Yelemiya
12 Oo Yehowa, aye wana tshita ndaga jiabonga, tangua ngana guguwambela ndaga jidi gungusagesa,
tangua ngana zuela nu aye ndaga jiatadila usopheshi waye.
Uvi mukunda natshi athu abola adi mubinga mu ndaga adi mutshita?
Mukunda natshi enya mambo ashigo gudisagesa nga gu ndaga imoshi?
2 Aye waakunyile, ene azolele miji.
Akudile, ahagele mabundu.
Ana gugutumbula phamba mu makano awo, uvi mitshima yawo idi gualeha nu aye.*
3 Uvi aye udi gungujiya muabonga, Oo Yehowa, wana gungumona;
watalele muabonga mutshima wami, wamonele egi ngudi ya gujinginyina gudi aye.
Katula athu abola gifua imeme idi mutshigina gushiyiwa,
ahage hakhawo gu khanda iko mukunda nu lusugu lua gushiyiwa.
4 Uu nu tangua ditshi mavu mbaakhala alandu
nu mayiji a mu mahia mbakhala a gimigina?
Shitu jia mu foto nu tunjila tuafua
mukunda nu gubola gua athu adi mu gifutshi giene.
Handaga ene azuelele egi: “Muene gashigo mumona ndaga jidi gutubuila.”
5 Gula wahuila ha guzula phushi nu athu adi ha malu,
luholo lutshi wajiya guzula phushi nu tubalu?
Ngatshima udi mu ubambi mu gifutshi gidi mu guhuima,
uvi itshi mbawutshita tangua mbawukhala moshi’a mavunda adi mu khulo ya Yordane?
6 Handaga nu ene aphangi’aye, enya fami ya sh’aye,
agutshitshila gubola.
Adi gugumba milolo mu dijui diakola.
Waashilago mutshima,
ikhale ene adi guguwambela ndaga jiabonga.
7 Ngabembele inzo yami; ngabembele khapho diami.
Ngahanele muthu ngana zumba muavula ha mago a mbalagaji jienji.
8 Khapho diami diabuile gifua khoshi mu gishitu.
Diakhalele gungubalela.
Hene ngaditunyile.
9 Khapho diami didi gifua njila ilakaji-kaji* yana dia phamba misunyi;
njila jiko jiana dia misunyi jiayijieta nu jiayiluisa.
Enue shitu jiagasue jia mu foto, zenu, dibungisenu hamoshi,
zenu mudie.
10 Abambi a imeme avula abolesele dihia diami dia vinyo;
ene adiatele gitshinyi gia mavu ami.
Abuishile gitshinyi gia mavu ami a ndando gifua mavu a luselenga a githuhu.
11 Abuile a githuhu.
Abuile alandu;
abuile a githuhu gutuama diami.
Gifutshi giagasue giabuile makhulu,
uvi nga muthu gadisageselego mukunda nu ndaga yene.
12 Athu ana shiya abalegela mu njila jiagasue jiabola jia mu mavu a luselenga ha guza,
handaga phogo ya khusa ya Yehowa idi mubolesa gifutshi songi nu songi.
Gushigo nga muthu mumoshi udi mu guhuima.
13 Ene akunyile mbuto jia ble, uvi akatudile miya.
Alabele gawo gudihudisa, uvi ahetelego nga gima.
Ene mbaavua musonyi mukunda nu mbuto jiawo
handaga Yehowa udi guaavila khabu jiakola.
14 Yehowa wazuela egi: “Ngudi mukatula athu agasue abola ana khala hehi nu ame mu mavu awo, athu adi muzangela khapho ngahanele athu ami enya Isalele. Mbangukatula nji enya gu Yuda mukatshi diawo. 15 Uvi gungima dia guakatula, mbanguavila luko khenda, mbanguavutula; muthu nu muthu mbawuvutugila khapho dienji nu mavu enji.”
16 “Gula atshita yagasue ha gulonguga makalegelo a athu ami nu ha gudiloga mu jina diami egi: ‘Mu jina dia Yehowa Nzambi wa monyo!’ Gifua luholo ene nji alongesele athu ami ha gudiloga mu jina dia Bale, ngenyi mbaajinga mukatshi dia athu ami. 17 Uvi gula atumagelego, mbangukatula gifutshi giene, mbangugishiya,” Yehowa wazuela.