshidia gia Biblia ikhale ndaga tudi muwambela athu jidi guahana khabu. Ndaga yene idi mukotelesa egi tushigo naye gutadila luholo nu tangua tudi guawambela giamatshidia giene ba? Ndo sha! Mu longo edi, tuza thomo muhana mvutu gu muhu owu wa ndando: Gui tuajiya guheta giamatshidia? Gungima tuza nji muhana mvutu gu mihu eyi landula: Mukunda natshi tudi naye guzuela giamatshidia? Luholo lutshi tudi naye guzuela giamatshidia? Tangua ditshi tudi naye guzuela giamatshidia? Mvutu tuza muheta gu mihu yene jiza gutukuatesa ha gujiya luholo luabonga lua gulongesa athu giamatshidia nu ginemua nu mu tangua diabonga.

GUI TUAJIYA GUHETA GIAMATSHIDIA?

4. Mukunda natshi tuajiya guzuela egi Yehowa udi mudidi wa giamatshidia?

⁴ Yehowa udi mudidi wa giamatshidia. Ndaga jiagasue jiana zuela muene jiakhala jia giamatshidia. Ha gufezegesa, wana zuela giamatshidia tangua diana gutudijiga muene ndaga jiabonga nu ndaga jiabola. (Ngi. 19:9; 119:142, 151) Ndaga jiagasue jiana laya muene jiana tagana nji. (Yesh. 55:10, 11) Gushigo nga nu ndaga imoshi yana zuela muene inyi yanago gutagenewa. (Lutang. 23:19) Yadiago, Yehowa gajiyilego gumba mambo! (Heb. 6:18) Gishina giene ana gumutamega egi “Nzambi wa giamatshidia.”​—Ngi. 31:5.

5. Mukunda natshi yakhalago lamba ha gujiya “Nzambi wa giamatshidia”? Kotelesa. (Makalegelo 17:27)

⁵ Athu avula ana zuela egi yakhala lamba ha gujiya Yehowa “Nzambi wa giamatshidia,” uvi ishigo ngenyi. Tudi nu ijiyishilo yavula idi mumonesa egi Nzambi wakhala guene. (Roma 1:20) Mupostolo Phaula wawambelele athu alongugile muavula a gu Atene egi Nzambi wana tshigina egi athu ‘amukambe nu amumone’ handaga muene “gashigo gualeha nu muthu wagasue mukatshi dietu.” (Tanga Makalegelo 17:27.) Ndaga ya giamatshidia idi egi Yehowa wana kuata ufuta nu athu agudibulumuisa ana kamba giamatshidia.​—Yone 6:44.

6. Ndaga jitshi Biblia yana longesa? Mukunda natshi gujiya ndaga jiene gudi gugusuanguluisa?

⁶ Mukatshi dia ndaga tuajiya gutshita ha gujiya Yehowa, ndaga iko idi gulonguga Biblia. Athu asonegele Biblia ayisonegele mu ukuateshi wa nyuma ya Nzambi. (2 Phet. 1:20, 21) Ndaga jiagasue jiana khala mu Biblia jidi jia giamatshidia, tudi naye gujishila diago mutshima. Ha gufezegesa, tuajiya gusha mutshima mu ndaga jiana zuela Biblia jiatadila luholo ima yagasue idi mu dilu nu ha mavu yasendesele. (Gis. 1:1, 26) Tuajiya nji gusha mutshima mu ndaga Biblia yana zuela yatadila gishina mukut’etu agasue tuabuile enya gubola, tuana monela malamba nu tuana gufua. (Roma 5:12; 6:23) Tudi naye gusha mutshima mu ndaga Biblia yana zuela egi Yehowa mbawutuma mun’enji Yesu ha gumanesela malamba agasue atubatele Satana “sha mambo.” (Yone 8:44; Roma 16:20) Tudi naye nji gutshigina ndaga Biblia yana laya egi Yesu mbawushiya athu abola, mbawufuzumuna athu afuile gale, mbawubuisa mavu Phaladiso nu mbawutukuatesa ha gubua athu atagana. (Yone 11:25, 26; 1 Yone 3:8) Ndaga eji jiagasue jidi felela diabonga diatuhanele Yehowa! Watulongesele gale giamatshidia nu watuhanele luendu lua gulongesa athu ako giamatshidia giene.​—Mat. 28:19, 20.

MUKUNDA NATSHI TUDI NAYE GUZUELA GIAMATSHIDIA?

7-8. Ndaga jiana gututuma ha guzuela giamatshidia jiakhala nu ndando gu meso a Yehowa ba? Hana gifezegeselo. (Mako 3:11, 12) (Tala nji ifuanesa.)

⁷ Gifua luholo tuayimonyi gu thunda, tudi naye guzuela giamatshidia gula tudi mutshigina gukhala mu fami ya Yehowa. Uvi gula tudi mutshigina gumusuanguluisa, tushigo naye gusuga phamba ha guzuela giamatshidia. Ndaga idi gututuma ha guzuela giamatshidia yene yakhala nu ndando gu meso a Yehowa. Tutadilenu ndaga imoshi yabuile tangua Yesu wakhalele ha mavu. (Tanga Mako 3:11, 12.) Hakhalele muene mulongesa hehi nu kianga gia Galilea, athu avula ajile gudi muene. Mukatshi diawo guakhalele nu athu akhalele nu bademo, athu ene abuile gutuama dienji nu asendesele gukaluga egi: “Udi Mun’a Nzambi.” Mukunda natshi bademo ene azuelele ndaga jia giamatshidia mukunda nu Yesu? Yajiya gukhala egi felela diawo diakhalele dia guwunganesa matangi a athu akhalele guategelela hagula ajiya guashila mutshima nu ha guakanga njila ha gukombelela Yehowa. Bademo ene azuelele gawo ndaga jia giamatshidia, uvi ajizuelele nu matangi abola. Yesu wakotelesele matangi awo abola nu gasuangulugilego. Gishina giene, waatunyishile ha guwambela athu ndaga jiamutadila.

⁸ Lumene elu ludi gutulongesa itshi? Ludi gutulongesa egi ndaga jiana gututuma ha guzuela giamatshidia jiakhala nu ndando gu meso a Yehowa. Hene, tudi naye gulongesa athu ako giamatshidia nu matangi abonga nu gukamba lutumbu lua Yehowa uvi luetu hakhetu ndo!​—Mat. 5:16; fuanesa nu Makalegelo 14:12-15.

9. Itshi tushigo naye gutshita? Mukunda natshi?

⁹ Tutadilenu gifezegeselo gimoshi gidi mumonesa gishina tudi naye gutshita yagasue ha gutuna gubua mu muheto wa gukamba lutumbu luetu hakhetu. Tangiza gale egi phangi mumoshi udi nu inemo watuwambela ndaga imoshi ya gisuegi, uvi gungima esue tuayiwambela athu ako. Gula athu ene tuawambela ajiya gungima egi ndaga tuaawambelele jiakhalele jia giamatshidia, ajiya gudihula muavula nu gusendesa gutangiza egi tudi mujiya ndaga jiko jiavula gia gisuegi. Gutshita ngenyi guajiya gutuma athu ha gutushimana muavula, uvi mbayishigo musuanguluisa Nzambi. (Ish. 11:13) Mukunda natshi? Handaga tuazuedi ndaga jia gisuegi tuakhalelego naye guwambela athu ako, tuakhadi nji nu matangi abola.

LUHOLO LUTSHI TUDI NAYE GUZUELA GIAMATSHIDIA?

10. Guzuela “mbimbi jiabonga” gudi mukotelesa itshi? (Kolosai 4:6)

¹⁰ Tanga Kolosai 4:6. Mupostolo Phaula wawambelele Aklisto a gu Kolosai egi mbimbi jiawo jidi naye gukhala “jiabonga tangua diagasue.” Wakhalele mutshigina guzuela itshi? Mbimbi ya Greke akalegela haha idi mukotelesa egi ndaga tudi muzuela jidi naye gukuatesa athu ako, jidi naye nji gukhala nu gisemo.

11-12. Mukunda natshi tudi naye gumonesa gutema tangua tudi mulongesa athu ako giamatshidia? Hana gifezegeselo. (Tala nji ifuanesa.)

¹¹ Tudi naye gukalegela longo dia Phaula dia guzuela mbimbi jiabonga tangua diagasue tudi mulongesa athu ako giamatshidia. Biblia yana fuanesa giamatshidia giene nu phogo idi nu mazo abala inyi yajiya gukhaphumuna monyo nu nyuma. Mu guzuela guko, yajiya gutukuatesa ha gujiya matangi etu nu umuthu wetu wa mukatshi. (Heb. 4:12) Uvi gula tushigo mukalegela Biblia muabonga, ndaga tudi muzuela jiajiya gusagesa athu ako nga guahana khabu. Luholo lutshi ndaga ya luholo elu yajiya gutubuila?

¹² Tangiza gale egi tudi mu mudimo wa gulongesa. Tuasanga yala mumoshi udi musuanguluga nu giamatshidia, uvi wana kombelela isongo nu wana kalagala wano wa Nowele nu Pake hamoshi nu enya fami yenji. Tuajiya gukalegela Biblia ha gumumonesa egi gukombelela isongo gudi ndaga yabola nu gumuwambela egi Nowele nu Pake yakhala mawano a aphagano. (Yesh. 44:14-20; 2 Kol. 6:14-17) Gula tuamuwambela ndaga jiene jiagasue mu gudimona gua thomo, idi yadiago egi tuamuwambela getu giamatshidia uvi ishigo luholo luabonga lua gukalegela Mbimbi ya Nzambi.

13. Mu luholo lutshi tuajiya gumba mbimbi jietu mungua?

¹³ Phaula wazuelele nji egi tudi naye nji gumba mbimbi jietu mungua, yakotelesa egi mbimbi tudi muzuela jidi naye gusuanguluisa athu ako. Gakhalelego mutshigina guzuela egi tudi naye gusombegesa giamatshidia nga gugisuega. Uvi wakhalele mutshigina guzuela egi tudi naye gukalegela mbimbi jiabonga hagula tangua tudi mulongesa athu ako giamatshidia, ajiya gusuanguluga nu ndaga tudi guawambela. (Yobo 12:11) Uvi gutshita ngenyi guajiya gukhala lamba matangua ako. Ha gufezegesa, tangua tuana londa ima ya gudia, tuana guyitelega mu luholo tuatshigina, tuana gudifelela nji egi athu ako asuanguluge nu ima yene tuatelega. Luholo lumoshi nji, tuajiya gutangiza egi luholo luetu lua guzuela ludi musuanguluisa athu agasue. Uvi mu guzuela guabonga ishigo ngenyi. Ha gufezegesa, athu a mu mafundo ako akhala nu khadilo dia guzuelela matangi awo haphelo ikhale adi muzuela nu muthu wa gukola nga ndo. Uvi mukunda nu athu a mu mafundo ako, guzuela ngenyi gudi ndaga yabola nu gushigo nu ginemua. Phaula wazuelele egi tudi naye gujiya luholo lua “guhana muthu wagasue mvutu.” Yakotelesa egi tudi naye guzuela mu luholo ludi musuanguluisa athu adi gututegelela uvi ishigo mu luholo tuatshigina nga mu luholo athu ana zuela mu mafundo tuana jinga.

TANGUA DITSHI TUDI NAYE GUZUELA GIAMATSHIDIA?

14. Hakhalele Yesu ha mavu, walongesele alandudi enji ndaga jiagasue jiakhalele mujiya muene ba? Kotelesa.

¹⁴ Yesu wakhalele muwambela alandudi enji mbimbi jiabonga tangua diagasue, waalongesele nji ndaga jiavula nu gisemo giagasue. (Mako 6:34) Uvi guakhalele nu ndaga jiko jiavula alandudi enji akhalele naye gujiya. Yesu gakambelego gualongesa ndaga jiagasue jiakhalele mujiya muene. Wakhalele mujiya muabonga luholo luawo lua gukotelesa ndaga. Wakhalele nji mujiya egi tangua diabonga dia gualongesa ndaga jiko khenji ditagana. Wazuelele egi akhalelego nu luholo lua gukotelesa ndaga jiene. (Yone 16:12) Ndaga yene idi gutulongesa itshi?

15. Tudi naye gulongesa athu tuana longuga nawo Biblia ndaga jiagasue tudi mujiya mu mbala imoshi ba? Kotelesa. (Ishima 25:11) (Tala nji gifuanesa.)

¹⁵ Gifezegeselo gia Yesu gidi gutulongesa egi gujiya giamatshidia gushigo mukotelesa egi tudi naye gulongesa athu ndaga jiagasue tudi mujiya mu mbala imoshi. Na luholo lutshi tuajiya gulandula gifezegeselo gia Yesu? Tudi naye gujiya ndaga jia mu monyo wa athu tudi mulongesa. Tuvutugile gale luko gifezegeselo gia muthu wana suanguluga gutshita wano wa Nowele nu Pake hamoshi nu enya fami yenji. Tudi mujiya egi mawano ene akhala a aphagano nu anago gusuanguluisa Nzambi. Henyaha tangiza gale egi wasendesa gulonguga n’enji Biblia phoso imoshi nga mbadi gutuama dia wano wa Nowele. Mbayikhala ndaga yabonga ha gumuwambela ndaga jiagasue Biblia yana zuela mukunda nu mawona a aphagano nu gudifelela egi abembe gutshita Nowele mbala imoshi ba? Idi yadiago egi athu ako tuana longesa Biblia ana kalegela ndaga tuana gualongesa muphushi. Uvi ako ana zula tangua diavula gutuama dia gusombegesa matangi awo nu makalegelo awo. Hene, tuajiya gukuatesa athu tuana longesa Biblia ha gukula mu nyuma gula tudi guawambela ndaga adi naye gujiya mu tangua diabonga, yakotelesa egi mu tangua ajiya gukotelesa muabonga ndaga jiene.​—Tanga Ishima 25:11.

16. Luholo lutshi tuajiya gukuatesa athu tuana longesa Biblia ha gulandula ‘guwenda mu giamatshidia’?

¹⁶ Gushigo nu ndaga jiajiya gutubatela gusuanguluga guavula gubalega gulongesa athu ako giamatshidia giatadila Yehowa. Tuajiya guakuatesa ha gulandula ‘guwenda mu giamatshidia’ gula esue hakhetu tuaahana gifezegeselo giabonga. (3 Yone 3, 4) Hene, tshita yagasue hagula makalegelo aye amonese egi wana gusha mutshima mu ndaga jiana gutulaya Yehowa mu Biblia. Khala muzuela giamatshidia nu matangi abonga. Khala nji muzuela mbimbi jiabonga nu gisemo giagasue; khala nji mutomba tangua diabonga ha gulongesa giamatshidia giene. Khala muhana lutumbu luagasue udi muheta gudi Yehowa. Gula wakalagala ngenyi, mbawumonesa diago egi wana kombelela Yehowa Nzambi wa giamatshidia.