Yelemiya
17 Gubola gua enya gu Yuda gudi gua gusonega nu gilabi* gia utadi.
Gudi gua gusonega mu mitshima yawo nu songi ya diama,
gudi gua gusonega nji holu dia mbinga jia iwotshielo yawo,
2 uvi an’awo a mala adi muwunguluga iwotshielo yawo nu mitshi yawo ya gijila
idi hehi nu mutshi wakoma udi nu mayiji avula, holu dia tumilundu,
3 nu holu dia milundu idi gualeha nu membo.
Mbangubemba egi athu ako atambule ima yenu ya ndando nu umonyi wenu wagasue,
nu mafundo enu a gukombelela, handaga gubola guenu guadivudisa mu mavu enu agasue.
4 Mbawubemba aye hakhaye khapho ngaguhanele.
Mbangugubuisa muenya mudimo wa mbalagaji jiaye mu gifutshi ginyi ushigo mujiya,
mbangulemesa khabu jiami gifua tshuya.
Tshuya tuene mbatulandula gulemuga tangua diagasue.
5 Yehowa wazuela egi:
“Mukumbu ukuate muthu* udi musha mutshima gudi ana a athu,
munu udi musha mutshima mu ngolo jia athu,
udi mutuna Yehowa mu mutshima wenji.
6 Muene mbawubua gifua mutshi udi wa gudikhalela mu mavu a luselenga.
Mbagashigo muheta nga gima gimoshi giabonga,
mbawukhala mu mavu a gimigina mu temu,
mu mavu a mungua, fundo nga muthu mumoshi gajiyilego gujinga.
7 Muthu* udi mushila Yehowa mutshima,
nu udi gudifelela gudi Yehowa mbawushimbigiwa.
8 Muene mbawubua gifua mutshi wakunyiwe mu khulo ya muta,
unu udi mutuma miji yenji uu nu mu muta.
Muene mbagashigo muvua muanya wakola,
uvi mayiji enji mbaalandula gukhala lembe-lembe.
Muene mbagashigo gudisagesa mu givo gia gikalala,
mbawulandula guhaga mabundu.
9 Mutshima wana huiga gubalega ima yagasue, wajiya nji gutshita ndaga jiagasue watshigina.*
Nanyi wajiya guwujiya?
10 Ame Yehowa, ngana tala mutshima,
ngana tala muabonga matangi a moshi’a mutshima,*
ha gufuta muthu wagasue gifua mudi makalegelo enji
nu gifua mudi midimo yenji.
11 Muthu udi muheta umonyi mu njila jia mambo,*
udi gifua nguadi idi mubungisa mayi anyi ashigo enji.
Muene mbawubemba umonyi wene ha katshi na katshi dia monyo wenji,
gu gisugishilo, guheya guenji mbagumonega haphelo.”
12 Nguasa ya lutumbu yakanduishiwe sendese gu gisendeselo,
idi fundo dietu dia gijila.
13 Oo Yehowa aye felela dia Isalele,
athu agasue adi gugubemba mbaavishiwa musonyi.
Majina a athu adi gugutuna* mbaasonegewa mu fuphi,
handaga ene agutunyi aye Yehowa gito gia meya a monyo.
14 Oo Yehowa ngusage, mbangukola.
Nguhuluise, mbanguhuluga,
handaga aye ngana tumbuisa.
15 Tala! Athu adi gunguwambela egi:
“Mukunda natshi mbimbi ya Yehowa khenji itagenesewa galego?
Ibembe itagenesewe!”
16 Uvi ame, ngatunyilego gugulandula nga gukhala mubambi wa imeme,
ngatshiginyilego nji egi lusugu lua lamba luze.
Aye mujiya muabonga ndaga jiagasue ngazuelele;
ndaga jiene jiagasue jiakalegewe ha meso aye!
17 Unguvuisago woma.
Handaga aye udi fundo diami dia gulengela mu lusugu lua lamba.
18 Athu adi gungusagesa avuishiwe musonyi,
uvi ame nguvuishiwago musonyi.
Athu adi gungusagesa avishiwe woma,
uvi ame nguvuigo woma.
Tshita egi lusugu lua lamba luabuile,
atshiongonone, ashiye mayilago.*
19 Yehowa wanguwambelele egi: “Nda umagane ha mufulo wa ana athu, mufulo wana nginyila mafumu a gu Yuda nu wana zogela ene; umagane nji gu mifulo yagasue ya gu Yelusalema. 20 Udi naye guawambela egi: ‘Tegelelenu mbimbi ya Yehowa, enue mafumu a gu Yuda nu athu agasue a gu Yuda nu athu agasue ana jinga gu Yelusalema adi mu ngina mu mifulo eyi. 21 Yehowa wazuela egi: “Temenu hagula mubatshigo nga ginemo gimoshi mu Lusugu lua Guhuluguga; munginyigo nji nagio mu mifulo ya Yelusalema. 22 Mushigo naye guzola nga ginemo gimoshi mu jinzo jienu mu Lusugu lua Guhuluguga; mushigo naye nji gutshita nga mudimo umoshi. Lusugu lua Guhuluguga ludi naye gukhala lua gijila, gifua luholo ngawambelele akhakh’enu. 23 Uvi ene ahagelego kutshi diawo ha gutegelela; akhalele mito yakola, atunyile* gutumaga nga gutshigina ndola.”’
24 Yehowa wazuela egi: “‘“Uvi gula enue muangutumagela diago, muanginyishilego nga ginemo gimoshi mu mifulo ya dimbo edi mu Lusugu lua Guhuluguga nu muatuna gutshita nga mudimo umoshi mu lusugu luene ha gunemesa lusugu lua gijila, 25 ngenyi mafumu nu manene ana khala ha nguasa ya ufumu ya Davidi, mbaangina nji ha mifulo ya dimbo edi; mbaakhala holu dia phusu-phusu nu tubalu nu manene awo nu mala a gu Yuda. Athu mbaajinga gu Yelusalema mayilago. 26 Athu mbaakatuga mu membo a Yuda nu mu mafundo adi mu khulo ya Yelusalema. Mbaakatuga nji mu mavu a Benjame nu mu baba nu gu khanda ya milundu nu gu Negebe.* Ene mbaabata milambu yagasue ya guwotshia; nu milambu iko nu milambu ya mbuto nu uhafu ulaphe nu milambu ya guhana mersi gu inzo ya Yehowa.
27 “‘“Uvi gula muangutumagelego nu muanemeselego Lusugu lua Guhuluguga gifua lusugu lua gijila nu mudi mubata inemo nu guyinginyisa ha mifulo ya Yelusalema mu lusugu luene, mbangumba mifulo yene tshuya. Tshuya tuene mbatukonda jinzo jialeha jia Yelusalema jidi nu ibayi yakola, mbatushigo mujima.”’”