Yelemiya
38 Shefatia mun’a Matana nu Gedaliya mun’a Pashule nu Yukale mun’a Shelemiya nu Pashule mun’a Malakiya avuile ndaga Yelemiya wakhalele muwambela athu agasue egi: 2 “Yehowa wazuela egi, ‘muthu wagasue udi musala mu dimbo edi, mbawufua gu phogo ya khusa, nu gu nzala, nu gu misongo ya gisambugila.* Uvi muthu udi gudihana* ha mago a enya Kaldea, mbawuhuluisa monyo wenji, mbagashigo mushiyiwa.’ 3 Yehowa wazuela egi, ‘dimbo mbadihanewa diago ha mago a masuta a fumu wa gu Babilona, muene mbawuditambula.’”
4 Manene awambelele fumu egi: “Muthu yowu udi naye gushiyiwa, handaga udi mulebesa masuta asala mu dimbo edi muila nu athu agasue, hadi muene guawambela mbimbi jia luholo elu. Muthu yowu gashigo mukamba gubonga gua athu awa, uvi udi guakambela malamba.” 5 Fumu Sedesiase waavutudile egi: “Talenu! Udi ha mago enu, ame ngajiyilego gumikanga njila.”
6 Hene azudile Yelemiya amubishidile mu wina dia meya dia Malakiya mun’a fumu, dinyi diakhalele mu Gibanzala gia Mubambi. Amubulumuishile mu wina diene nu shinga. Mu tangua diene, wina diene diakhalelego nu meya, diakhalele phamba nu ithotho, hene Yelemiya wasendesele gushiwuga mu ithotho.
7 Ebede-Meleke muenya gu Etiopi munu wakhalele mutshita mudimo* mu inzo ya fumu* wavuile egi Yelemiya wambiwa mu wina dia meya. Tangua fumu wakhalele ya gukhala ha Mufulo wa Benjame, 8 Ebede-Meleke wakatugile gu inzo ya fumu,* wayile muwambela fumu egi: 9 “Oo fumu wami, ndaga athu awa atshita gudi profete Yelemiya idi yabola diago! Amubishila mu wina dia meya. Nzala mbayimushiya guene, handaga mapha ashigo luko mu dimbo.”
10 Gungima fumu wawambelele Ebede-Meleke muenya gu Etiopi egi: “Zula mala 30 haha, muye muzole profete Yelemiya mu wina dia meya hagula gafuigo.” 11 Hene Ebede-Meleke wazudile mala ene, wayile nawo gu inzo ya fumu ha fundo didi goshi’a fundo ana bamba umonyi, azudile masanji a milele nu itshinyi ya milele ya gufua, ayibulumuishile gu shinga gudi Yelemiya mu wina dia meya. 12 Gungima Ebede-Meleke muenya gu Etiopi wawambelele Yelemiya egi: “Ngabuba haga masanji a milele nu itshinyi ya milele mu khaya, gungima uhage shinga.” Yelemiya watshitshile ngenyi. 13 Ananele Yelemiya nu shinga mu wina dia meya, amuzolele gonze. Yelemiya wasalele mu Gibanzala gia Mubambi.
14 Fumu Sedesiase watumile athu ha guza nu profete Yelemiya ha mufulo wa thathu, unu udi gu inzo ya Yehowa, gungima fumu wawambelele Yelemiya egi: “Ngudi nu ndaga ya guguhula. Ungusuegelago nga gima.” 15 Yelemiya wamuwambelele egi: “Gula ngaguwambela uza gungushiya. Gula ngaguhana longo ushigo gunguvuila.” 16 Hene fumu Sedesiase wadilogele mu gisuegi gudi Yelemiya, wazuelele egi: “Ngudi guguwambela giamatshidia mu jina dia Yehowa Nzambi wa monyo, munu watuhanele monyo egi, mbangushigo gugushiya, mbangushigo nji guguhana ha mago a athu adi mukamba gugushiya.”
17 Gungima Yelemiya wawambelele Sedesiase egi: “Yehowa Nzambi wa masuta, Nzambi wa Isalele wazuela egi, ‘gula wadihana ha mago a manene a fumu wa gu Babilona, mbawuhuluisa monyo waye, dimbo edi mbadishigo mukondewa tshuya, aye nu enya inzo yaye mbamuhuluga. 18 Uvi gula wadihanelego ha mago* a manene a fumu wa gu Babilona, dimbo edi mbadihanewa gudi enya Kaldea, mbadikondewa tshuya, aye mbawushigo muhuluga ha mago awo.’”
19 Fumu Sedesiase wawambelele Yelemiya egi: “Ngudi muvua woma mukunda nu enya Yuda anyi alengele ha guya gudi enya Kaldea, handaga gula ngadihana ha mago awo, ajiya gungukalegela ndaga nu khuta yagasue.” 20 Uvi Yelemiya wamuwambelele egi: “Mbawushigo muhanewa ha mago awo. Ngabuba, tumagela mbimbi eyi ya Yehowa ngudi guguwambela, ngenyi ndaga mbajiyila muabonga mukunda nu aye, mbawusala nu monyo. 21 Uvi gula watuna gudihana ha mago awo, Yehowa wanguwambela egi: 22 Tala! Akhetu agasue asalele mu inzo ya fumu* wa gu Yuda abatewa gudi manene a fumu wa gu Babilona adi muzuela egi,
‘mala wakhalele mushila mutshima* a guhuiga, agubinga.
Agunginyisa malu mu ithotho.
Uvi henyaha agubemba, aya gawo.’
23 Akaji’aye agasue nu an’aye a mala adi mubatewa gudi enya Kaldea, mbawushigo muhuluga ha mago awo, uvi fumu wa gu Babilona mbawugukuata, dimbo edi mbadikondewa tshuya mukunda nu aye.”
24 Uvi Sedesiase wawambelele Yelemiya egi: “Uwambelago nga muthu ndaga eji, gula ndo umufua. 25 Gula manene ajiya egi ngatshi naye maga, aza guguwambela egi, ‘tuabuba, tuwambele ndaga wawambela fumu. Utusuegelago nga gima, tushigo gugushiya. Ndaga itshi yaguwambela fumu?’ 26 Udi naye guahana mvutu egi, ‘ngakhala mutoga fumu hagula ganguvutulago mu inzo ya Yonatana ha gufua guene.’”
27 Gungima, manene agasue ajile gudi Yelemiya ha gumuhula mihu. Muene waawambelele ndaga jiagasue jia muwambelele fumu ha guawambela. Ene amuwambelelego nga gima, handaga nga muthu gavilego maga atele Yelemiya nu fumu. 28 Yelemiya wasalele mu Gibanzala gia Mubambi uu nu mu lusugu dimbo dia Yelusalema diatambudiwe. Wakhalele guene tangua dimbo dia Yelusalema diatambudiwe.