Yelemiya
23 Yehowa wazuela egi: “Lamba gudi abambi a imeme anyi adi mushiya nu adi mumuanga imeme yami ngana bamba.”
2 Yehowa Nzambi wa Isalele wazuela mukunda nu abambi a imeme adi mubamba athu enji egi: “Muamuangele imeme yami; muayiwunganesele, muayibambelego muabonga.”
“Gishina giene ame nji mbangushigo gumivuila khenda mukunda nu makalegelo enu abola,” Yehowa wazuela.
3 “Gungima mbangubungisa imeme yami yasadi mu ifutshi yagasue ngayimuangele, mbanguyivutula ha fundo diayo dia gudila muangu, mbayivuala ana nu mbayidivudisa. 4 Mbanguyitombela abambi a imeme anyi mbaayibamba diago muabonga. Mbayishigo luko muvua woma nga gudigita, gushigo nga nu gimeme gimoshi mbagitota.” Yehowa wazuela.
5 Yehowa wazuela egi: “Tala, mu masugu adi muza mbangutomba mujigulu wa Davidi ha gukhala fumu wabonga. Muene mbawuhinyina nu gutema, mbawusophesa ndaga mu luholo luabonga mu gifutshi. 6 Mu masugu enji Yuda mbayihuluga, Isalele nji mbayikhala mu guhuima. Muene mbawutamegewa egi: Yehowa udi Gubonga Guetu.”
7 Yehowa wazuela luko egi: “Mu masugu adi muza, ene mbaazuedigo luko egi: ‘Ngudi guguwambela giamatshidia mu jina dia Yehowa Nzambi wa monyo, munu wazolele enya Isalele gu Ejipitu!’ 8 Uvi mbaazuela egi: ‘Ngudi guguwambela giamatshidia mu jina dia Yehowa Nzambi wa monyo, munu wakatudile ajigulu a Isalele mu mavu a gu khanda ya gu nord, nu mu mavu agasue a amuangele muene ha guavutula,’ ene mbaakhala mu gifutshi giawo.”
9 Mu ndaga yatadila baprofete:
Mutshima wami wamuangana.
Ifuwa yami yagasue idi mudigita.
Tangua ngudi muvua ndaga jiatadila mbimbi jia gijila jia Yehowa,
ngudi mubua gifua muthu wakuatewa matombe,
gifua muthu wanua matombe avula diago.
10 Handaga gifutshi giazala pha nu uthambi;
gifutshi gidi mu masaga mukunda nu mukumbu,
muangu wana dia shitu mu temu wamigina.
Ndaga adi mutshita idi yabola, adi mukalegela ufumu wawo mu luholo luabola.
11 Yehowa wazuela egi: “Baprofete nu nganga-nzambi adi usala.*
Ngamonyi makalegelo awo abola nu muene mukatshi dia inzo yami.”
12 “Hene njila yawo mbayibua iladiadiadia nu yabuita;
mbaalutula, ene mbaabua.
Handaga mbanguabatela malamba
mu givo mbanguahana ndola.” Yehowa wazuela.
13 Ngamonele gima gia usala gudi baprofete a gu Samaliya.
Adi muzuela profesi mu jina dia Bale,
adi muwunganesa athu ami enya Isalele.
14 Ngamonyi gima gia usala gudi baprofete a gu Yelusalema.
Adi mutshita uthambi nu adi muzuela ndaga jia mambo;
adi muhana athu adi mutshita ndaga jiabola gikhesa,
ashigo mubemba gutshita gubola.
Gu meso ami mukut’awo agasue adi gifua Sodoma,
athu ana khala guene adi gifua Gomola.
15 Gishina giene Yehowa Nzambi wa masuta wazuela egi:
“Henyaha ngudi guadisa mutshi walula;
ngudi guahana meya adi nu puazo ha gunua.
Handaga baprofete atuma athu agasue a mu gifutshi ha gungulumbugila.”
16 Yehowa Nzambi wa masuta wazuela egi:
“Mutegelelago ndaga jidi gumiwambela baprofete.
Adi gumihuiga.
Vizio adi muzuela jidi mukatuga mu mitshima yawo,
jishigo mukatuga mu kano dia Yehowa.
17 Adi mulandula guwambela athu ashigo gungunemesa egi,
‘Yehowa wazuela egi: “Mbamukhala mu guhuima.”’
Adi muwambela nji muthu wagasue udi mulandula mutshima wenji wakola egi:
‘Nga lamba dimoshi mbadishigo gugubuila.’
18 Handaga nanyi wamagana mukatshi dia mafuta akola a Yehowa,
ha gumona nu gutegelela mbimbi yenji?
Nanyi wahagi matangi mu mbimbi yenji ha guyitegelela?
19 Tala! Khabu jia Yehowa mbajibunda gifua gikudi;
mbajibua ha mito ya athu abola gifua giphungu-phela.*
20 Khabu jia Yehowa mbajishigo muhua,
uu nu tangua mbaditagenesa muene gutshigina gua mu mutshima wenji.
Mbamukotelesa ndaga eyi muabonga mu masugu a gisugishilo.
21 Ngatuminego baprofete uvi ene azudile pushi.
Ngatelego nawo maga uvi ene azuelele profesi.
22 Uvi gula nga amaganele mukatshi dia mafuta ami akola,
nga awambelele athu ami mbimbi jiami,
nga a akuatesele ha gubemba njila yawo yabola nu makalegelo awo abola.”
23 Yehowa wazuela egi: “Ngudi Nzambi phamba tangua ngudi hehi, uvi gula ngudi gualeha ngushigo Nzambi ba?”
24 “Muthu wajiya diago gudisuega ha fundo ngajiyilego gumumona ba?” Yehowa wazuela.
“Ishigo ame ngazalesele dilu nu mavu ba?” Yehowa wazuela.
25 “Ngavui baprofete adi muzuela profesi jia mambo mu jina diami egi: ‘Ngalotshi nzoji! Ngalotshi nzoji!’ 26 Uu nu tangua ditshi baprofete mbaalandula guzuela profesi jia mambo? Ndaga adi muzuela, jidi ndaga jia mambo jidi mukatuga mu mitshima yawo. 27 Adi mukamba egi nzoji jidi muzuela ene mukatshi diawo jitume athu ami ha gujimbila jina diami, gifua luholo ajish’awo ajimbidile jina diami mukunda nu Bale. 28 Baprofete adi nu nzoji, azuele nzoji jiawo, uvi anyi adi nu mbimbi yami, azuele mbimbi yene nu giamatshidia giagasue.”
“Gamulenge gajiya gukhala luholo lumoshi nu mbuto ba?” Yehowa wazuela.
29 Yehowa wazuela luko egi: “Mbimbi yami idi gifua tshuya, idi nji gifua marto akoma anyi ana bula maseso.”
30 “Henyaha mbanguhana ndola gudi baprofete adi mukuya mbimbi jiami gudi ako,” Yehowa wazuela.
31 Yehowa wazuela egi: “Mbanguhana ndola gudi baprofete adi mukalegela madimi awo ha guzuela egi, ‘Nzambi wazuela egi!’”
32 “Mbanguhana ndola gudi baprofete adi nu nzoji jia mambo, ene adi muzuela nzoji jiawo nu adi muwunganesa athu ami mukunda nu mambo awo nu lulendo luawo.” Yehowa wazuela.
“Uvi ame ngaatuminego, ngaatogelego ha gutshita ngenyi. Gishina giene mbaashigo mubatela athu awa gubonga nga hazonda.” Yehowa wazuela.
33 “Gula athu awa nga profete nga nganga-nzambi aguhula egi: ‘Ginemo* gia Yehowa gidi itshi?’ Udi naye guavutudila egi, ‘“Enue mudi diago ginemo! Mbangumibishila,” Yehowa wazuela.’ 34 Gula profete nga nganga-nzambi nga muthu mumoshi wazuela egi: ‘Idi ginemo* gia Yehowa!’ Mbangumuhana ndola nu enya mu inzo yenji. 35 Muthu wagasue mukatshi dienu udi muwambela muthu n’a muko nu phangi’enji egi: ‘Mvutu itshi yahanyi Yehowa? Ndaga itshi yazuedi Yehowa?’ 36 Uvi mushigo naye guzuelela luko ginemo* gia Yehowa, handaga mbimbi ya muthu wagasue mukatshi dienu yene idi ginemo.* Muasombegesa mbimbi jia Nzambi wa monyo, Yehowa Nzambi wa masuta, Nzambi wetu.
37 “Udi naye guwambela profete egi: ‘Mvutu itshi Yehowa waguhanele? Ndaga itshi yazuelele Yehowa? 38 Gula mualandula guzuela egi: “Ginemo* gia Yehowa!” Yehowa udi muzuela egi: “Luholo mudi muzuela egi, ‘ginemo* gia Yehowa’ ngatshima ngamitunyishile ha guzuela egi: “Ginemo* gia Yehowa!”’ 39 Tala! Mbangumithuphula nu dimbo ngamihanele nu akhakh’enu ha gumibishila gualeha nu ame. 40 Mbangumivuisa musonyi wa mayilago, musonyi wene mbawukhala mayilago mbawushigo mubuitshiwa mutshima.”’”