Yelemiya
21 Mbimbi ya Yehowa yajile gudi Yelemiya tangua fumu Sedesiase watumile Pashule mun’a Malakiya nu Sefanya mun’a Maseya ha gumuwambela egi: 2 “Ngabuba, hula Yehowa mukunda nu esue handaga fumu Nebukadenezale* wa gu Babilona udi gutuluisa. Matangua ako Yehowa mbawukalagala ndaga jienji jia gushimana mukunda nu esue hagula abembe gutuluisa.”
3 Yelemiya waawambelele egi: “Mudi naye guwambela Sedesiase egi, 4 ‘Yehowa Nzambi wa Isalele wazuela egi: “Henyaha ngudi gumibalumuina iluilo ya ita idi ha mago enu, inyi mudi mukalegela ha guluisa fumu wa gu Babilona nu enya Kaldea, adi mujieta ibayi yenu hanze. Mbanguabungisa hakatshi n’a katshi dia dimbo edi. 5 Ame hakhami mbangumiluisa, mbangumisunuina koko diami dia ngolo nu khabu jiakola nu gubundumuga guavula diago. 6 Mbangutumila athu ana khala mu dimbo edi malamba, nu athu nu shitu. Ene mbaafua gu misongo yakola ya gisambugila.”’
7 Yehowa wazuela egi: “‘“Mbanguhana Sedesiase fumu wa gu Yuda nu enya mudimo enji nu athu a mu dimbo edi—anyi mbaahuluga gu misongo ya gisambugila nu gu phogo ya khusa nu gu nzala—ha mago a Nebukadenezale* fumu wa gu Babilona, ha mago a mbalagaji jiawo nu ha mago a athu adi mukamba guashiya. Muene mbawashiya nu phogo ya khusa. Mbagashigo muvua gikenene mukunda nu ene, nga gudisha ha fundo diawo nga guavuila khenda.”’
8 Udi naye nji guwambela athu awa egi, ‘Yehowa wazuela egi: “Ngudi muhaga gutuama dienu njila ya monyo nu njila ya gufua. 9 Athu anyi mbaasala mu dimbo mbaafua gu phogo ya khusa, gu nzala nu gu misongo ya gisambugila. Uvi muthu wagasue mbawuzoga hanze ha gudihana gudi enya Kaldea adi gumijieta, mbawusala nu monyo, muene mbawuhuluisa monyo wenji.”’
10 Yehowa wazuela egi: “‘“Ngudi muta dimbo edi dikunda ha gudibatela malamba uvi gubonga ndo. Mbangudihana ha mago a fumu wa gu Babilona, muene mbawudikonda tshuya.”
11 “‘Enue enya mu inzo ya fumu wa gu Yuda: Tegelelenu mbimbi ya Yehowa. 12 Oo enue enya inzo ya Davidi, Yehowa wazuela egi:
“Sophesenu ndaga mu luholo luabonga gimenegena giagasue,
huluisenu muthu udi mukuyiwa gudi nzangi,
hagula khabu jiami jilemigo gifua tshuya,
nu jilemugago gifua tshuya tunu nga muthu gajiyilego gujima,
mukunda nu makalegelo enu abola.”’
13 ‘Henyaha mbanguguhana ndola, aye muthu wana khala mu baba,
aye seso dia fundo dishigo nu mulundu.’ Yehowa wazuela.
‘Uvi mukunda nu enue athu adi muzuela egi: “Nanyi mbawuza ha gutuluisa?
Nanyi mbawungina gu ngolo ha fundo tuana khala?”
14 Mbangumihana ndola idi yatagana
mukunda nu makalegelo enu,’ Yehowa wazuela.
‘Mbangumba gishitu gienu tshuya,
tuene mbatukonda ima yagasue idi mu khulo yenu.’”