Yelemiya
37 Fumu Sedesiase mun’a Yoziase wasendesele guhinyina ha fundo dia Koniya* mun’a Yoyakime, handaga fumu Nebukadenezale* wa gu Babilona wamuhagele fumu mu gifutshi gia Yuda. 2 Uvi muene nu enya mudimo enji nu athu a mu gifutshi ategelelego mbimbi jiazuelele Yehowa mu njila ya profete Yelemiya.
3 Gungima fumu Sedesiase watumile Yehukale mun’a Shelemiya nu Sefanya mun’a nganga-nzambi Maseya gudi profete Yelemiya ha gumuwambela egi: “Tuabuba, kombelela Yehowa Nzambi wetu mukunda nu esue.” 4 Mu tangua diene, Yelemiya wakhalele yowu genji muwenda mukatshi dia athu, handaga wakhalele khenji gambiwa galego mu bologo. 5 Tangua enya Kaldea anyi akhalele mujieta dimbo dia Yelusalema avuile egi masuta a Farao akatuga gu Ejipitu ha guza, ene akatugile gu Yelusalema ayile gawo. 6 Gungima Yehowa wawambelele profete Yelemiya egi: 7 “Yehowa Nzambi wa Isalele wazuela egi, ‘udi naye guwambela fumu wa gu Yuda munu wagutumi ha guza gungububila egi: “Tala! Masuta a Farao anyi adi muza ha gugukuatesa mbaavutuga mu gifutshi giawo gu Ejipitu. 8 Enya Kaldea mbaavutuga ha guza muluisa dimbo edi, mbaaditambula, mbaadikonda tshuya.” 9 Yehowa wazuela egi, “mudihuigigo egi, ‘enya Kaldea mbaabemba gutuluisa ha guya gawo,’ handaga ene mbaashigo muya. 10 Ikhale muashiya genu masuta agasue a enya Kaldea adi gumiluisa, ene asala phamba nu mala adi agunamana, ene mbaazoga mu tenta jiawo ha guza mukonda dimbo edi tshuya.”’”
11 Tangua masuta a enya Kaldea abembele guluisa dimbo dia Yelusalema ha guya mukunda nu masuta a Farao, 12 Yelemiya watshiginyile gukatuga gu Yelusalema ha guya mu mavu a Benjame ha guzula khapho dienji mukatshi dia akuaku’enji. 13 Uvi tangua diahetele muene ha Mufulo wa Benjame, Iliya mun’a Shelemiya mun’a Hananiya, fumu wa abambi a mifulo, wakuatele profete Yelemiya, wamuwambelele egi: “Aye udi diago mulenga dimbo ha guya gudi enya Kaldea!” 14 Uvi Yelemiya wazuelele egi: “Ndo, ishigo ngenyi! Ngushigo mulenga ha guya gudi enya Kaldea.” Uvi Iliya gamuvidilego, wakuatele Yelemiya, wayile n’enji gudi manene. 15 Manene avuidile Yelemiya khabu jiakola, amubetele, gungima amunginyishile* mu inzo ya sekretere Yonatana, inyi yabuishiwe bologo. 16 Ambile Yelemiya mu bologo, mu sugu imoshi yakhalele mukatshi dia sugu jiakhalele goshi’a mavu, wasalele guene masugu avula.
17 Gungima fumu Sedesiase watumile athu ha guya muzula Yelemiya, wamuhudile mihu mu gisuegi mu inzo* yenji. Wamuhudile egi, “Yehowa waguwambela nga ndaga imoshi ba?” Yelemiya wamuvutudile egi: “Ayi!” Gungima wazuelele egi, “aye mbawuhanewa ha mago a fumu wa gu Babilona!”
18 Yelemiya wahudile nji fumu Sedesiase egi: “Gubola gutshi ngagutshitshile nu enya mudimo aye nu athu awa hagula mungumbe mu bologo? 19 Henyaha baprofete enu akhalele gumiwambela profesi egi, ‘fumu wa gu Babilona mbagashigo muza ha gumiluisa nu ha guluisa gifutshi gigi adi gui? 20 Oo fumu wami, ngabuba, nguvuile khenda. Ngabuba unguvutulago mu inzo ya sekretere Yonatana, gula ndo mbangufuila guene.” 21 Hene fumu Sedesiase wawambelele athu ha gumba Yelemiya mu bologo mu Gibanzala gia Mubambi. Lusugu nu lusugu akhalele gumuhana dipha diakhalele mukatuga mu lubala-bala lua athu ana londa mapha uu nu tangua mapha ahuile mu dimbo. Yelemiya wasalele mu Gibanzala gia Mubambi.