Yelemiya
6 Oo ana a Benjame, disuegenu gualeha nu Yelusalema.
Shigenu phungi gu Tekoa.
Lemesenu tshuya gu Bete-Hakelema gifua gijiyishilo!
Handaga lamba didi mukatuga gu khanda ya nord, lamba diakola diago.
2 Mona wa mukhetu wa gu Siona udi gifua mukhetu wabonga munu wana zonzewa.
3 Abambi a imeme mbaaza nu shitu jiawo jiavula.
Mbaajiga tenta jiawo mu khulo jienji jiagasue,
muthu wagasue mukatshi diawo mbawudisa shitu jiana tala muene.
4 “Dilondegenu* ha gumuluisa ita!
Tuzugenu tumuluisenu mu midi!”
“Lamba dietu, handaga tangua diasendesa gushiwuga,
ngueze yabua, guma guasendesa gubuita!”
5 “Zugenu, tuyenu tumuluise mu phipha,
tumuangenu nji jinzo jienji jialeha jidi nu ibayi yakola.”
6 Yehowa Nzambi wa masuta wazuela egi:
“Kokenu mitshi, kanduisenu misonga ya mavu ha guluisa Yelusalema.
Didi dimbo didi naye guhanewa ndola;
dimbo diene didi dia guzala pha nu usageshi.
7 Ndaga jiabola jidi muzoga mu dimbo diene,
gifua luholo gito gia muta giana zola meya alatulu.
Matululu a umbundudi nu a gufua adi muvuiwa mukatshi dia dimbo;
misongo nu malamba adi tangua diagasue gutuama diami.
8 Oo Yelusalema, tema gaye, gula ndo mbawungusegela, mbangugutuna;
mbangugubuisa makhulu, fundo dishigo nu athu.”
9 Yehowa Nzambi wa masuta wazuela egi:
“Mbaakatula enya Isalele anyi asalele gifua
luholo ana katula isuga ya vinyo ya gisugishilo inyi yana sala gu mutshi wa vinyo.
Balegesa luko koko diaye gifua muthu udi muwongega isuga ya vinyo yakatula muene gu mitshi ya vinyo.”
10 “Nanyi ngudi naye guwambela? Nanyi ngudi naye gutemesa?
Nanyi mbawungutegelela?
Tala! Matshui awo adi a gukanga, ene ashigo nu luholo lua guvua muabonga.
Tala! Mbimbi ya Yehowa yabua gifua gima gia gusegulula mukunda nu ene;
ene ashigo musuanguluga nayo.
11 Ngudi ya guzala pha nu khabu jia Yehowa,
ngahuila gami ha gujibata.”
“Jibunduile mona wa zonda mu bala-bala,
jibunduile mahunji a mavuala adibungisa hamoshi.
Mukut’awo agasue mbakuatewa, yala nu mukaji’enji,
athu a gukola nu athu adi agukola mangololo.
12 Jinzo jiawo mbajihanewa gudi athu ako,
hamoshi nu mahia awo nu akaji’awo.
Mbangusununa koko diami ha guluisa athu a mu gifutshi,” Yehowa wazuela.
13 “Mukut’awo agasue adi muheta ima mu luholo luabola, sendese gudi athu a githuhu uu nu gudi athu akoma;
mukut’awo agasue adi mukuya, sendese gudi baprofete uu nu gudi nganga-nzambi.
14 Adi mukamba gusaga phuta* jia athu ami holu-holu, adi guawambela egi:
‘Guhuima gudi guene! Guhuima gudi guene!’
Hoho guhuima gushigo guene.
15 Ene adi muvua musonyi mukunda nu ndaga jia usala akalegele ba?
Ndo, ashigo muvua musonyi nga hazonda!
Ashigo mujiya luholo lua guvua musonyi!
Gishina giene, mbaabua mukatshi dia athu abuile gale.
Ene mbaakhakhuga tangua mbanguahana ndola,” Yehowa wazuela.
16 Yehowa wazuela egi:
“Maganenu ha phambu mutale.
Hulenu egi, njila jikulu jidi gui?
Njila yabonga idi gui? Gungima ilandulenu;
ngenyi mbamukhala mu guhuima.”
Uvi ene azuelele egi: “Mbatushigo muwenda mu njila yene.”
17 “Ngatombele ataledi anyi azuelele egi:
‘Tegelelenu muabonga matululu a phungi!’”
Uvi ene azuelele egi: “Tushigo getu mutegelela.”
18 Oo enue ifutshi, tegelelenu!
Oo enue athu, jiyenu
ndaga mbajiaabuila.
19 Oo mavu, tegelela!
Ngudi mubatela athu wawa malamba
mukunda nu matangi’awo abola,
handaga ene ategelelego mbimbi jiami,
atunyile nji mukhuala* wami.
20 Mudi mutangiza egi ngudi musuanguluga egi mungubatele uhafu ulaphe wa gu Sheba
nu mutshi wa vumba diabonga* wana katuga mu gifutshi gia gualeha ba?
Milambu yenu yagasue ya guwotshia ngushigo guyitshigina,
milambu yenu yagasue, ishigo gungusuanguluisa.
21 Gishina giene, Yehowa wazuela egi:
“Ngudi muhaga ikhakhuishilo gutuama diawo,
ene mbaakhakhuga holu dia ikhakhuishilo yene,
atata nu an’awo,
muthu n’a muko nu futa dienji.
Mukut’awo agasue mbaafua.”
22 Yehowa wazuela egi:
“Talenu! Athu adi mukatuga mu mavu a gu khanda ya gu nord ha guza,
gifutshi giakoma giakatuga mu mafundo a gualeha a ha mavu ha guza.
23 Ene mbaakuata uta wa manana mangololo nu mulumbu.
Adi nu khuta, mbaashigo muvuila nga muthu khenda.
Majui awo adi musha matululu gifua kianga,
adi muwenda holu dia tubalu.
Adi muza mu ndonga gifua muthu udi muza ha guguluisa, Oo mona mukhetu wa gu Siona.”
24 Tuavui lumene lua ndaga yene.
25 Muzogigo hanze ha guya mu dihia,
muwendjigo mu njila,
handaga mbalagaji udi nu phogo ya khusa;
mafundo agasue adi muhana woma.
26 Oo athu ami,
sudigenu sagi jia ngombo, mudibalumune mu fuphi.
Hagenu masaga, dilenu gifua muthu wafuisa mun’enji mumoshi ha mumoshi,
handaga muthu wana shiya athu mbawutujila mu gisagumuisa.
27 Ngagubuisa* mukatshi dia athu ami gifua muthu wana phelegetesa utadi,
muthu wana tala muabonga;
Aye udi naye gutala muabonga makalegelo awo.
28 Mala agasue adi mito yakola diago,
adi muya nu guwenda ha gumbila athu ako mambo.
Adi gifua kuivre nu utadi;
mukut’awo agasue adi nu makalegelo abola.
29 Muheho wawo washididile.
Phamba utadi wanema* udi muzoga mu tshuya tuawo.
Muthu udi mutshita mudimo wakola ha guwuphelegetesa, udi mutshita mudimo wa githuhu,
athu abola khenji akatudiwego mukatshi diawo.
30 Athu mbaatamega diago egi, utadi wa siliva wabishidiwe,
handaga Yehowa waatunyile.