Yelemiya
9 Aa! Nga muto wami udi gifua gijiba gia meya,
nga meso ami adi gifua gito gia masoji!
Nga ngadidi phipha nu muanya
mukunda nu akuaku’ami anyi ashiyiwe.
2 Aa! Gula nga gudi nu fundo dia gukhala mu mavu a luselenga mukunda nu muthu wana tshita vuayaje!
Nga ngudi mubemba akuaku’ami ha guya gualeha nawo,
handaga mukut’awo agasue adi thambi,
hunji dia athu abola.
3 Adi mufugula madimi awo gifua uta wa manana;
gifutshi giazala pha nu mambo nu gulumbuga.
“Adi mulunda gubola holu dia gubola,
ashigo gungutegelela nga hazonda,” Yehowa wazuela.
4 “Enue athu agasue, temenu genu nu athu ana khala n’enu hehi,
mushigo naye gushila nga ene aphangi’enu a mala mutshima.
Handaga aphangi’enu agasue adi enya mambo,
athu agasue muana khala nawo hehi ana mbila athu mambo.
5 Muthu wagasue udi muhuiga muthu wana khala n’enji hehi,
gushigo nga nu muthu udi muzuela giamatshidia.
Alongesa madimi awo ha guzuela ndaga jia mambo.
Adi gawo gudihudisa ha gutshita ndaga jiabola.
6 Udi mujinga mukatshi dia mambo.
Ene atunyi gungujiya mukunda nu mambo awo,” Yehowa wazuela.
7 Gishina giene Yehowa Nzambi wa masuta wazuela egi:
“Mbanguazoza ha tshuya nu mbangualola,
handaga itshi iko ngajiya gutshita athu ami?
8 Madimi awo adi gifua mifula yana shiya, adi muzuela ndaga jia mambo.
Muene udi muwambela muthu wana khala n’enji hehi mbimbi jia guhuima,
uvi udi gumutela muheto mu mutshima.
9 Yehowa wazuela egi: “Ngushigo naye guahana ndola mukunda nu ndaga eji ba?
Ngushigo naye guvutudila gifutshi egi gubola ba?”
10 Mbangudila, mbangukhala nu gikenene mukunda nu milundu,
mbanguyimba lungimbo lua masaga* mukunda nu muangu wa gudisa shitu wa mu mavu a luselenga,
handaga wakondewe tshuya hagula nga muthu gabalegago guene,
matululu a shitu jia hembo ashigo muvuiwa.
Tunjila tua gosa nu shitu jiabala jialenga; jiatota.
11 Mbangubuisa Yelusalema gifua misonga ya maseso,* mbayibua fundo dia gubanda mukunda nu makombe,
mbangubuisa membo a gu Yuda makhulu, nga muthu mbagashigo mukhala guene.
12 Nanyi udi nu ndunge jiavula ha gukotelesa ndaga eyi?
Gula Yehowa watele n’enji maga, azuele.
Mukunda natshi gifutshi giabolesewe?
Mukunda natshi giahile giabua gifua mavu a luselenga,
hagula nga muthu gabalegago guene?
13 Yehowa wahanele mvutu egi: “Handaga ene atunyile mukhuala* ngaahanele, awulanduilego, atunyile nji gutumagela mbimbi yami. 14 Ene akhalele mito yakola, alanduile mitshima yawo, akombelele isongo ya Bale gifua muaalongesele ashi’awo. 15 Gishina giene Yehowa Nzambi wa masuta, Nzambi wa Isalele wazuela egi: ‘Ngudi mudisa athu awa mutshi walula, mbanguanuisa nji meya adi nu puazo. 16 Mbanguamuanga mukatshi dia ifutshi inyi ene nu ashi’awo akhalelego mujiya; mbanguatumina nji phogo ya khusa, mbayaalandula uu nu tangua mbanguamanesela mukut’awo agasue.’
17 Yehowa Nzambi wa masuta wazuela egi:
‘Tshitenu ndaga nu gutema.
Bungisenu akhetu ana yimba ngimbo jia masaga,
tumenu athu ha guya mutamega akhetu ana jiya gudila muabonga.
18 Aze muphushi atuhagele* isenzele,
hagula meso etu azole masoji avula,
izumbu yetu ya meso itebe nu masoji.
19 Matululu a isenzele adi muvuiwa gu Siona:
“Tuamona diago lamba diakola!
Tuavuishiwa diago musonyi!
Handaga tuabembele gifutshi, amuangele jinzo jietu.”
20 Enue akhetu, tegelelenu mbimbi ya Yehowa.
Matshui enu alandule mbimbi idi muzoga mu kano dienji,
longesenu ana a akhetu isenzele eyi,
dilongesenu lungimbo elu lua masaga.*
21 Gufua gua kanduga ha fenetre;
guangina mu jinzo jietu jidi nu ibayi yakola
ha guzula an’etu mu mabala-bala
nu mavuala a mala mu mafundo a athu avula.
22 Zuela egi, ‘Yehowa wazuela egi:
“Imbi ya athu mbayibua gifua tuji tua shitu mu dihia,
gifua mbuto jidi mu ndonga jiakatudiwa luenyelu gudi muthu wana katula mbuto,
mbagukhadigo nu muthu wa guyibungisa.”’”
23 Yehowa wazuela egi:
“Muthu watema gadisunzulago mukunda nu gutema guenji;
muenya ngolo gadisunzulago mukunda nu ngolo jienji;
muthu udi nu umonyi gadisunzulago mukunda nu umonyi wenji.”
24 “Uvi muthu udi gudisunzula adisunzule mukunda nu ndaga eyi:
Egi udi nu ndunge jia gukotelesa ndaga nu udi gungujiya.
Udi nji mujiya egi, ame ngudi Yehowa muthu wana monesa guzumba gua giamatshidia,
wana sophesa ndaga mu luholo luabonga, wana tshita ndaga jiabonga ha mavu,
handaga jiene ndaga jiana gungusuanguluisa.” Yehowa wazuela.
25 Yehowa wazuela egi: “Tegelelenu! Mu masugu adi muza, mbangusophesa athu agasue ambiwe gu mukanda nu anyi khenji ambiwego gu mukanda, 26 nu Ejipitu nu Yuda nu Edome nu enya Amona nu Moaba nu athu agasue akuludiwe mito gu tempelo anyi ana khala mu mavu a luselenga. Handaga ifutshi yagasue khenji yambiwego gu mukanda, nu ene enya Isalele; ngatshima enya Isalele ambiwe gu mukanda uvi mukanda wawo ushigo wa giamatshidia.”*