Yelemiya
47 Eyi ndaga Yehowa wawambelele profete Yelemiya mukunda nu gifutshi gia Filistiya, gutuama egi Farao ashiye dimbo dia Gaza. 2 Yehowa wazuela egi:
“Talenu! Meya akatuga gu khanda ya nord adi muza.
Mbaazala gifua muta udi mufuafuelela.
Mbaatshuiga gifutshi nu ima yagasue idi muene,
membo nu athu adi muene.
Mala mbaakaluluga,
athu agasue adi mu gifutshi mbaadila nji.
3 Tangua mbaavua ikiji-kiji ya maboto a tubalu,
nu matululu a phusu-phusu jia ita
nu a pine jienji,
atata mbaashigo mubalumuga ha gutala an’awo,
handaga mago awo mbaabua lege-lege.
4 Handaga lusugu ludi muza mbalushiya enya Filistiya agasue;
mbalushiya athu agasue ana kuatesa Tile nu Sidona.
Handaga Yehowa mbawushiya enya Filistiya,
anyi asalele mu hongo dia Kafetole.*
5 Gaza mbayizoga banji.*
Asekelone yahenesewe tedie.
Oo enue athu muasalele nu monyo mu baba,
uu nu tangua ditshi mbamulandula gudibatula jiphuta?
6 Ah! Aye phogo ya Yehowa!
Tangua ditshi mbawuhena giwa tedie?
Vutuga mu gindalo giaye.
Hena tedie, huluguga.
7 Yehowa wayihanyi mudimo wa gutshita,
na luholo lutshi yajiya giwa guhena tedie?
Muene wayitumi ha guluisa Asekelone nu mavu adi mu khulo ya kianga,
wayitumi guene ha gutshita mudimo.”