Yelemiya
19 Yehowa wazuela egi: “Nda usumbe bungu dia wuma gudi mubumbi wa nzungu. Zula akulu ako a athu nu akulu ako a nganga-nzambi, 2 gungima zoga uye mu Baba dia Mun’a Hinoma ha Mufulo wa Iphase ya Wuma. Ulongese ndaga ngudi guguwambela guene. 3 Mbawuzuela egi, ‘tegelelenu mbimbi ya Yehowa enue mafumu a gu Yuda nu athu ana jinga gu Yelusalema. Yehowa Nzambi wa masuta, Nzambi wa Isalele wazuela egi:
“‘“Ngudi mutshigina gubata lamba ha fundo edi, muthu wagasue mbawuvua ndaga yene mbawuvua lamba diakola mu mutshima.* 4 Idi handaga angutunyile nu asombegesele diago fundo edi, ngushigo gudijiya luko. Adi muhana milambu gudi nzambi jiko ha fundo edi, nzambi jinyi ene nu akhakh’awo nu mafumu a gu Yuda ajiyilego, azalesele nji fundo edi nu mahatshi a athu akalegelego gubola. 5 Alondele mafundo a gukombelela mukunda nu Bale, ha guwetshia an’awo ha tshuya gifua mulambu wagasue wa guwotshia mukunda nu Bale, ndaga inyi ngaatogelego ha gutshita, ngayizuelelego nji, khenji nji ingujidilego nga hazonda mu matangi.”’
6 Yehowa wazuela egi: “‘“Tala! Mu masugu adi muza, fundo edi mbadishigo luko mutamegewa egi Tofeta nga Baba dia Mun’a Hinoma uvi mbaditamegewa egi Baba dia Gushiya. 7 Mbangubolesa ndaga jidi mutshigina gutshita enya gu Yuda nu enya gu Yelusalema ha fundo edi. Mbanguabuisa gu phogo ya khusa gutuama dia mbalagaji jiawo nu ha mago a athu adi mukamba guashiya. Mbanguhana imbi yawo gudi tunjila tua gosa nu shitu jiabala jia ha mavu ha gudia. 8 Mbangubuisa dimbo edi gifua gima gidi mukuatesa woma nu gima gia gusegulula.* Muthu wagasue mbawubalega guene, mbawudihula nu woma wakola, mbawusegulula dimbo diene mukunda nu malamba agasue mbaabua guene. 9 Mbanguaadisa misunyi ya an’awo a mala nu a akhetu. Muthu wagasue mbawudia misunyi ya muthu n’a muko handaga ene mbaaleba muila mukunda nu gujietewa gua dimbo, tangua mbalagaji jiawo nu athu adi mukamba guashiya mbaajieta.”’
10 “Gungima mbawubula bungu ha meso a athu anyi mbamuya n’awo. 11 Mbawaawambela egi, ‘Yehowa Nzambi wa masuta wazuela egi: “Mbangubula athu awa nu dimbo edi, gifua luholo ana bula bungu dialondewa gudi mubumbi wa nzungu dishigo luko nu luholo lua gulondewa. Ene mbaafunda imbi gu Tofeta uu nu tangua mbagukhadigo luko nu fundo dia guafunda.”’
12 “‘Yene ndaga mbangutshita fundo edi nu athu ana khala mukatshi, ha gudibuisa gifua Tofeta.’ Yehowa wazuela. 13 ‘Jinzo jia gu Yelusalema nu jinzo jia mafumu a gu Yuda mbajibua usala gifua fundo edi, Tofeta, ayi, jinzo jiagasue jidi nu mayangi akhalele muhanela milambu gudi masuta agasue a mu dilu nu fundo akhalele mu bundula milambu ya matombe gudi nzambi jiko.’”
14 Tangua Yelemiya wavutugile gu Tofeta fundo Yehowa wamutumile ha guzuela profesi, wamaganele mu gibanzala gia inzo ya Yehowa, wawambelele athu agasue egi: 15 “Yehowa Nzambi wa masuta, Nzambi wa Isalele wazuela egi, ‘ngudi mubatela dimbo edi nu membo azonda-zonda adi hehi malamba agasue anyi ngazuelele, handaga akhalele mito yakola nu atunyile gutumagela mbimbi jiami.’”