Yelemiya
22 Yehowa wazuela egi: “Bulumuga gu inzo ya fumu wa gu Yuda, muwambele mbimbi eji. 2 Udi naye guzuela egi: ‘Tegelela mbimbi ya Yehowa, Oo fumu wa gu Yuda, aye wana khala ha nguasa ya ufumu ya Davidi, nu enya mudimo aye nu athu aye, anyi ana nginyila gu mifulo eyi. 3 Yehowa wazuela egi: “Kalagalenu ndaga mu luholo luabonga nu giamatshidia. Huluisenu muthu udi mukuyiwa gudi nzangi. Musagesago nga ngenji mumoshi, mukalegelago mun’a shiye* nga mukhetu wa gafunda gubola. Mushiyigo muthu gatshitshilego gubola ha fundo edi. 4 Gula muanemesa diago mbimbi eyi, ngenyi mafumu ana hinyina ha nguasa ya ufumu ya Davidi nu enya mudimo awo nu athu awo mbaangina ha mifulo ya inzo eyi, holu dia phusu-phusu nu dia tubalu.”’
5 “‘Yehowa wazuela egi, ‘ngudi gudiloga egi, gula muatumagelego mbimbi eji, inzo eyi mbayibolesewa.’
6 “Yehowa wazuela mukunda nu inzo ya fumu wa gu Yuda egi,
‘aye udi gifua Gileade mukunda nu ame,
gifua songi ya mulundu wa Libane.
Uvi mbangugubuisa gifua mavu a luselenga;
athu mbaakhadigo nga mu dimbo dimoshi mukatshi dia membo aye.
7 Mbangutomba* athu ana shiya ha guza guguluisa,
muthu wagasue mbawuza nu giluilo gienji.
Mbaakoka mitshi yaye ya sedre yabalega gubonga,
mbaayimba ha tshuya.
8 “‘Enya ifutshi yavula mbaabalega hehi nu dimbo edi, mbaadihula mukatshi diawo egi: “Mukunda natshi Yehowa watshita dimbo edi diakoma ngegi?” 9 Ene mbaavutula egi: “Idi handaga ene ashiyile gikotelo gia Yehowa Nzambi wawo, afugamele nzambi jiko nu ajikombelele.”’
10 Mudidigo muthu wa gufua,
mumuvuilago gikenene.
Uvi, dilenu mangololo mukunda nu muthu udi muya,
handaga muene mbagashigo muvutuga luko ha gumona gifutshi giavualewe muene.
11 Yehowa wazuela mukunda nu Shaluma* mun’a Yoziase fumu wa gu Yuda, udi muhinyina ha fundo dia sh’enji Yoziase, yago wakatuga ha fundo edi egi: ‘Mbagashigo muvutuga luko haha. 12 Handaga muene mbawufua ha fundo amubatshi mu uhiga, mbagashigo mumona luko gifutshi egi.’
13 Lamba gudi muthu udi mutunga inzo yenji uvi muene nu gutshita ndaga jiabola,
udi mutunga sugu jia gosa uvi gashigo mutshita ndaga jiatagana,
muene udi mutshitshisa muthu n’a muko mudimo wa githuhu,
gashigo gumufuta.
14 Muene udi muzuela egi, ‘mbangutunga inzo yami yakoma
nu sugu jiakoma jia gosa.
Mbanguyimba fenetre
mbangutshuiga mabaya a sedre gu ibayi yenji, mbanguyikunga nji mukubu wabenga.
15 Udi mutangiza egi aye mbawulandula guhinyina handaga udi mukalegela mabaya a sedre avula gubalega athu ako ba?
Sh’aye wakhalele nji mudia nu gunua,
uvi wakhalele mutshita ndaga jiabonga nu jiatagana,
hene ndaga jiakhalele muyila muabonga mukunda nu muene.
16 Wakhalele muzuelela athu adi aguleba nu phutu,
gishina giene ndaga jiakhalele muyila muabonga.
‘Gutshita ngenyi guene guana monesa egi muthu udi gungujiya.’ Yehowa wazuela.
17 ‘Uvi meso aye nu matangi’aye ana khala phamba ha guheta ima mu luholo luabola,
ha gushiya muthu gatshitshilego gubola,
nu ha gukuya nu gutambula ima.
18 “Gishina giene Yehowa wazuela mukunda nu Yoyakime mun’a Yoziase fumu wa gu Yuda egi,
‘Athu mbaamudidigo egi:
“Mamaa, mun’etu wa yala! Mamaa, mun’etu wa mukhetu!”
Mbaamudidigo nji egi:
“Mamaa, fumu wetu! Mamaa, lutumbu luenji luaya!”
19 Muene mbawufundjiwa gifua luholo ana funda phunda,
mbaaya nu gumunana, mbaamubishila
hanze ya mifulo ya Yelusalema.’
20 Kandugenu gu Libane mukaluguge;
kalugugenu mangololo gu Bashana,
dilenu gu Abalima,
handaga athu agasue akhalele gumizumba asasumuiwa.
21 Ngagutemesele tangua wakhalele gudivua mu ubambi.
Uvi aye wazuelele egi, ‘ngushigo muvua.’
Yene ndaga wana tshita sendese mu ulenge waye,
handaga watunyile gutumagela mbimbi yami.
22 Muhehe wakola mbawuhehumuna abambi aye agasue a imeme,
athu ana guguzumba mbaabatewa mu uhiga.
Ngenyi mbawuvua musonyi, mbawuvuishiwa musonyi mukunda nu malamba aye agasue.
23 Oo aye wana khala gu Libane,
aye wahagele kianzu mukatshi dia mitshi ya sedre,
mbawudila tangua lamba diakola mbadigujila,
lamba diene mbadikhala gifua misongo ya mukhetu udi muvuala!”
24 Yehowa wazuela egi: “‘Ngudi guguwambela giamatshidia gifua luholo ngudi nu monyo egi, ngatshima aye Koniya* mun’a Yoyakime fumu wa gu Yuda, wakhalele gifua luphete lua guhagela kashe gu koko diami dia madia, “mbangugukatula! 25 ‘Mbanguguhana ha mago a athu adi mukamba gugushiya, ayi ha mago a athu wana vuila woma, ha mago a fumu Nebukadenezale* wa gu Babilona nu ha mago a enya Kaldea. 26 Mbangumibishila aye nu gin’aye waguvualele mu gifutshi giko, ginyi muavualewego guene. Guene mbamufuila.’ 27 Mbamushigo muvutuga luko nga hazonda mu gifutshi mudi mutshigina muavula.”
28 Koniya wabua gifua nzungu ya wuma ya gubudiga inyi adi musegulula ba?
Wabua gifua longa dinyi nga muthu gashigo mutshigina ba?
Mukunda natshi muene nu ajigulu enji abishidiwe,
nu atumiwe mu gifutshi ashigo mujiya?
29 Oo aye mavu,* mavu, mavu, tegelela mbimbi ya Yehowa.
30 Yehowa wazuela egi:
‘Sonegenu muthu yowu gifua muthu gashigo nu ana,
gifua muthu munu mbagashigo mubinga nga gu gima gimoshi mu monyo wenji wagasue.*
Handaga gushigo nga nu mujigulu wenji mumoshi mbawubinga
ha gukhala ha nguasa ya ufumu ya Davidi ha guhinyina luko gu Yuda.’”