Yelemiya
10 Oo enue enya Isalele, tegelelenu mbimbi idi gumiwambela Yehowa. 2 Yehowa wazuela egi:
“Mulandulago makalegelo a enya ifutshi,
muvigo woma wakola mukunda nu ijiyishilo ya mu dilu
gifua luholo enya ifutshi adi guyivila woma.
3 Handaga makalegelo a enya ifutshi adi abola.*
Muthu wana tshita mudimo wa mago wakoka mutshi mu gishitu,
walonda gisongo nu mutshi wene.
4 Ene agikunga utadi wa siliva nu wolo
agikolesa nu marto nu misumadi hagula gibuigo.
5 Gidi gifua gifuanesa gia muthu gialondewa mu dihia dia kokombre ha gukaya tunjila, giene giajiyilego guzuela;
gidi naye gubatewa handaga giajiyilego guwenda.
Ugivilago woma, handaga giajiyilego gutshita
nga ndaga imoshi yabola nga yabonga.”
6 Gushigo nga nu muthu udi gifua aye, Oo Yehowa.
Udi wakoma, jina diaye didi diakoma, diana monesa ngolo jiaye.
7 Nanyi gashigo naye guguvila woma, Oo aye fumu wa ifutshi yagasue? Adi naye guguvila diago woma;
handaga mukatshi dia athu agasue atema a mu ifutshi nu a mu mawufumu awo
gushigo nga nu muthu mumoshi udi gifua aye.
8 Mukut’awo agasue ashigo mutangiza muabonga, adi aheya.
Longo didi mukatuga gudi mutshi didi dia githuhu.*
9 Adi muzula utadi wa siliva gu Talesise, ha guza nawo nu wolo wa gu Ufaze,
unu athu anakalagala mudimo wa mago nu mbembo ana kalegela ha gulondega isongo.
Adi musudigisa isongo yene milele yalondewe nu wanda wa ble nu uvuji wa shitu wabenguluga,
athu ana jiya gutshita mudimo muabonga alondele isongo yene yagasue.
10 Uvi Yehowa udi Nzambi wa giamatshidia.
Udi Nzambi wa monyo, udi nji fumu mayilago.
Handaga khabu jienji mbajidigitshisa mavu,
gushigo nga nu gifutshi gimoshi mbagikolesela mu khabu jienji.
11* Udi naye guawambela ndaga eyi:
“Nzambi jinyi jiafugilego dilu nu mavu
mbajitota ha mavu, yakotelesa egi goshi’a dilu.”
12 Muene wasunuine mavu mu ngolo jienji,
walondele mavu ana zola mbuto nu gutema guagasue,
wasunuine dilu mu ndunge jienji.
13 Gula muene wazuela,
meya adi mu dilu ana bua nyiga-nyiga,
wana kanduisa matuta* adi gu songi jia mavu.
Wana henyesa mvula hadi munoga yene;
wana zola funji mu jinzo jienji jia gubambela ima.
14 Muthu wagasue gashigo mutangiza muabonga, gashigo mujiya nga gima;
mbembo wagasue mbawuhanewa musonyi mukunda nu isongo yenji;
handaga isongo yenji ya utadi idi ya mambo,
yene ishigo muhuima.*
15 Idi ima ya githuhu,* ima idi mulelesa.
Yene mbayitota mu lusugu lua usopheshi.
16 Nzambi* wa Yakoba gashigo gifua ima yene,
muene wafugile ima yagasue,
Isalele udi muhango wenji, khapho dienji.*
Jina dienji Yehowa Nzambi wa masuta.
17 Oo aye mukhetu udi wa gujietewa,
wongega ima yaye idi mu mavu.
18 Handaga Yehowa wazuela egi:
“Ngudi mukaya* athu a mu gifutshi mu tangua dimoshi,
mbanguahana lamba diakola.”
19 Lamba diami, handaga ngudi ya gunamana!*
Phuta yami yajiyilego gusagewa.
Ngazuedi egi: “Idi misongo yami, ngudi naye gukolesela.
20 Tenta yami yamuangewe, shinga jienji jiagasue jiabatudiwe.
An’ami a mala angubemba, ashigo luko guene.
Gushigo nga nu muthu wasala ha gujiga tenta yami nga ha gukudiga milele yenji.
21 Handaga abambi a imeme akalegele ndaga nu guheya,
ene ahudilego Yehowa.
Gishina giene akalegelego ndaga nu gutema,
imeme yawo yagasue yamuangewe.”
22 Tegelelenu! Lumene luakatuga guheta!
Matululu akola akatuga mu gifutshi gia gu khanda ya nord,
ha gubuisa membo a gu Yuda makhulu, fundo dia gubanda mukunda nu makombe.
23 Oo Yehowa, ngudi mujiya muabonga egi muthu gajiyilego guditombela njila yenji.
Muthu gajiyilego gutuameza ikanzo yenji hadi muene muwenda.
24 Oo Yehowa, nguhane ndola mu luholo udi mumona egi idi yatagana,
unguhanyigo ndola nu khabu, hagula ungushiyigo.
25 Vua khabu mukunda nu ifutshi inyi yana tuna gugujiya,
nu fami jinyi jianago gutamega jina diaye.
Handaga ene aluishile Yakoba,
akambele nji gumushiya,
abuishile gifutshi gienji makhulu.