Yelemiya
43 Tangua Yelemiya wamanesele guwambela athu agasue mbimbi jiagasue jiazuelele Yehowa Nzambi wawo, mbimbi yagasue Yehowa Nzambi wawo wamutumine ha guawambela, 2 Azariya mun’a Hoshaya nu Yohanana mun’a Kaleya nu mala agasue a lulendo awambelele Yelemiya egi: “Udi mumba mambo, Yehowa Nzambi wetu gagutuminego ha gutuwambela egi, ‘muyigo gu Ejipitu ha gukhala guene.’ 3 Uvi idi Baruke mun’a Neliya udi gugutuma ha gutuwambela ndaga eji, hagula tuhanewe gudi enya Kaldea ha gushiyiwa nga ha gubatewa mu uhiga gu Babilona.”
4 Hene Yohanana mun’a Kaleya nu mafumu agasue a masuta nu athu agasue atumagelego Yehowa, atunyile gusala mu gifutshi gia Yuda. 5 Yohanana mun’a Kaleya nu mafumu agasue a masuta azudile enya gu Yuda agasue asalele, anyi akatugile mu ifutshi yagasue amuangewe, ha guvutuga mu mavu a Yuda. 6 Azudile mala nu akhetu, nu ana, nu ana a fumu a akhetu, nu athu agasue anyi Nebuzaladana fumu wa masuta akhalele mubamba fumu wabembele ha mago a Gedaliya mun’a Ahikama, mun’a Shafane; azudile nji profete Yelemiya nu Baruke mun’a Neliya. 7 Ene atumagelego mbimbi ya Yehowa, ayile mu gifutshi gia Ejipitu, ayile uu nu gu Taphanese.
8 Gungima Yehowa wawambelele Yelemiya egi: 9 “Zula maseso akoma ha mago, asuege mu pavema ya jibrike idi ha mufulo wa inzo ya Farao gu Taphanese, utshuige mortie* holu, itshite ha meso a mala a enya Yuda. 10 Gungima awambele egi, ‘Yehowa Nzambi wa masuta, Nzambi wa Isalele wazuela egi: “Ngudi mutuma muenya mudimo wami, Nebukadenezale* fumu wa gu Babilona, mbanguhaga nguasa yenji ya ufumu holu dia maseso wawa ngasuega, muene mbawusununa tenta yenji holu diawo. 11 Muene mbawuza muluisa gifutshi gia Ejipitu. Muthu wagasue udi naye gufua gu misongo, mbawufua gu misongo, muthu wagasue udi naye gubatewa mu uhiga, mbawuya mu uhiga, muthu wagasue udi naye gufua gu phogo ya khusa, mbawufua gu phogo ya khusa. 12 Mbangukonda jinzo jia nzambi* jia gu Ejipitu tshuya, mbangujikonda, mbangujibata mu uhiga. Muene mbawudilanga gifutshi gia Ejipitu gifua luholo mubambi wa imeme wana gudilanga mulele, muene mbawukatuga guene mu guhuima.* 13 Mbawusasumuna makunji* a gu Bete-Shemeshe* adi gu Ejipitu, mbawukonda jinzo jia nzambi jia gu Ejipitu.”’”