Yelemiya

36 Mu givo gia nguana gia uhinyinyi wa Yoyakime mun’a Yoziase fumu wa gu Yuda, Yehowa wawambelele Yelemiya egi: 2 “Zula rulo* usonege ndaga jiagasue ngaguwambelele mukunda nu enya Isalele nu enya Yuda nu mukunda nu ifutshi yagasue, sendese tangua ngatele naye maga mu masugu a Yoziase uu nu mangino. 3 Mbala iko, tangua enya mu inzo ya Yuda mbaavua malamba ngudi mutshigina guabatela, mbaasombegesa makalegelo awo abola, hagula nguatotesele gubola guawo nu gujimbila guawo.”

4 Yelemiya watamegele Baruke mun’a Neliya, wamuwambelele ndaga jiagasue jiamuwambelele Yehowa, Baruke wasonegele ndaga jiene mu rulo.* 5 Yelemiya wawambelele Baruke egi: “Ngatunyishiwe ha gungina mu inzo ya Yehowa. 6 Uvi aye wajiya gungina muene ha gutanga mu dijui diakola mbimbi jia Yehowa jidi mu rulo yago wasonega mbimbi ngaguwambela. Jitange gutuama dia athu adi gu inzo ya Yehowa mu lusugu athu adi mutuna gudia ha gukombelela; ngenyi mbawutanga mbimbi jiene gutuama dia athu agasue a gu Yuda anyi mbaakatuga mu membo awo ha guza guene. 7 Yajiya gukhala egi Yehowa mbawuvua gububa guawo ha guavila khenda, muthu nu muthu mbawubemba gutshita ndaga jiabola handaga Yehowa wavila athu awa khabu jiakola diago.”

8 Hene Baruke mun’a Neliya watshitshile ndaga gifua luholo profete Yelemiya wamuwambelele ha gutshita; watangele mu dijui diakola mbimbi jia Yehowa jiakhalele jia gusonega mu rulo gu inzo ya Yehowa.

9 Mu mbeji ya 9 ya givo gia thano gia uhinyinyi wa Yoyakime mun’a Yoziase fumu wa gu Yuda, athu agasue a gu Yelusalema nu athu akatugile mu membo a gu Yuda, ajile gu Yelusalema; azuelele egi athu ashigo naye gudia mu lusugu luene ha gukombelela Yehowa. 10 Gungima Baruke watangele mu dijui diakola mbimbi jia Yelemiya jiakhalele mu rulo* gu inzo ya Yehowa. Wakhalele gu sugu* ya Gemaliya mun’a sekretere Shafane mu gibanzala gia gosa ha manginyino a mufulo uhe-uhe wa inzo ya Yehowa; athu agasue avuile mbimbi jiene.

11 Tangua Mikaya mun’a Gemaliya mun’a Shafane wavuile mbimbi jiagasue jia Yehowa jiakhalele mu rulo,* 12 wabulumugile gu inzo ya fumu,* gu sugu ya sekretere. Manene* awa agasue akhalele ya gukhala guene: Sekretere Elishama, nu Delaya mun’a Shemaya, nu Elenatana mun’a Akebole, nu Gemaliya mun’a Shafane, nu Sedesiase mun’a Hananiya, nu manene ako agasue. 13 Mikaya waawambelele ndaga jiagasue jiavile muene tangua Baruke watangele rulo* gutuama dia athu.

14 Gungima manene agasue atumile Yehudi mun’a Netania, mun’a Shelemiya, mun’a Kushi gudi Baruke, ha gumuwambela egi: “Iza nu rulo inyi watangi gutuama dia athu.” Baruke mun’a Neliya wazudile rulo yene ha mago, wayile nayo gudi ene. 15 Amuwambelele egi: “Tuabuba, khala hashi, ututangele rulo.” Hene Baruke watangele rulo yene.

16 Tangua avile mbimbi jiene jiagasue, aditalele, woma waakuatele, awambelele Baruke egi: “Tudi naye guwambela fumu mbimbi eji jiagasue.” 17 Ahudile Baruke egi: “Tuabuba, tuwambele gale, luholo lutshi wasonega mbimbi eji jiagasue? Yelemiya waguwambela ha gujisonega ba?” 18 Baruke waavutudile egi: “Muene wanguwambelele mbimbi eji jiagasue, hene ngajisonegele mu rulo* eyi nu meya a gusonegela mukanda.” 19 Manene awambelele Baruke egi: “Aye nu Yelemiya ndenu mudisuege, tshitenu yagasue hagula nga muthu gajiyigo fundo mudi.”

20 Gungima ayile gudi fumu mu gibanzala, ahagele rulo gu sugu ya sekretere Elishama, awambelele fumu ndaga jiagasue jiavile ene.

21 Fumu watumile Yehudi ha guya muzula rulo yene, wayile guyizula gu sugu ya sekretere Elishama. Yehudi wasendesele guyitanga gutuama dia fumu nu dia manene agasue akhalele ya gumagana hehi nu fumu. 22 Fumu wakhalele ya gukhala mu inzo yakhalele muene mukhala mu mbeji ya 9,* tshuya tuakhalele mulemuga mu mbambula yakhalele gutuama dienji. 23 Tangua Yehudi wakhalele mumanesela gutanga gitshinyi gia thathu nga gia nguana gia rulo, fumu wakhalele mukoka gitshinyi giene nu mun’a phogo wa sekretere, wakhalele gugimba ha tshuya tuakhalele mulemuga mu mbambula, uu nu tangua diamanesele muene gukonda rulo yagasue ha tshuya tuakhalele mu mbambula. 24 Gushigo nga nu muthu mumoshi wavile woma mukunda nu mbimbi jiagasue jia rulo yene nga watawudile milele yenji, ikhale fumu nga enya mudimo wenji. 25 Elenatana nu Delaya nu Gemaliya abubidile fumu hagula gakondigo rulo, uvi muene gaavidilego. 26 Fumu wawambelele Yelamele mun’a fumu, nu Selaya mun’a Azeliyele, nu Shelemiya mun’a Abedele ha guya mukuata sekretere Baruke nu profete Yelemiya, uvi Yehowa walanduile guasuega.

27 Tangua fumu wakondele rulo yakhalele nu mbimbi Yelemiya wawambelele Baruke ha gusonega, Yehowa wawambelele luko Yelemiya egi: 28 “Zula rulo iko usonege mbimbi jiagasue jiakhalele mu rulo ya thomo inyi fumu Yoyakime wa gu Yuda wakondele ha tshuya. 29 Nda uwambele Yoyakime fumu wa gu Yuda egi, ‘Yehowa wazuela egi: “Aye wakondji rulo eyi, wazuedi egi, ‘mukunda natshi wasonega egi: “Fumu wa gu Babilona mbawuza, mbawushiya gifutshi gigi, mbagusadigo nga nu muthu nga nu shitu yabala.”?’ 30 Gishina giene Yehowa wazuela mukunda nu Yoyakime fumu wa gu Yuda egi, ‘nga mujigulu wenji mumoshi mbagashigo muhinyina ha nguasa ya ufumu ya Davidi; kimbi gienji mbagikhala ha muanya mu lusugu uvi mu phipha mbagikhala mu guhuma. 31 Mbangumusophesa nu ajigulu enji agasue nu enya mudimo enji mukunda nu gubola guawo. Mbanguabatela nu athu agasue a gu Yelusalema nu mala a gu Yuda malamba agasue ngazuelele egi mbaabuila, uvi ene ategelelego.’”’”

32 Gungima Yelemiya wazudile rulo iko, wayihanele sekretere Baruke mun’a Neliya, muene wasonegele mbimbi jiagasue jiakhalele gumuwambela Yelemiya jinyi jiakhalele thomo mu rulo* inyi Yoyakime fumu wa gu Yuda wakondele ha tshuya. Alezelele nji mbimbi jiko jiavula jia luholo lumoshi.