Yelemiya
11 Yehowa wawambelele Yelemiya egi: 2 “Enue athu, tegelelenu mbimbi jia gikotelo gigi!
“Jiwambelenu* mala a gu Yuda nu enya gu Yelusalema 3 egi, ‘Yehowa Nzambi wa Isalele wazuela egi: “Mukumbu ukuate muthu gashigo mutumagela mbimbi jia gikotelo gigi, 4 mbimbi jinyi ngawambelele akhakh’enu mu lusugu ngaazolele mu gifutshi gia Ejipitu, fundo akhalele mumona lamba diakola gifua utadi mukatshi dia fulu ya tshuya tuakola. Ngaawambelele egi: ‘Tumagelenu mbimbi yami, tumagelenu ndaga jiagasue ngudi gumiwambela, ngenyi mbamubua athu ami, ame mbangukhala Nzambi wenu. 5 Hagula ngutagenese ndaga ngadilogele gudi akhakh’enu, ha guahana gifutshi giazala pha nu miliki nu wigi, gifua luholo idi mangino.’”’”
Ngavutudile egi: “Amen* Yehowa.”
6 Gungima Yehowa wanguwambelele egi: “Longesa mbimbi eji jiagasue mu membo a gu Yuda nu mu mabala-bala a gu Yelusalema egi: ‘Tegelelenu mbimbi jia gikotelo gigi, jitumagelenu. 7 Handaga ngakhalele diago mutemesa akhakh’enu sendese mu lusugu ngaazolele mu gifutshi gia Ejipitu uu nu mangino, ngakhalele guatemesa egi: “Tumagelenu mbimbi yami.” 8 Uvi atunyile gutegelela; akhalele mito yakola, alanduile matangi awo abola. Atunyile gutumagela ndaga ngaawambelele ha gutshita, gishina giene ngatshitshile egi ndaga jiagasue jidi muzuela gikotelo egi jiaabuile.’”
9 Gungima Yehowa wanguwambelele egi: “Mala a gu Yuda nu enya gu Yelusalema anguyidile giphungi. 10 Avutugile gubola guatshitshile akhakh’awo, anyi atunyile gutumagela mbimbi yami. Ene nji alanduile nzambi jiko, ajikombelele. Enya gu Isalele nu enya gu Yuda ashiyile gikotelo ngakotele nu akhakh’awo. 11 Gishina giene Yehowa wazuela egi: ‘Henyaha ngudi guabatela malamba, ene ajiyilego guhuluga gu malamba ene. Tangua mbaangutamega ha guakuatesa, mbangushigo guategelela. 12 Gungima enya mu membo a gu Yuda nu enya gu Yelusalema mbaaya mutoga ukuateshi gudi nzambi jiana hana ene milambu, uvi nzambi jiene mbajishigo guahuluisa mu tangua dia lamba. 13 Handaga nzambi jienu jiabua jiavula gifua mudi guvula gua membo enu, Oo enya gu Yuda, mualondji iwotshielo yavula mukunda nu gima gia musonyi,* idi yavula gifua mudi mabala-bala a gu Yelusalema, mualondji iwotshielo yene ha guhana milambu gudi Bale.’
14 “Uvi aye, ukombelelago mukunda nu athu wawa. Ungudidilago mukunda nu ene nga gutshita gisambu mukunda nu ene, handaga mbangushigo mutegelela tangua mbaangutamega mu tangua dia lamba ha guakuatesa.
15 Mukunda natshi athu ngana zumba adi mu inzo yami
hadi ene muya iphungi yabola?
Milambu yawo ya shitu* yajiya gutshita egi lamba dimibuilago ba?
Mbawusuanguluga mukunda nu ndaga yene ba?
16 Ame Yehowa ngakhalele gugutamega egi mutshi wakoma wa olive,
mutshi wabonga udi nu mabundu abonga.
Matululu akhalele akola diago, ngambile mutshi wene tshuya,
akokele thango jienji.
17 “Yehowa Nzambi wa masuta, muthu wa gukunyile, wazuela egi, malamba mbaagubuila mukunda nu gubola guatshitshile enya gu Isalele nu enya gu Yuda, anyi anguhanele khabu luholo ahanele milambu gudi Bale.”
18 Yehowa, aye wanguwambelele hagula ngujiye;
mu tangua diene wangukuatesele ha gumona ndaga akhalele mutshita.
19 Ngakhalele gifua mun’a gimeme watuluga udi mubatewa ha gushiyiwa.
Ngakhalelego mujiya egi anguyidile giphungi egi:
“Tukokenu mutshi udi nu mabundu,
tumushiyenu, atote ha mavu
hagula athu awungulugago luko jina dienji nga hazonda.”
20 Uvi Yehowa Nzambi wa masuta wana sophesa nu giamatshidia;
wana tala muabonga matangi* nu mutshima wa muthu.
Ngukuatese ha gumona luholo udi guavutudila gubola,
handaga ngabembele mulonga wami ha mago aye.
21 Gishina giene Yehowa wazuela mukunda nu mala a gu Anatota anyi adi mukamba gugushiya nu adi muzuela egi: “Ushigo naye guzuela profesi mu jina dia Yehowa gula ndo mbatugushiya;” 22 Yehowa Nzambi wa masuta wazuela egi: “Mbanguasophesa. Mavuala a mala mbaafua gu phogo ya khusa, an’awo a mala nu a akhetu mbaafua gu nzala. 23 Gushigo nga muthu mumoshi mukatshi diawo mbawusala nu monyo, handaga mbangubatela mala a gu Anatota malamba mu givo mbanguasophesa.”