Yelemiya
46 Eji ndaga Yehowa wawambelele profete Yelemiya mukunda nu ifutshi: 2 Mukunda nu Ejipitu, wazuelele mukunda nu masuta a Farao Neko fumu wa gu Ejipitu, munu wakhalele mu khulo ya muta wa Efrata nu wabingiwe gu Kalekemishi gudi fumu Nebukadenezale wa gu Babilona, mu givo gia nguana gia uhinyinyi wa Yoyakime mun’a Yoziase fumu wa gu Yuda egi:
3 “Londenu tshibu jienu jiazonda* nu jiakoma,
ndenu mulue ita.
4 Enue awendeshi a tubalu, jitshigenu tubalu mungine holu.
Dilondegenu, sudigenu ifulu ya ita.
Vigenu milumbu, sudigenu tuzawu tua ita.
5 ‘Mukunda natshi ngudi guamona mudigita nu woma?
Adi mulenga, masuta awo a ngolo ashiyiwa.
Alengi nu woma wagasue, masuta awo atalelego gungima.
Athu adi muvua woma gu khanda jiagasue,’ Yehowa wazuela.
6 ‘Athu abala phushi ajiyilego gulenga, nu ene masuta a ngolo ajiyilego guhuluga.
Ene akhakhugile, abuile
gu nord, mu khulo ya muta wa Efrata.’
7 Yowu nanyi udi mukanduga gifua muta wa Nile,
gifua mita idi nu meya adi musha matululu?
8 Ejipitu idi mukanduga gifua muta wa Nile,
gifua mita idi nu meya adi musha matululu,
idi muzuela egi: ‘Mbanguzala, mbangutshuiga mavu.
Mbangushiya dimbo nu athu adi muene.’
9 Enue tubalu, kandugenu!
Enue phusu-phusu, zulenu phushi gifua enya maluwi!
Masuta a ngolo abalege gutuama,
enya Kushi nu enya Pute anyi ana bata tshibu,
nu enya Ludime anyi ana kalegela* uta wa manana.
10 “Lusugu luene ludi lusugu lua Yehowa Nzambi wa masuta, Fumu Wabalega Gukoma, ludi lusugu mbaluvutudila muene mbalagaji jienji gubola. Phogo ya khusa mbayasasumuna nu mbayikuta, mbayinua mahatshi awo uu nu tangua mbayikuta, handaga Yehowa Nzambi wa masuta, Fumu Wabalega Gukoma, udi nu mulambu* mu gifutshi gia gu nord hehi nu muta wa Efrata.
11 Aye gandongo ga gu Ejipitu,
kanduga gu Gileade ha guzula maji a balesame.
Udi mulaba gaye guvudisa ihemba yavula,
uvi gushigo nu gihemba giajiya gugusaga.
12 Ifutshi yavua luholo wavuishiwa musonyi,
gudila guaye guavuiwa mu gifutshi giagasue.
Handaga suta dia ngolo diadikuma nu suta diko dia ngolo,
mukut’awo agasue abua hashi.”
13 Eyi mbimbi Yehowa wawambelele profete Yelemiya mukunda nu guza gua fumu Nebukadenezale* wa gu Babilona ha gubinga gifutshi gia Ejipitu:
14 Ta lumene luene gu Ejipitu, lumuange gu Migedole.
Lumuange nji gu Nofe* nu gu Taphanese.
Zuela egi, ‘maganenu mu mafundo enu, dilondegenu ha gulua ita,
handaga phogo ya khusa mbayishiya athu gu khanda jienu jiagasue.
15 Mukunda natshi mala enu a ngolo ashiyiwe?
Ene a maganelego mu mafundo awo,
handaga Yehowa waalutudile hashi.
16 Athu avula adi mukhakhuga, adi mubua,
adi gudiwambela egi:
“Zugenu! Tuvutugenu gudi akuaku’etu nu mu gifutshi gietu
handaga phogo ya khusa idi mushiya athu avula.”’
17 Azuelele guene egi,
‘Farao fumu wa gu Ejipitu udi genji mulaba gusha matululu a githuhu
wabembi genji okazio wabonga.’*
18 Fumu munu wana tamegewa egi Yehowa Nzambi wa masuta, wazuela egi: ‘Ngudi muzuela giamatshidia gifua luholo ngudi nu monyo,
muene* mbawuza gifua Tabola mukatshi dia milundu,
gifua mulundu wa Karmele hehi nu kianga.
19 Oo mona mukhetu wa gu Ejipitu,
londega kuba diaye ha guya mu uhiga.
Handaga dimbo dia Nofe* mbadibua gifua gima gidi muhana woma;
mbadimbiwa tshuya,* mbagusadigo nga nu muthu guene.
20 Ejipitu idi gifua mutumba wa ngombe ya mukaji wabonga diago,
uvi tudimu mbatukatuga gu khanda ya nord ha guyisuma.
21 Nu ene masuta afutshile muene mbongo ha gumuluila anyi adi gifua mitumba ya ngombe ya maji-maji,
abalumuga, alenga mukut’awo agasue.
Ene ajiyilego gumagana mu mafundo awo,
handaga lusugu lua lamba diawo luaza,
tangua diawo dia usopheshi diatagana.’
22 ‘Matululu enji adi gifua nyoga idi mulenga,
handaga adi gumuhata nu ngolo jiagasue nu iphangu,
gifua mala adi mukoka mitshi.’*
23 Yehowa wazuela egi, ‘ene mbaakoka gishitu gienji ngatshima gidi mumonega gifua muthu gajiyilego gungina mukatshi.
Handaga ene adi avula gubalega matulu a phasu, ajiyilego gutangewa.
24 Mona mukhetu wa gu Ejipitu mbawuvuishiwa musonyi.
Mbawuhanewa ha mago a athu a gu khanda ya gu nord.’
25 “Yehowa Nzambi wa masuta, Nzambi wa Isalele wazuela egi: ‘Henyaha ngudi mutala mulonga wa Amona nzambi wa gu No,* nu mulonga wa Farao, nu wa Ejipitu, nu wa nzambi jienji, nu wa mafumu enji, ayi, mulonga wa Farao nu athu agasue adi gumushila mutshima.’
26 “‘Mbanguahana ha mago a athu adi mukamba guashiya, ha mago a Nebukadenezale* fumu wa gu Babilona nu enya mudimo enji. Uvi gungima athu mbaajinga luko gu Ejipitu gifua ha thomo,’ Yehowa wazuela.
27 ‘Uvi aye muenya mudimo wami Yakoba, uvuigo woma,
Oo Isalele, udigitago.
Handaga mbanguguhuluisa ha fundo dia gualeha udi,
mbanguhuluisa nji ajigulu* aye mu gifutshi ayile mu uhiga.
Yakoba mbawuvutuga, mbawukhala mu guhuima, mbagukhadigo nga nu gima gia gumusagesa,
mbagukhadigo nji nga nu muthu wa gumuhana woma.
28 Muenya mudimo wami Yakoba, uvuigo woma handaga ngudi nu aye,’ Yehowa wazuela.
‘Mbangumanesela athu mu ifutshi yagasue ngamimuangele,
uvi enue mbangushigo gumimanesela.
Mbangumihana ndola mu luholo luatagana,
mbangushigo gumibemba ngenyi ndola ndo.’”