Yelemiya

7 Yehowa wawambelele Yelemiya mbimbi eji egi: 2 “Nda umagane ha mufulo wa inzo ya Yehowa uzuele mbimbi eji egi, ‘tegelelenu mbimbi ya Yehowa, enue athu agasue a gu Yuda ana ngina ha mifulo eyi ha gufugama gutuama dia Yehowa. 3 Yehowa Nzambi wa masuta, Nzambi wa Isalele, wazuela egi: “Londegenu njila jienu nu makalegelo enu, ngenyi mbangumibemba ha gulandula gukhala ha fundo edi. 4 Mudifelelago gu mbimbi jia mambo, muzuedigo egi, ‘yiyi* tempelo ya Yehowa, tempelo ya Yehowa, tempelo ya Yehowa!’ 5 Gula mualondega diago njila jienu nu makalegelo enu nu muabatula mulonga udi mukatshi dia athu mu luholo luabonga; 6 gula mushigo musagesa ngenji nu ana a shiye* nu akhetu a gafunda; gula nji muamuangelego mahatshi a athu atshitshilego gubola ha fundo edi; gula mushigo mulandula nzambi jiko ha gutuna gudibatela malamba; 7 Ngenyi mbangumibemba ha gulandula gukhala ha fundo edi, mu gifutshi ngahanele akhakh’enu ha gukhala mayilago.”’”

8 “Uvi mudi gudifelela gu mbimbi jia mambo, mbajishigo gumibatela nga gubonga gumoshi. 9 Mudi mutangiza egi enue muajiya gukuya, mushiyi athu, mukalagala uthambi, mudilogi gudiloga gua mambo, muhanyi milambu* gudi Bale, mulandula nzambi jinyi muakhalelego mujiya, 10 gungima mumagana gutuama diami mu inzo yiyi idi nu jina diami, muzuedi egi, ‘mbatuhuluishiwa’, ikhale enue genu mutshita ndaga eji jiagasue jia usala ba? 11 Muabuisa inzo idi nu jina diami gifua inzo ya nzangi gu meso enu ba? Ame hakhami ngadimonela ndaga yene.” Yehowa wazuela.

12 “‘Henyaha ndenu ha fundo diami gu Shilo, fundo ngadiangele guhaga jina diami ha gukhala guene, mutale ndaga ngakalegele guene mukunda nu gubola gua athu ami, enya Isalele.’ 13 Yehowa wazuela egi, ‘muakhalele mutshita ndaga eji jiagasue, ikhale ngakhalele gumiwambela mbala jiavula,* uvi muakhalelego mutegelela. Ngakhalele gumitamega uvi muakhalelego mutaya. 14 Mbangutshita inzo eyi idi nu jina diami, inyi muana shila mutshima nu fundo edi ngamihanele nu akhakh’enu, gifua luholo ngatshitshile gu Shilo. 15 Mbangumikaya gutuama diami, gifua luholo ngakayele aphangi’enu, ajigulu agasue a Efrayime.’

16 Uvi aye, ukombelelago mukunda nu athu wawa. Udidigo, utshitshigo gisambu, ungububilago mukunda nu ene, mbangushigo gugutegelela. 17 Ushigo mumona ndaga adi mukalagala mu membo a gu Yuda nu mu mabala-bala a gu Yelusalema ba? 18 Ana a mala adi mutshiaya khunyi, atata adi muhaga tshuya, akhetu adi mubalumuna pate ha gulonda bagato ha guahana gifua mulambu gudi Fumu Mukhetu wa mu Dilu,* ene adi muhana milambu ya matombe gudi nzambi jiko ha gunguhana khabu. 19 Yehowa wazuela egi, ‘idi ame adi mutshitshila gubola* ba? Ndo, adi guditshitshila ene hakhawo gubola, adi gudihana musonyi.’ 20 Gishina giene Yehowa Fumu Wabalega Gukoma wazuela egi: ‘Talenu! Mbanguvila fundo edi khabu jiakola, nu mala nu shitu jia mu foto, nu mitshi ya mu temu nu mbuto jia mu mavu; khabu jiene mbajilemuga gifua tshuya, mbajishigo muhua.’

21 Yehowa Nzambi wa masuta, Nzambi wa Isalele wazuela egi, ‘lundenu milambu yenu yagasue ya guwotshia holu dia milambu yenu iko, dienu misunyi yenu hakhenu. 22 Handaga mu lusugu ngazolele akhakh’enu mu Ejipitu, ngatelego nawo maga nga guahana mukhuala mu ndaga yatadila milambu yagasue ya guwotshia nu milambu iko. 23 Uvi ngaawambelele egi: “Tumagelenu mbimbi yami, ngenyi mbangubua Nzambi wenu, enue mbamubua athu ami. Mudi naye gulandula njila jiagasue ngamiwambela, hagula ndaga jiyile muabonga mukunda nu enue.”’ 24 Uvi ene ahagelego matshui awo ha gutegelela; alanduile matangi’awo* hakhawo, akhalele mito yakola, alanduile mitshima yawo yabola, ha fundo dia guya gutuama ene akhalele muvutuga gungima. 25 Sendese mu lusugu akhakh’enu azogele mu Ejipitu uu nu mangino ndaga jiana kalegewa ngenyi. Ngakhalele gumitumina enya mudimo wami baprofete, lusugu nu lusugu, ngakhalele mutshita ngenyi mbala jiavula. 26 Uvi atunyile gungutegelela, anguvidilego.* Akhalele mito yakola, akalegele ndaga jiabola gubalega nu ene akhakh’awo!

27 “Aye mbawawambela ndaga eji jiagasue uvi mbaashigo gugutegelela, mbawaatamega uvi mbaashigo mutaya. 28 Mbawawambela egi, ‘gifutshi egi giatumagelego mbimbi ya Yehowa Nzambi wawo, giatuna gutegelela malongo. Ndaga jiabonga jiatota mukatshi diawo, ashigo luko gujizuelela.’

29 “Bunga sanga diaye dinyi khenji dibungiwe gale ndo,* udibishile, ute isenzele* holu dia tumilundu tushigo nu mitshi, handaga Yehowa watunyi gindongo gia athu wawa amuhanele khabu nu mbawaabemba. 30 Yehowa wazuela egi, ‘enya gu Yuda akalegele ndaga yabola gu meso ami, amagenesele isongo yawo ya usala mu inzo yana khala nu jina diami, ha guyibolesa. 31 Alondele mafundo a gukombelela gu Tofeta, mu Baba dia Mun’a Hinoma,* ha gukonda an’awo a mala nu a akhetu ha tshuya. Uvi ame ngaawambelelego ha gutshita ndaga ya luholo elu, khenji ingujidilego nji nga hazonda mu matangi.’

32 Yehowa wazuela egi: “‘Gishina giene, mu masugu adi muza fundo diene mbaditamegewago luko egi Tofeta nga Baba dia Mun’a Hinoma,* uvi mbaditamegewa egi Baba dia Gushiya. Mbaafunda athu gu Tofeta uu nu tangua fundo dia gufunda athu mbadihua. 33 Imbi ya athu wawa mbayibua ima ya gudia mukunda nu tunjila tua gosa nu shitu jiabala jia ha mavu, mbagukhadigo nga nu muthu wa gujihana woma. 34 Mbangusugisa milolo ya gusuanguluga nu gusuanguluga mu membo a gu Yuda nu mu mabala-bala a gu Yelusalema; dijui dia yala udi muzula mukhetu mu ulo nu dia mukhetu udi muzudiwa mu ulo mbadivuiwago luko guene, handaga gifutshi mbagibua makhulu.’”