Nos Mester Keda ku e Punto di Bista Korekto di Nos Problemanan

1-2. Kiko nos mester hasi pa trata ku nos problemanan na e manera korekto? (Wak e plachi.)

AWE Yehova su sirbidónan ta pasa den hopi difikultat. Tin ruman ta haña nan ku oposishon di famia. Otro ruman ta ser persiguí pasobra nan ta sirbi Yehova. Anto hopi di nos rumannan ta sufri pa motibu di malesa òf behes. I tin otro ruman ku ta sufri debí ku nan a pèrdè un ser kerí òf nan a pasa den un situashon teribel. Kisas bo tambe ta haña bo ku diferente “problema i tristesa” den bo bida.—Sal. 90:10.

² Pa nos por trata ku nos problemanan na e manera korekto, nos mester mira nan for di Yehova su punto di bista. Dikon esei ta importante? Pasobra si nos no hasi esei, nos lo no sa kon ta e mihó manera pa dil ku nos situashon. Por ehèmpel, si nos winshil ta sushi, nos lo no tin bon bista di e opstákulonan riba kaminda. Pero si nos winshil ta limpi, nos lo tin mihó bista riba e opstákulonan i nos lo sa mihó kiko nos mester hasi. Den e artíkulo akí nos lo trata (1) ki punto di bista nos mester tin di nos problemanan, (2) kiko por pasa ora nos tin un punto di bista robes di nos problemanan, i (3) kiko ta algun kos ku nos por hasi pa keda ku e punto di bista korekto ora nos haña nos ku problema.

KI PUNTO DI BISTA NOS MESTER TIN DI NOS PROBLEMANAN?

3. Dikon nos ta haña nos ku problema aworakí?

³ Nos no por evitá problema den e mundu malbado akí. Nos ta sufri debí ku nos ta biba den un mundu goberná pa Satanas i debí ku nos ta imperfekto. Ademas, mas serka nos yega di e fin, mas difísil bida lo bira. Nos lo mira mas desaster natural tuma lugá. Anto hende lo sigui sufri debí na kos malu ku hende ta hasi. (Mat. 24:8; 2 Tim. 3:13) Dikon Yehova no ta kaba ku nos problemanan for di awor? Pasobra si e hasi esei, lo parse ku e ta yudando Satanas goberná mundu. Pues, tanten ku nos ta biba den e sistema akí, nos lo sigui haña nos ku kalamidat.—Ekl. 9:12.

4. Menshoná un otro motibu dikon nos ta haña nos ku problema.

⁴ Nos ta haña nos ku problema pasobra nos ta sigui Hesus. Vários biaha, Hesus a bisa su disipelnan ku nan lo ser persiguí pa motibu ku nan ta siguié. (Mat. 24:9; Huan 16:2) P’esei, ora nos haña nos mes ku persekushon, esei lo no sorprendé nos i pone nos stòp di sirbi Yehova. (1 Tes. 3:​3, 4) Ora nos ta sigui perseverá apesar di prueba, nos por tin sigur ku Yehova i Hesus lo rekompensá nos ku bida eterno. Ademas, ora nos keda fiel na Yehova, nos lo mustra na ken su banda nos ta. Satanas ta insinuá ku hende ta sirbi Yehova djis pa nan mes benefisio. P’esei, Satanas ta hasi tur su esfuerso pa ataká Yehova su sirbidónan pa mustra ku nan lo no keda fiel ora nan haña nan ku prueba. (Yòb 1:​9-11) Pues, ora nos keda fiel na Yehova nos ta mustra ku nos ta stim’é i esei ta hasi su kurason kontentu.—Pro. 27:11.

5. Kiko nos por siña for di Eklesiástes 7:13 i 14? (Wak e plachinan.)

⁵ Yehova no ta stòp tur kos malu di pasa. Yehova no ta aktua na un manera kruel ni nunka e no ta pone nos na prueba ku kos malu. (Sant. 1:13) Pero awor, dikon Rei Sálomon a bisa ku ‘un dia yen di difikultat’ ta ‘obra di e Dios berdadero’? (Lesa Eklesiástes 7:​13, 14.) Ora Sálomon a bisa esei, e no tabata ke men ku ta Yehova ta kousa kos malu, mas bien ku Yehova ta djis permití e kosnan akí pasa. Pues kiko nos por siña for di e palabranan di Sálomon? Di promé, nos mester kòrda ku tanten ku nos ta biba den e mundu akí, nos lo tin dia bon i dia malu. Riba e dianan bon, nos mester gradisí Yehova pasobra tur kos bon ta bini di dje. Di dos, Sálomon ta kòrda nos ku “hende no sa kiko lo pasa ku nan den futuro.” Pues, nos niun no sa ki ora algu bon òf algu malu lo pasa den nos bida. Esei ta nifiká ku nos tur, sea ku nos ta bon hende òf mal hende, por haña nos ku problema diripiente.

6. Kiko ta algun motibu ku Yehova ta permití nos pasa den prueba? (Hebreonan 12:​7, 11)

⁶ Durante prueba, Yehova por siña nos pa dependé riba dje, i no riba nos mes. Yehova ta mira ora nos ta sufri, i e ta sinti duele di nos. Aunke Yehova ta permití kos malu pasa ku su sirbidónan, nunka e no ta laga nos nos so; e ta mustra nos ku e ta stima nos, e ta guia nos i e ta duna nos e forsa ku nos tin mester pa perseverá. (Sal. 23:4) Ademas, ora nos haña nos ku prueba, nos por haña sa tambe ki kualidat nos mester traha riba dje, i Yehova lo yuda nos traha riba e kualidatnan ei. (Lesa Hebreonan 12:​7, 11.) Por ehèmpel, Yòb mester a traha riba humildat. Aunke Yehova no a kousa Yòb su sufrimentu, el a permití esaki, i el a usa e momento ei pa siña Yòb un lès importante tokante humildat. (Yòb 42:​1-6) Nos por tin sigur ku, si Yehova permití nos pasa den prueba, lo e yuda nos pa keda fiel na dje, i lo e rekompensá nos.—Rom. 8:​35-39.

7. Dikon bo por tin goso apesar di persekushon?

⁷ Nos por tin goso apesar di persekushon. Ora bo haña bo ku persekushon, no pensa ku bo no tin Yehova su aprobashon òf ku e no ta yudando bo mas. Al kontrario, Yehova ta masha kontentu ku bo, pasobra bo ta hasiendo su boluntat. (Mat. 5:​10-12) Ora nos realisá esei, nos tambe por mantené nos goso apesar di persekushon, meskos ku e apòstelnan. (Echo. 5:​40-42) Un otro sirbidó di Yehova ku a hañ’é ku prueba tabata Yósef. Yehova a yuda Yósef i bendishon’é asta promé ku el a sali for di prizòn. Meskos ku Yósef, Yehova por yuda nos tambe durante nos pruebanan. (Gén. 39:​3, 23) Ademas, ora nos keda fiel bou di persekushon, nos por yuda otro hende siña e bèrdat tokante Yehova. Esei por motivá nan pa “duna gloria na Dios.”—1 Ped. 2:12

8. Kiko mas por yuda nos keda fiel na Yehova ora nos pasa den prueba?

⁸ Nos pruebanan lo no dura pa semper. E relato di Yòb ta kòrda nos ku nos pruebanan lo no dura pa semper. De echo, “Yehova a bendishoná e último parti di Yòb su bida mas ku e promé parti.” (Yòb 42:12) Di mes manera, Yehova lo bendishoná nos masha hopi mes den e mundu nobo. E bida ku nos tin aworakí den e mundu di Satanas ta kòrtiku kompará ku e bida ku nos lo bai disfrutá di dje den futuro. E echo ku nos sa esei por yuda nos sigui perseverá te na fin di e mundu malbado akí.—Mat. 24:13.

LOKE POR PASA ORA NOS TIN UN PUNTO DI BISTA ROBES DI NOS PROBLEMANAN

9. Kon un punto di bista robes tokante nos problemanan por hiba na mas problema?

⁹ Ora nos haña nos ku un problema i nos no tin e punto di bista korekto tokante e problema ei, esei por hiba na mas problema. Por ehèmpel, un punto di bista robes ku nos por tin tokante nos problemanan ta ku ta Yehova a kousa nan. Esei ta loke a pasa ku Yòb. Pa un tempu, el a pensa ku ta Yehova a kousa su problemanan, i esei a pone ku el a “purba di proba su inosensia en bes di proba ku Dios ta un Dios hustu.” (Yòb 32:2) Noemí tambe a pensa ku Yehova a kousa su problemanan. (Rut 1:​13, 20, 21) Si Yòb i Noemí lo no a kambia nan punto di bista robes, nan lo por a daña nan amistat ku Yehova. (Pro. 19:3) Pero Yehova a yuda nan mira ku no ta e tabata kousa nan problemanan. El a mustra nan ku e tabata stima nan, i el a bendishoná nan pa nan fieldat.

10. Ora nos haña nos ku problema den bida, kiko nos por kuminsá pensa?

¹⁰ Asta si nos tin sigur ku Yehova no a kousa nos problemanan, tin un otro punto di bista robes ku nos tin ku evitá. Nos por kuminsá pensa ku nos no ta importante mas pa Yehova i ku e no tin kunes ku loke nos ta pasando den dje. Anto e pensamentu ei por desanimá nos. (Pro. 24:10) Rei David i Profeta Habakuk tambe a sinti asina na sierto momento. Ora nan a haña nan ku vários problema den nan bida, nan a kuminsá duda si Yehova di bèrdat ta skucha nan orashonnan. (Sal. 10:1; Hab. 1:2) Pero, nan no a stòp di hasi orashon. Yehova a kontestá nan orashonnan, i el a yuda nan. Yehova lo hasi meskos pa nos ora nos haña nos ku problema.—Sal. 10:17.

11. Kiko por pasa ora nos tin un punto di bista robes tokante prueba?

¹¹ Si nos tin e punto di bista robes tokante prueba, nos por pensa tambe ku Yehova lo no permití nada malu pasa ku nos. I ora esei sosodé, lo e por sorprendé nos. (1 Ped. 4:12) E disipelnan di Hesus tambe tabatin un punto di bista robes na un sierto momento. Ora Hesus a splika nan ku lo e wòrdu persiguí i matá, nan no por a kere ku e kosnan akí lo a pasa ku Hesus. (Lúk. 18:​33, 34) Por ehèmpel, Pedro tabata pensa ku Dios lo no a laga Hesus sufri di e manera ei. Pero Hesus tabata sa ku pa e kumpli ku Yehova su boluntat, lo e mester a sufri i muri. Komo ku Hesus tabata sa ku Pedro su manera di pensa lo por a strob’é di hasi Yehova su boluntat, el a korigí Pedro. (Mar. 8:​31-33) Asta despues ku Hesus a muri, su disipelnan no a komprondé mesora dikon e mester a muri. Pero Hesus no a pensa ku nan tabata un kaso pèrdí. Despues ku Hesus a resusitá i aparesé na nan, el a yuda nan komprondé dikon e mester a sufri i el a “splika [nan] na plaka chikí loke Skritura ta bisa.” (Lúk. 24:​25-27, 32, 44-48) Ora nan a meditá riba loke Hesus a siña nan, esei lo a yuda nan prepará pa e persekushon ku nan lo a haña nan kuné. Nos tambe por prepará pa persekushon òf otro problema ora nos meditá riba loke Beibel ta bisa tokante nan.

12. Kon nos por sinti ora nos tin un punto di bista robes tokante nos problemanan?

¹² Tin algu mas ku por pasa ku nos ora nos tin un punto di bista robes tokante nos problemanan. Nos por kuminsá pensa ku nan ta mas grave ku nan ta en realidat. Hesus a konta un ilustrashon ku ta mustra kon esei por pasa. El a konta un ilustrashon tokante algun trahadó ku no a keda kontentu ora ku nan a haña nan pago. Nan a pensa ku nan a meresé mas pago, pero e doño di e kunuku di wendrùif a bisa un di nan: “Mi amigu, mi no a hasi nada inhustu ku bo.” (Mat. 20:​10-13) E trahadónan ei a pensa ku e doño a trata nan na un manera inhustu, pero esei no tabata e kaso. E motibu dikon nan tabata sinti asina ta pasobra nan tabatin un ekspektativa ku no a bira realidat. Awe algun ruman tambe por sinti nan desapuntá ora nan keda sin haña un privilegio ku nan tabata ferwagt òf ora nan tin ku pasa nan privilegio pa un otro ruman. Awor ban wak kiko por yuda nos tin Yehova su punto di bista tokante un situashon difísil ku nos ta aden.

LOKE NOS MESTER HASI ORA NOS HAÑA NOS KU PROBLEMA

13. Kiko por pasa ora nos haña nos ku situashon difísil?

¹³ Komo sirbidó di Yehova, nos sa kiko Beibel ta bisa tokante sufrimentu. Anto hopi biaha nos ta lesa algun teksto di Beibel pa animá hende ku ta pasa den difikultat. Pero, ora nos mes pasa den situashon difísil, por ta difísil pa keda ku e punto di bista korekto di nos situashon. Por ehèmpel, bo por kuminsá pensa ku ta Yehova ta kastigando bo pa algu malu ku bo a hasi. Òf bo por kuminsá pensa ku Yehova a stòp di skucha bo orashonnan. Kiko bo por hasi pa keda ku e punto di bista korekto?

14. Kiko bo por pidi Yehova den orashon ora bo ta pasa den situashon difísil? (Filipensenan 4:13)

¹⁴ Pidi Yehova pa yuda bo. Papia ku Yehova tokante bo situashon i splik’é kon bo ta sinti bo. Si tin algu spesífiko ku bo ke pa Yehova yuda bo kuné, pidié esei den orashon. Bo por pidié tambe pa su spiritu santu. Su spiritu santu por duna bo e sabiduria pa tuma bon desishon i e forsa pa sigui sirbi Yehova. Kòrda sí ku Yehova no semper ta kontestá nos orashonnan na e manera ku nos a ferwagt. (Efe. 3:20) Ademas, Yehova por usa e angelnan i nos rumannan pa yuda nos. (Sal. 34:7) Pues, keda atento pa wak kon Yehova lo yuda bo i no lubidá di gradisié pa su yudansa. Bo por tin sigur ku Yehova ta kla pa duna bo su spiritu santu pa yuda bo den kualke situashon ku presentá!—Lesa Filipensenan 4:13.

15. Kiko por yuda bo perseverá apesar di prueba? (Wak e plachi.)

¹⁵ Keda ku un bon rutina spiritual. Ora bo haña bo ku prueba, kisas lo ta difísil pa tene bo mes na bo rutina spiritual. Pero ta nèt na e momento ei ta masha importante pa bo tin Yehova su punto di bista tokante bo situashon. P’esei, hasi bo esfuerso pa lesa òf skucha kos ku por yuda bo sigui pensa manera Yehova ta pensa. (Sal. 119:143) Sigui lesa i studia Beibel regularmente i meditá riba loke bo a lesa. Keda aktivo den sirbishi, bai bo reunionnan i partisipá na nan. Anto na lugá di buska manera pa isolá bo mes, pasa tempu ku bo rumannan.—Pro. 18:1.

16. Ora bo ta pasa den situashon difísil, kiko bo por kuminsá pensa i kiko bo por hasi pa kita e pensamentunan ei? (2 Korintionan 10:​4, 5)

¹⁶ Usa Beibel pa kambia bo manera di pensa. Ora bo haña bo ku prueba, kisas bo por kuminsá pensa kos ku no ta bèrdat tokante bo mes òf tokante Yehova. Kiko por yuda bo kambia bo manera di pensa? (Lesa 2 Korintionan 10:​4, 5.) Loke por yuda bo ta di buska mas informashon den Beibel i den e publikashonnan ku Yehova su organisashon ta duna nos. Por ehèmpel, bo ta pensa ku bo no tin Yehova su aprobashon mas? Ora bo haña bo ku pensamentu asina, studia e ehèmpel di Apòstel Pablo. Durante e tempu ku Pablo tabata prediká, el a hañ’é ku vários difikultat. Pero e echo ku e tabatin e forsa pa sigui prediká, apesar di tur e kosnan ku el a pasa aden, a konvens’é ku e tabatin Yehova su aprobashon. (2 Kor. 11:​23-27) Bo a yega di puntra bo mes si Yehova a pordoná bo pa bo pikánan di pasado? Si ta asina, traha un lista di teksto ku ta mustra ku di bèrdat Yehova ta pordoná nos pikánan. (Isa. 43:25) Despues, lesa e tekstonan ku bo a haña i meditá riba nan. (Sal. 119:97) Òf kisas algu hopi malu a pasa ku bo òf un ser kerí di bo, i bo a kuminsá duda si di bèrdat Yehova ta protehá su fiel sirbidónan. Si esei ta e kaso, hasi investigashon tokante dikon Yehova ta permití sufrimentu i dikon nos por tin sigur ku lo e yuda nos den kualke situashon ku nos haña nos aden. (Sal. 91:​9-12) Ademas, bo por lesa relato di ruman ku a pasa den situashon hopi difísil pero ku tòg a keda sirbi Yehova ku goso.a

17. Kiko nos mester hasi ora nos haña nos ku situashon difísil?

¹⁷ Kisas bo no ta pasando den un problema grandi aktualmente. Si ta asina, gradisí Yehova pa esei i mustra apresio pa tur e kosnan bon ku e ta duna bo. (Ekl. 7:14) Pero ora problema presentá, keda ku e punto di bista korekto di e situashon i keda konfia kompletamente den Yehova. Ora bo hasi esei, Yehova “lo pèrkurá un salida” pa bo por sigui perseverá. (1 Kor. 10:13) Pero kiko di nos rumannan ku ta pasando den situashon difísil? Kon nos por yuda nan? E siguiente artíkulo lo kontestá e pregunta ei.