Yelemiya
8 Yehowa wazuela egi: “Mu tangua diene, ifuwa ya mafumu a gu Yuda nu ya manene a gu Yuda, nu ya nganga-nzambi nu ya baprofete, nu ya enya gu Yelusalema, mbayizolewa mu malumba awo. 2 Mbayinegewa gutuama dia kumbi nu ngonda* nu masuta agasue a mu dilu anyi akhalele ene muzumba, mukalegela mudimo, mulandula, mukamba nu mukombelela. Mbayishigo mubungishiwa, mbayishigo nji mufundjiwa. Mbayibua gifua tuji tua shitu mu mavu.”
3 Yehowa Nzambi wa masuta wazuela egi: “Athu anyi mbaasala nu monyo mbaatomba gufua ha fundo dia gukhala nu monyo mu mafundo agasue mbanguamuanga.”
4 Udi naye guawambela egi, Yehowa wazuela egi:
“Gula ene abua ajiyilego luko guzuga ba?
Gula nga muthu mumoshi wavutugile, nga athu ako avutugilego nji ba?
5 Mukunda natshi athu awa, enya gu Yelusalema adi mulandula gungulumbugila?
Ene adi jigi-jigi gu ndaga jia mambo;
adi mutuna guvutuga.
6 Ngahagele kutshi, ngalanduile gutegelela, uvi ndaga akhalele muzuela jiakhalelego jia giamatshidia.
Gushigo nga muthu mumoshi wabalumuine mutshima mu gubola guenji nga wahudile egi: ‘Itshi ngatshitshi?’
Muthu wagasue wakhalele muvutugila ndaga jiakhalele mutshita athu agasue, gifua gabalu gadi muya phushi gu ita.
7 Nu yene njila ya kolo gosa yana jiya tangua dienji;
yembe* nu galanda-landa nu gapheya yana jiya tangua dia guvutuga.
Uvi athu ami ashigo mukotelesa usopheshi wa Yehowa.”
8 ‘Luholo lutshi muajiya guzuela egi: “Tudi athu atema, tudi nu mukhuala* wa Yehowa,”
tangua basekretere adi mukalegela ilabi* ya mambo ha gusonega ndaga jia mambo?
9 Athu atema avuishiwe musonyi,
avuile woma wakola, mbaakuatewa.
Tala! Ene atunyile mbimbi ya Yehowa,
na gutema guawo gudi gui?
10 Mbanguhana akaji’awo gudi mala ako,
mbanguhana nji mahia awo gudi athu ako.
Handaga mukut’awo agasue adi muheta ima mu luholo luabola, sendese gudi athu a githuhu uu nu gudi athu akoma;
mukut’awo agasue adi mukuya, sendese gudi baprofete uu nu gudi nganga-nzambi.
11 Adi mukamba gusaga phuta* jia athu ami holu-holu, adi guawambela egi:
“Guhuima gudi guene! Guhuima gudi guene!”
Hoho guhuima gushigo guene.
12 Ene adi muvua musonyi mukunda nu ndaga jia usala akalegele ba?
Ndo, ashigo muvua musonyi nga hazonda!
Ashigo mujiya luholo lua guvua musonyi!
Gishina giene, mbaabua mukatshi dia athu abuile gale.
Ene mbaakhakhuga tangua mbanguahana ndola,’ Yehowa wazuela.
13 ‘Yehowa wazuela egi, ‘mbanguashiya tangua mbanguabungisa.
Isuga ya vinyo mbayikhadigo luko gu mutshi wa vinyo, nga figi gu mutshi wa figi, mayiji mbaamigina.
Ene mbaatotesa ima ngaahanele.’”
14 “Mukunda natshi tuakhala hashi?
Tudibungisenu, tunginenu mu membo adi nu ibayi yakola, tufuile guene.
Handaga Yehowa Nzambi wetu mbawutushiya,
muene udi gutuhana meya adi nu puazo ha gunua,
handaga tuakalegele gubola gu meso a Yehowa.
15 Tuakhalele gudifelela guhuima, uvi tuamonelego nga gima giabonga,
tuakhalele gudifelela ha gusagewa, uvi henyaha tudi muvua woma wakola!
16 Matululu a tubalu tuenji adi muvuiwa gu Dane.
Matululu akola a tubalu tuenji tua milume
adi mudigitshisa gifutshi.
Ene aza, abolesa gifutshi nu ima yagasue idi muene,
dimbo nu athu adi muene.”
17 “Handaga ngudi gumitumila nyoga,
nyoga jiabala jinyi nga muthu gajiyilego gukanga njila hagula jisumigo muthu,
jiene mbajimisuma diago,” Yehowa wazuela.
18 Gikenene giami giajiyilego guhua;
mutshima udi gungukata.
19 Majui a athu adi mudila ha gutoga ukuateshi adi muzogela mu gifutshi gia gualeha,
mukatshi dia athu ami, adi muzuela egi:
“Yehowa gashigo luko gu Siona ba?
Fumu wa Siona gashigo luko guene ba?”
“Mukunda natshi anguhanyi khabu nu isongo yawo,
nu nzambi jiawo jia ngenji jinyi jishigo nu ndando?”
20 “Sungi ya gukatula mbuto yabalega, sungi ya muanya wakola yahua,
uvi esue khenji tuhuluishiwa gale ndo!”
21 Ngudi gudi sagesa muavula mukunda nu phuta* jia athu ami;
ngudi nu gikenene giavula.
Woma wakola wangukuata.
22 Gushigo nu maji a balesame* gu Gileade ba?
Gushigo nu muthu wana saga* guene ba?
Mukunda natshi athu ami khenji akola gale ndo?