Yelemiya
18 Yehowa wawambelele Yelemiya egi: 2 “Zuga ubulumuge gu inzo ya mubumbi wa nzungu, mbanguguwambela mbimbi jiami guene.”
3 Hene ngabulumugile gu inzo ya mubumbi wa nzungu, ngamusangele mutshita mudimo ha gibumbilo gienji. 4 Uvi nzungu yakhalele mulonda muene nu wuma yabolele ha mago enji. Hamonele muene ngenyi, walondele nzungu iko nu wuma wene gifua muakhalele muene mutshigina.*
5 Gungima Yehowa wanguwambelele egi: 6 “‘Oo Isalele, ngajiyilego gumitshitshila ndaga gifua muatshitshi mubumbi owu wa nzungu ba?’ Yehowa wazuela. ‘Oo Isalele, tala! Aye udi ha mago ami gifua mudi wuma ha mago a mubumbi wa nzungu. 7 Gula ngazuela egi mbanguvuza, mbangubuisa nu mbangushiya gifutshi nga ufumu, 8 gula gifutshi giene giabemba gubola giangukalegele, ame nji mbangusombegesa matangi’ami,* mbangushigo gugibatela malamba ngatshiginyile gugibatela. 9 Gula ngazuela egi mbangutunga nu mbangukuna gifutshi nga ufumu, 10 gula gifutshi giene giakalagala gubola gu meso ami nu giatuna gungutumagela, mbangusombegesa matangi’ami, mbangushigo gugitshitshila gubonga ngatshiginyile gu gitshitshila.’
11 “Henyaha ngabuba, wambela mala a gu Yuda nu athu ana jinga gu Yelusalema egi, ‘Yehowa wazuela egi: “Ngudi mulondega malamba, ngudi mutangiza nji luholo lua gumihana ndola. Ngabuba sombegesenu, bembenu njila jiabola londegenu njila jienu, sombegesenu makalegelo enu.”’”
12 Uvi ene azuelele egi: “Udi mulaba gaye guzuela! Handaga mbatutshita ndaga gifua luholo tudi mutangiza, muthu wagasue mukatshi dietu mbawulandula matangi abola a mutshima wenji, mbatushigo musombegesa.”
13 Gishina giene Yehowa wazuela egi:
“Ngabuba hulenu enya ifutshi.
Avuile gale ndaga ya luholo elu ba?
Gandongo ga Isalele gatshitshi ndaga imoshi yabola diago.
14 Neje ya mu milundu ya Libane mbayitota mu maseso enji ba?
Nga, meya ahuma adi mukatuga gualeha nu adi mubulumuga, ajiya gumigina ba?
15 Uvi athu ami angubuita mutshima.
Handaga adi muhana milambu gudi gima gishigo nu ndando,
adi mukhakhuisa athu mu njila jiawo, njila jikulu,
ha guwenda mu njila jishigo jia gulondega muabonga,*
16 hagula mavu awo abue gima gidi mukuatesa woma,
nu gima gia gusegulula* mayilago.
Muthu wagasue mbawubalega guene, mbawudihula nu woma wakola nu mbawukundula muto wenji.
17 Mbanguamuanga gutuama dia mbalagaji gifua muhehe wa gu khanda ya mazogelo a kumbi.
Mbanguata dikunda, mbaashigo mumona phala yami mu lusugu lua malamba awo.”
18 Ene azuelele egi: “Izenu tuye giphungi mukunda nu Yelemiya, handaga mukhuala* mbawukhala tangua diagasue gudi nganga-nzambi jietu; malongo nji mbaalandula gukhala gudi athu atema, mbimbi mbajilandula gukhala gudi baprofete; izenu tuzuelenu ndaga jiabola mukunda nu muene,* tuhatshigo ndaga jidi muzuela muene.”
19 Oo Yehowa ngutegelele,
tegelela nji ndaga jidi muzuela mbalagaji jiami.
20 Adi naye guvutula gubola ha fundo dia gubonga ba?
Handaga ahagi wina ha gungushiya.
Wunguluga egi ngamaganele gutuama diaye ha guzuela ndaga jiabonga mukunda nu ene,
hagula waavuilago luko khabu.
21 Bemba egi an’awo afue gu nzala,
nu gu phogo ya khusa.
Akaji’awo asale mago a githuhu ana ndo, abue nji akhetu a gafunda.
Alumi’awo ashiyiwe gu misongo,
mavuala awo a mala ashiyiwe gu phogo ya khusa gu ita.
22 Matululu a gudila avuiwe mu jinzo jiawo,
tangua mbawatumila nzangi mu gisagumuisa.
Handaga ahagele wina ha gungukuata,
atele muheto ha gungukuata.
23 Oo Yehowa,
aye mujiya muabonga iphungi yagasue anguyidile ha gungushiya.
Waatoteselago gubola guawo.
Ukatulago gubola guawo gutuama diaye.
Ene akhakhuge gutuama diaye
tangua mbawahana ndola mu khabu jiaye.