Yelemiya

44 Nzambi wawambelele Yelemiya ha guwambela enya Yuda agasue akhalele mujinga mu gifutshi gia Ejipitu, anyi akhalele gu Migedole, nu gu Taphanese, nu gu Nofe* nu mu mavu a gu Phatolose egi: 2 “Yehowa Nzambi wa masuta, Nzambi wa Isalele wazuela egi, ‘muamonele malamba agasue ngabatele gu Yelusalema nu mu membo agasue a gu Yuda, mangino asala makhulu, gushigo nga nu muthu guene. 3 Ngatshitshile ngenyi mukunda nu ndaga jiabola muakalegele ha gunguhana khabu, tangua muahanele milambu gudi nzambi jiko nu muajikombelele, nzambi jinyi enue nu akhakh’enu muakhalelego mujiya. 4 Ngakhalele gumitumila enya mudimo wami baprofete mbala jiavula* ha gumiwambela egi: “Ngabuba mutshitshigo ndaga eji jia usala, ngana gujizumba ndo nga hazonda.” 5 Uvi enue muategelelego, muabembelego makalegelo enu abola, mualanduile guhana milambu gudi nzambi jiko. 6 Gishina giene ngavidile membo a gu Yuda nu mabala-bala a gu Yelusalema khabu jiakola, abuile makhulu, abuile nji gifua mavu a luselenga, gifua luholo idi mangino.’

7 “Henyaha Yehowa Nzambi wa masuta, Nzambi wa Isalele wazuela egi: ‘Mukunda natshi mudi gudikambela malamba akola? Mudi mutshigina egi mala agasue nu akhetu nu ana nu ana itebe afue, gusadigo nga nu muthu gu Yuda ba? 8 Mukunda natshi mudi mutshita ndaga jidi gunguhana khabu, ha mudi muhana milambu gudi nzambi jiko mu gifutshi gia Ejipitu, fundo muayile ha gukhala? Mbamufua, mbamubua gifua gima gia gutewa mukumbu nu gia gusegulula mukatshi dia ifutshi yagasue ya ha mavu. 9 Muajimbila ndaga jiabola jiakalegele akhakh’enu, nu ndaga jiabola jiakalegele mafumu a gu Yuda, nu ndaga jiabola jiakalegele akaji’awo, nu ndaga jiabola muakalegele, nu ndaga jiabola jiakalegele akaji’enu mu gifutshi gia Yuda nu mu mabala-bala a gu Yelusalema? 10 Uu nu mangino khenji muadibulumuishilego,* khenji muavilego woma, nga gutumagela mikhuala ngamihanele nu akhakh’enu.’

11 “Gishina giene Yehowa Nzambi wa masuta, Nzambi wa Isalele wazuela egi: ‘Henyaha ngazudi desizio dia gumibatela malamba, ha gushiya athu agasue a gu Yuda. 12 Mbanguzula enya gu Yuda anyi asalele, anyi azudile desizio dia guya mukhala gu Ejipitu, mukut’awo agasue mbaafua gu Ejipitu. Mbaafua gu phogo ya khusa nu gu nzala, sendese gudi athu azonda uu nu gudi athu akoma. Ene mbaabua gifua gima gia gutewa mukumbu, gima gidi mukuatesa woma, athu mbaatanga majina awo tangua mbaakhala muta mikumbu nu mbaasegulula. 13 Mbangutumila athu adi mu gifutshi gia Ejipitu phogo ya khusa, nu nzala nu misongo ya gisambugila* ha guahana ndola, gifua luholo ngahanele Yelusalema ndola. 14 Athu a gu Yuda anyi asalele, anyi ayile mukhala mu gifutshi gia Ejipitu mbaashigo mulenga nga guhuluga ha guvutuga mu gifutshi gia Yuda. Mbaakhala nu nzala ya guvutuga ha gukhala guene, uvi mbaashigo muvutuga, phamba athu azonda mbaahuluga.’”

15 Mala agasue anyi akhalele mujiya egi akaji’awo ahanele milambu gudi nzambi jiko, nu akhetu agasue anyi akhalele ya gumagana hene, anyi adibungishile, abuile hunji diakoma, nu athu agasue akhalele mujinga gu Ejipitu gu Phatolose, awambelele Yelemiya egi: 16 “Tuatuna ndaga udi gutuwambela mu jina dia Yehowa. 17 Mbatutagenesa diago ndaga jiagasue tualayele ha guhana milambu gudi Fumu-mukhetu wa mu Dilu,* nu ha gumubunduila milambu ya matombe, gifua luholo esue nu akhakh’etu, nu mafumu etu, nu manene etu tuakalegele mu membo a gu Yuda nu mu mabala-bala a gu Yelusalema. Mu tangua diene, tuakhalele nu mapha avula a gudia, tuakhalele getu muabonga, tuakhalelego mumona nga lamba dimoshi. 18 Sendese tangua tuabembele guhana Fumu-mukhetu wa mu Dilu* milambu nu gumubunduila milambu ya matombe, tuatotesele ima yagasue, tuasendesele gufua gu phogo ya khusa nu gu nzala.”

19 Akhetu azuelele nji egi: “Idi alumi’etu atuhanele njila ha guhana Fumu-mukhetu wa Dilu* milambu nu ha gumubunduila milambu ya matombe, nu ha gumulondela ba gato adi mu gifuanesa gienji.”

20 Hene Yelemiya wawambelele athu agasue, mala nu akaji’awo nu athu agasue akhalele muzuela n’enji egi: 21 “Yehowa yowu genji muwunguluga milambu inyi enue nu akhakh’enu nu mafumu enu, nu manene enu nu athu a mu gifutshi muakhalele muhana mu membo a gu Yuda nu mu mabala-bala a gu Yelusalema, khenji gayibuitshilego mutshima. 22 Yehowa gakhalelego luko nu luholo lua gukanga mutshima mukunda nu ndaga jiabola nu jia usala muakalegele, gishina giene gifutshi gienu giabolesewe, giabuile gifua gima gidi mukuatesa woma nu gima gia gutewa mukumbu, giasalele gia githuhu nga muthu ndo, gifua luholo idi mangino. 23 Mudi mumona malamba mangino handaga muahanele milambu yene, nu muatshitshile gubola gu meso a Yehowa, tangua muatunyile gutumagela mbimbi ya Yehowa nu mikhuala yenji nu ndaga jiakhalele gumiwunguluisa muene.”

24 Yelemiya walanduile guwambela athu agasue nu akhetu agasue egi: “Enue athu agasue a gu Yuda adi mu gifutshi gia Ejipitu, tegelelenu mbimbi ya Yehowa. 25 Yehowa Nzambi wa masuta, Nzambi wa Isalele wazuela egi, ‘enue nu akaji’enu muazuelele ndaga mu makano enu, gungima muajitagenesele nu mago enu, handaga muazuelele egi: “Mbatutagenesa diago ndaga tualayele ha guhana milambu gudi Fumu-mukhetu wa mu Dilu* nu gumubunduila milambu ya matombe.” Enue akhetu, mbamutagenesa diago ndaga mualayele, ayi mbamujitagenesa.’

26 “Gishina giene, enue athu agasue a gu Yuda adi mujinga mu gifutshi gia Ejipitu, tegelelenu mbimbi ya Yehowa, Yehowa wazuela egi: ‘“Ngudi gudiloga mu jina diami diakoma, mbagukhadigo nga yala mumoshi wa gu Yuda mu mavu agasue a Ejipitu mbawudiloga mu jina diami egi, ‘ngudi guguwambela giamatshidia mu jina dia Fumu Wabalega Gukoma, Yehowa Nzambi wa monyo!’ 27 Henyaha ngudi guatala ha guabatela malamba uvi gubonga ndo. Mala agasue a gu Yuda adi mu gifutshi gia Ejipitu mbaafua gu phogo ya khusa nu gu nzala, uu nu tangua mukut’awo agasue mbaahua. 28 Phamba athu azonda mbaahuluga gu phogo ya khusa, nu mbaakatuga mu gifutshi gia Ejipitu ha guya mu gifutshi gia Yuda. Ngenyi athu agasue a gu Yuda asalele, anyi ajile mu gifutshi gia Ejipitu ha gukhala guene, mbaajiya gula mbimbi jia nanyi mbajitagenesewa, mbimbi jiami nga jiawo!”’”

29 “Yehowa wazuela egi: ‘Ngudi gumihana gijiyishilo gidi mumonesa egi, mbangumihana ndola ha fundo edi, hagula mbamujiye egi mbimbi ngazuelele mukunda nu malamba mbangumibatela, mbajitagenesewa diago. 30 Yehowa wazuela egi: “Ngudi muhana Farao Hofela fumu wa gu Ejipitu ha mago a mbalagaji wenji nu ha mago a athu adi mukamba gumushiya, gifua luholo ngahanele Sedesiase fumu wa gu Yuda ha mago a Nebukadenezale* fumu wa gu Babilona munu wakhalele mbalagaji wenji nu wakhalele mukamba gumushiya.”’”